29/11/2020 20:11
728 x 90

“Yelo Bank” ön cəbhədə döyüşən əsgər Ayaz Məmmədlini kredit gecikməsinə görə məhkəməyə verdi…

Heydər Məmmədli: “Cəbhə bölgəsində olan qardaşım kredit borcunu 2 ay gecikdirdiyi üçün məhkəməyə verilib”

img

“Yelo Bank” ön cəbhədə döyüşən əsgərimiz Ayaz Məmmədlini məhkəməyə verib. Bu barədə mətbuata əsgərin qardaşı Heydər Məmmədli məlumat verib.

O bildirib ki, getdiyi gündən bəri sadəcə 2 dəfə yaxınları ilə danışmaq imkanı tapan Ayazın cəbhə bölgəsində olduğu bankın məsul şəxslərinə bildirilsə də, 2 ay kredit borcunu gecikdirdiyi üçün qardaşını məhkəməyə veriblər.

Ayazın qardaşı bildirir ki, o, könüllü olaraq cəbhə bölgəsinə yollanıb: “Bankdan ailəsinə zəng etdilər və borcla bağlı xəbərdarlıq etdilər. Ailə üzvləri onun döyüş bölgəsində olduğunu dedilər. Bank əməkdaşları heç bir problemin olmadığını və hesabı donduracaqlarını söylədilər. Lakin noyabrın 10-da döyüşlər bitəndən sonra onu məhkəməyə verdilər. Demək ki, onlar əsgəri məhkəməyə vermək üçün döyüşün bitməsini gözləyiblər. Bu nə dərəcədə düzgündür? Belə çıxır ki, qardaşım şəhid olsaydı, borcu bağlayacaqdılar? Hazırda ölkəmizdə bütün insanlar əl-ələ verib  dövlətimiz üçün həmrəylik sərgiləyirlər. Belə bir vaxtda bankın onu məhkəməyə verməsi düzgün deyil. İnanıram ki, məsələ öz həllini tapacaq və bankın rəhbərliyi anlayışlı addım atacaq".

  • “Yelo Bank”: “Yelo Bank” vətən uğrunda azadlıq müharibəsinin ilk günündən döyüşlərdə iştirak edən və zərər çəkmiş hər bir müştərisinin yanında”

Məsələ ilə bağlı “Yelo Bank”la əlaqə saxladıq. Bankdan bildirildi ki, bank döyüşlərdə iştirak etmiş hər bir müştərisinin yanındadır: “Sosial şəbəkələrdə yayılan “Yelo Bank”ın əsgərimizi məhkəməyə verməsi ilə bağlı xəbər əsasında araşdırma aparılıb. Məhkəməyə müraciət həmin şəxsin əsgər kimi xidmətə başlamasından əvvəl olub və xidmətdə olduğu bilindikdən sonra dərhal bank tərəfindən Ucar Rayon Məhkəməsinə prosesi dayandırması ilə bağlı məlumat yönləndirilib. Bununla yanaşı, əsgərimizin qardaşı da banka dəvət edilib. “Yelo Bank” vətən uğrunda azadlıq müharibəsinin ilk günündən döyüşlərdə iştirak edən və zərər çəkmiş hər bir müştərisinin yanındadır. Xidmətdə olan müştərilərlə bağlı məlumatların yığılması müəyyən vaxt tələb etdiyindən, qeyd olunan formada yanlış anlaşılmalar baş verə bilir. Artıq bir neçə müştərimizi ziyarət edərək, həm edilən güzəştlərlə bağlı məlumatı şəxsən onlara çatdırmış, həmçinin, müharibədə göstərdikləri qəhrəmanlıqlara görə təşəkkürümüzü bildirmişik. Bu gün belə müştərilərimizdən biri olan və döyüşlər zamanı qolunu itirmiş əsgərimizə bank nümayəndələri tərəfindən baş çəkilib. Müharibə haqda iştirakçının dilindən eşitmək əldə etdiyimiz qələbənin necə dəyərli olduğunu bizə bir daha sübut etdi.

Bütün bu dövr ərzində daim ordumuz və əsgərlərimizin, cəbhəyə yollanan yoldaşlarımızın və onların ailələrinin yanında olub, dəstəyimizi əsirgəməmişik və bundan sonra da əsirgəməyəcəyik”.

Günel CƏLİLOVA

Son xəbərlər