Əli Orucov: "Avropa ölkələrində işğal olunmuş ərazilərlə bağlı polemikalar mütəmadi hal alsaydı və bu, müxtəlif təzyiq formalarında..."
Ermənistan prezidenti Serj Sarkisyan Brüsselə səfər edib. Sarkisyan Avropa Xalq Partiyasının sammitində iştirak etmək üçün Belçikaya gedib. Səfəri çərçivəsində bir sıra Avropa İttifaqı rəsmiləri ilə görüşlər keçirib. Eyni zamanda, görüşlər çərçivəsində, həmişə olduğu kimi, Azərbaycan barəsində qərəzli, heç bir həqiqətə uyğun olmayan fikirlər səsləndirib.
Bütün bunlarla yanaşı, Sarkisyan "Cənubi Qafqazda stabillik və təhlükəsizlik" mövzusunda geniş məruzə ilə çıxış edib. Burada diqqətçəkən məqam ondan ibarətdir ki, Sarkisyanın məruzəsini avropalılar sükutla izləyib. Halbuki, reallıq ondan ibarətdir ki, bu gün Cənubi Qafqazda stabillik və təhlükəsizliyin təhdid mənbəyi məhz Ermənistandır. Ona görə ki, adıçəkilən ölkə beynəlxalq hüquqla Azərbaycanın tanınan ərazilərinin 20 faizini işğal edib. Nəticədə yaşayış məntəqələri yer üzündən silinib, 1 milyonadək insan məcburi köçkün həyatını yaşayır. İşğal olunan ərazilərlə bağlı BMT-nin 4 qətnaməsini, digər beynəlxalq qurumların qəbul etdiyi qərarları məhz Ermənistan icra etmir. Bunu Avropadakı siyasilər, ictimai xadimlər yaxşı bilir. Ancaq maraqlıdır ki, Sarkisyan məruzə edərkən, nədənsə, ona bu yöndə nə hansısa sual ünvanlanıb, nə də bunun ətrafında polemika aparılıb. Bütövlükdə, bu nəyin göstəricisidir? Məsələyə münasibət bildirən AMİP Siyasi Şurasının üzvü Əli Orucov bunu Avropanın göstərdiyi biganəliklə əlaqələndirib: "Təəssüflər olsun ki, Avropa ölkələrinin Ermənistanın sərgilədiyi işğalçılıq siyasətinə illərdir göstərdiyi biganə yanaşma bu dövlətlərin ictimaiyyətlərindən də yan keçmir. Nəticədə Ermənistan rəsmilərinin səfərləri zamanı bu kimi məqamlar diqqətdən yayınır. Daha doğrusu, bunu görmək istəmirlər. Əlbəttə, Avropa ölkələrinin bu yöndə göstərdiyi passivlik qəbul edilən deyil. Ancaq nə yazıq ki, mövcud reallıqlar bundan ibarətdir. Halbuki, Avropa ölkələrində işğal olunmuş ərazilərlə bağlı polemikalar mütəmadi hal alsaydı və bu, müxtəlif təzyiq formalarında özünü göstərsəydi, ermənilərin həyasızlığı bu dərəcədə əndazəni aşmazdı. Bu olmadığına görə işğal amili bu qədər uzanıb. Nə qədər ki, Avropa dövlətlərinin bu yöndə ədalətli, konkret mövqeyi ortada yoxdur və Ermənistan hansısa formada cəzalandırılmayıb, belə xoşagəlməz halların çox şahidi olacağıq. Ona görə də Avropa İttifaqı bu məsələdə ortaya konkret mövqe qoymalıdır".
Vidadi ORDAHALLI