Yeganə Hacıyeva: "Həm ixracatımıza kömək edəcək, həm də yeni texnologiyaların əldə edilməsinə yardımçı olacaq"
Azərbaycan və Polşa prezidentləri İlham Əliyev və Andjey Duda iyunun 27-də Varşavada danışıqlar başa çatdıqdan sonra iki ölkə arasında strateji tərəfdaşlıq və iqtisadi əməkdaşlıq üzrə yol xəritəsi haqqında birgə bəyannamə imzalayıb. Bu barədə Azərbaycan dövlət başçısının rəsmi saytı məlumat yayıb.
Bundan başqa, iki ölkə hökuməti arasında 30 mart 2005-ci ildə Varşavada imzalanmış Müdafiə Sənayesi Sahəsində Əməkdaşlıq haqqında Sazişə dəyişikliklər edilməsi haqqında protokolu Azərbaycanın xarici işlər naziri Elmar Məmmədyarov və Polşanın müdafiə nazirinin müavini Tomaş Ştatlovski imzalayıb.
Mühüm sahəni əhatə edən və 2005-ci ildə imzalanan sazişə dəyişikliyin edilməsi zərurəti nədən qaynaqlanıb?
Politoloq Yeganə Hacıyeva qəzetimizə bildirdi ki, Azərbaycanla Polşa arasındakı münasibətlər uzun illərə əsaslanır: "Polşa keçmiş sosialist lagerinə aid edilən ölkə olsa da, hazırda Avropa İttifaqında mühüm çəkiyə malikdir. İqtisadiyyatı güclü inkişaf edir, demokratik təsisatlar üçün münbit şərait var. Hətta mən deyərdim ki, bu cür məsələlərə görə bir çox Avropa ölkələrini arxada qoyub. Ölkə başçısının ora etdiyi səfərə böyük diqqət vardı. İmzalanan sənədlər haqda mediaya verilən məlumatlardan da göründü ki, strateji, iqtisadi əməkdaşlığımız çoxşaxəlidir. Müdafiə sənayesi sahəsində əməkdaşlığa gəldikdə isə, görünür ki, belə bir razılaşma 2005-ci ildə olub. Həmin vaxtdan bəri çoxlu dəyişiklik həyata keçirilib. Buna görə də protokol və sazişlərə dəyişikliklərin edilməsi zəruri və vacibdir. Çünki 12 il az müddət deyil. Bilirsiniz ki, bu müddət ərzində Azərbaycanın müdafiə sənayesi güclü inkişaf edib. Hətta Azərbaycanın öz istehsalı olan çoxlu adda belə təyinatlı məhsul ixrac etməsi dünyada ciddi rezonans doğurub. Hesab edirəm ki, 2005-ci ildə imzalanan sənədə yeni dəyişikliklərin edilməsi yalnız yaxşı məqsədlərə xidmət edir. Hesab edirəm ki, bu təkmilləşdirmə ölkələrimiz arasında mühüm sahə üzrə əməkdaşlığı daha da genişləndirəcək. Azərbaycanın rəsmi Varşava ilə deyilən sahə üzrə əməkdaşlığı genişləndirməsi bizim digər Avropa ölkələrilə də əlaqələrimizin qurulmasına müsbət impuls verəcək. Hesab edirəm ki, Azərbaycan üçün bu sahədə əməkdaşlığın genişləndirilməsi olduqca əhəmiyyətlidir. Həm ixracatımıza kömək edəcək, həm də yeni texnologiyaların əldə edilməsinə yardımçı olacaq".
Məhəmmədəli QƏRİBLİ