Koronavirus bütün ölkələrdə tüğyan etməkdə davam edir və infeksiyaya yoluxanların sayı rekord sayda artaraq epidemik vəziyyəti gərginləşdirir.
Eyni zamanda, payız və qış fəsillərində mövsümi qrip və digər tənəffüs yolları infeksiyalarının sayının artması da müşahidə edilir. Buna görə də bir çox ölkədə virusun yayılmasının qarşısını almaq üçün ciddi tədbirlər həyata keçirilir, tətbiq olunmuş karantin rejimi sərtləşdirilir.
Dünyada olduğu kimi, ölkəmizdə də son dövrlər koronavirusa yoluxma sayı artıb. Sanitar-epidemioloji vəziyyətin təhlilinə əsasən, Nazirlər Kabineti ölkə ərazisində xüsusi karantin rejiminin müddətini dekabrın 1-dək uzadıb. Bütün təhsil pillələri üzrə tədrisin distant təşkilinə başlanıb. Bu qərar dekabrın 1-dək qüvvədədir, amma o da istisna edilmir ki, epidemioloji vəziyyət bu cür olacağı təqdirdə göstərilən müddət uzadıla da bilər.
Qeyd etdiyimiz kimi, son zamanlar koronavirusa yoluxma sürətlə artır.
Azərbaycanda 1 gündə koronavirusa yoluxanların sayı 2000-i keçib. 15 noyabr tarixində 2259 nəfərin koronavirus infeksiyasına yoluxması faktı qeydə alınıb, 1 101 nəfər müalicə olunaraq sağalıb və evə buraxılıb.
Yoluxma sayının 2000-i keçməsi ilə bağlı olaraq mütəxəssislər və aidiyyəti qurumlar həyəcan təbili çalırlar.
“İnsanların kütləvi toplaşması virusa yoluxma sayının artmasına gətirib çıxaran amildir”
Professor, həkim-ekspert Adil Qeybulla qeyd etdi ki, işğal altında olan torpaqlar geri alınandan sonra ölkədə müxtəlif formatda zəfər yürüşləri keçirildi: “Təbii ki, bu yürüşlər koronavirusa yoluxma sayına təsirsiz ötüşməyəcək. Əlbəttə, yoluxma sayı artdıqca, hətta səhiyyəsi inkişaf etmiş ölkələrdə də problemlər ortaya çıxır. Ona görə də çalışmalıyıq ki, virusa yoluxma sayı artmasın".
Həmsöhbətimiz onu da əlavə etdi ki, ağır xəstələr xəstəxanada, virusu yüngül keçirənlər isə ev şəraitində müalicə alırlar. Amma nəzərə almaq lazımdır ki, virusa yoluxma sayının artması fonunda ağır xəstələrin də sayı arta bilər. Bu isə xəstəxanalarda, reanimasiyalarda yer çatışmazlığına səbəb olacaq. Nəzərə almaq lazımdır ki, hazırda ölkəmizdə hərbi vəziyyət hökm sürür: “Çalışmaq lazımdır ki, bu say artmasın. Amma bir neçə gündür insanların kütləvi toplaşması müşahidə olunur. Bu isə sözsüz ki, virusa yoluxma sayının artmasına gətirib çıxaran amildir. Ona görə də bizim səhiyyəmiz nə qədər hazırlıqlı olsa da, virusa yoluxma sayının artması ağır nəticələrə səbəb ola bilər".
Mütəxəssislərin də həyəcan təbili çaldığı kimi, qarşıdan gələn soyuq dövr bizə pandemiya ilə bağlı heç də ürəkaçan proqnozlar vəd etmir. Amma gözlənilən təhlükədən qorunmağın yolları da bəllidir. Hamı xüsusi karantin rejiminin qaydalarına riayət etməli, maska taxmalı, şəxsi gigiyenasını gözləməlidir. Heç kim məsuliyyət hissini unutmamalıdır.
Günel CƏLİLOVA
