Terroru dövlət siyasəti səviyyəsinə yüksəldən Ermənistanın PKK təşkilatı ilə də sıx əlaqədə olduğu heç kimə sirr deyil. Son dövrlərdə tərəflər arasında işbirliyinin daha da dərinləşdiyi məlum haldır. Hətta bu günlərdə Türkiyədə fəaliyyət göstərən Əsassız Erməni İddialarına qarşı Mübarizə Dərnəyinin (ASİMDER) rəhbəri Göksel Gülbey növbəti dəfə Ermənistanın bu terror təşkilatı ilə işbirliyinə dair sensasion iddia irəli sürmüşdü.
Xatırladaq ki, həmin iddiasında Göksel Gülbey Ermənistanın işğal etdiyi Qarabağda 12 PKK düşərgəsi yaratdığını və həmin düşərgələrdə 1750 PKK yaraqlısı yerləşdirildiyini bildirirdi.
ASİMDER rəhbəri deyirdi ki, erməni gənclər artıq işğal altındakı Azərbaycan ərazilərində hərbi xidmət keçmək və ölmək istəmir. Nəticədə Avropaya və Rusiyaya qaçıb gedirlər: "Etibarlı mənbələrdən əldə etdiyimiz məlumata görə, Ermənistan İranda qeyri-leqal yaşayan əfqan mühacirlərə gözünü dikib. Ermənistan maddi sıxıntı içərisində yaşayan əfqan mühacirlərin və PKK-çıların içərisindən özünə muzdlu əsgərlər tutur. Son günlərdə 400-ə qədər PKK-çı Ermənistana gəlib. Azərbaycanın ölü olaraq ələ keçirdiyi uniformalı 12 cəsəd var. Üzərlərində erməni uniforması var, amma Ermənistan bunları qəbul etmir. Bax bunlar PKK-dan gələn muzdlu əsgərlərdir".
Son məlumatlar ASİMDER rəhbərinin dediklərinin əslində sırf həqiqətə söykəndiyini göstərir. Belə ki, onun söylədiklərinin ardınca İranın təhlükəsizlik qüvvələri Cənubi Azərbaycanın Xudafərin ərazisindən işğal altındakı Dağlıq Qarabağa keçmək istəyən PKK-nın 8 terrorçusunu tutub. Terrorçuların üzərində külli miqdara silah-sursat olub. Xudafərinin İbrahim Səmi kəndi ətrafında tutulan terrorçular Araz çayından Ermənistan silahlı qüvvələrinin işğalı altında olan Dağlıq Qarabağ ərazisinə keçmək və erməni terrorçularına qoşulmaq istəyiblər. Terrorçular İranın Kəşfiyyat Nazirliyinə (ETELAAT) təhvil verilib. Bu faktın özü bir daha ermənilərin PKK terrorçular ilə sıx işbirliyində olduğunu aydın surətdə nümayiş etdirir. Əslində, bundan qardaş Türkiyə də xəbərdardır. Elə bu səbəbdəndir ki, Türkiyə erməni ərazisindən PKK terrorçularının ərazisinə keçişinin qarşısını almaq üçün bu ölkə ilə də sərhəd boyu divar çəkməyi düşünür. Ümumiyyətlə, Türkiyə Suriya ilə sərhəddə "təhlükəsizlik divarları"nın tikintisindən sonra Ermənistan və İranla sərhəddə də eyni layihəni həyata keçirmək niyyətindədir.
Xatırladaq ki, bu ilin yanvar ayında Müdafiə və Maliyyə nazirliklərinin birgə təşəbbüsü ilə Ermənistanla sərhəddə "təhlükəsizlk divarları"nın tikintisi layihəsi hazırlanıb. Layihəyə əsasən, divarlar Qars, İğdır və Ardahan bölgələrində inşa ediləcək. Buna səbəb PKK terror təşkilatı ilə mübarizədir. Belə ki, PKK-nın bəzi bazaları İran-Türkiyə sərhədində yerləşir. Türkiyəyə hücum edən terrorçular məhz həmin bazalara qayıdır. Bununla yanaşı, həmin bazalarda hazırlanan terrorçular Ermənistanla sərhəddə yerləşən Ağrı dağındakı hücumları da həyata keçirirlər. Divarların tikilməsi terrorla mübarizə çərçivəsində həyata keçirilir.
Hələlik isə proseslər göstərir ki, PKK terrorçularının Ermənistanda rahat şəkildə fəaliyyyəti üçün İrəvan onlara hərtərəfli şərait yaradır. Bu fonda Ermənistan hakimiyyətinin dəstəyilə bu ölkəyə gələn terrorçular Azərbaycanın işğal olunmuş bölgələrində təlim keçir. Ekspertlər hesab edir ki, dünya gücləri buna qarşı artıq real mübarizəyə start verməlidir. Əks halda terror təhlükəsi dünya üçün böyüyəcək. Əslində, artıq ABŞ, Avropa bu təhlükəni öz üzərində gedərək daha çox hiss edir. Hətta Avropa İttifaqının Polis Xidməti - Avropol Avropada yeni terror aktlarının törədilə biləcəyinə dair xəbərdarlıq edib. Qurumun direktoru Rob Ueynrayt bildirib ki, Avropada terror təhlükəsi son 20 ildə ən yüksək həddə çatıb və əldə edilən məlumatlar bu təhlükənin getdikcə artacağına işarə edir. Uenrayt qeyd edib ki, təkcə ötən il Avropa ölkələrində 718 nəfər radikal dini qruplarla əlaqəsinə görə həbs olunub. O, Brüssel, Paris və London kimi şəhərlərdə baş vermiş terror aktlarını nəzərə alaraq, bütün Avropa ölkələrində çevik antiterror qüvvələrinin yaradılmasına çağırış edib. Eyni zamanda, terrorda şübhəli bilinən şəxslərin daha effektli şəkildə nəzarətə götürülməsi və izlənməsi məqsədilə təhqiqatçılara onlayn kommunikasiya xidmətlərinə nəzarət də daxil olmaqla geniş səlahiyyətlərin verilməsi tələb olunub.
Ekspertlər isə vurğulayır ki, terrorun kökünü kəsmək üçün onunla hər yerdə fərq qoymadan mübarizə aparılmalıdır. Yəni bu sıraya Qarabağdakı erməni terrorçuları da daxil edilməlidir. Yalnız bu halda terrora qarşı mübarizədə səmərəli nəticələr əldə etmək olar.
Tahir TAĞIYEV