Yeganə Hacıyeva: "Sübut olunur ki, xalq bu rejimdən canını qurtarmağın yolunu silahlı üsyanda görür"
Ermənistanda ötən ilin iyul ayında polis alayının binasını ələ keçirmiş "Sasna Tsrer" silahlı qruplaşmasının işi üzrə məhkəmədə qalmaqallı çağırış səslənib. Erməni KİV-inin verdiyi məlumata görə, qrupun üzvü Varujan Avetisyan silahlı üsyana və prezident Serj Sarkisyanı fiziki məhv etməyə çağırıb. "Mən üsyana çağırıram, silah götürün və Serji, onun bandasını fiziki məhv edin" - Avetisyan İrəvanın Nor Nork inzibati rayon məhkəməsində keçirilən proses zamanı çağırış edib.
Məhkəmə prosesi kifayət qədər gərgin keçir və tez-tez zalda qarşıdurmalar yaranır. Proses zamanı qrup üzvlərinin vəkilləri hakimin qanunsuz hərəkətlərinə etiraz edib. Bu vaxt V.Avetisyan da silahlı üsyana çağırış edib və hakim onun prosesdən kənarlaşdırılmasına dair qərar verib. Fasilədən sonra onu yenidən zala qaytarıblar.
Xatırladaq ki, "Sasna Tsrer" qruplaşmasının silahlı üsyan başladaraq İrəvanda polis alayının binasını ələ keçirməsi ötən ilin aprelində Qarabağda gedən döyüşlərin Ermənistanda yaratdığı siyasi təlatümlərin nəticəsi idi. Qrup üzvləri bunu bəhanə edirdi ki, Ermənistan hakimiyyəti hərbi məğlubiyyətə uğrayandan sonra ərazilərin qaytarılmasına dair danışıqlar aparır. Qarabağ müharibəsi veteranlarından ibarət olan "Sasna Tsrer" qruplaşmasının başlatdığı üsyan həftələrlə davam etdi və bir neçə nəfərin həlak olması, çoxsaylı həbslərlə nəticələndi.
Ermənistanda belə çağırışların ortaya çıxması nəyin göstəricisi sayıla bilər?
Politoloq Yeganə Hacıyeva qəzetimizə bildirdi ki, bu fakt Ermənistanda vəziyyətin necə olduğunu aydın büruzə vermiş olur: "Təsəvvür edin ki, siyasi motivli bir məhkəmədə belə bəyanat səslənir. Öncə həmin adamların kimliyinə diqqət edək. Onlar ötən il öz siyasi tələblərini yerinə yetirmək üçün silahlı qrup halında polis bölməsinə daxil olaraq oradakı insanları girov götürmüşdü. Bu addımın atılması sübut edir ki, Ermənistanda bütün demokratik təsisatlar sıradan çıxarılıb, azad seçki yolu ilə xalq öz iradəsini ifadə edə bilmir. Korrupsiya, qohumbazlıq baş alıb gedir. Mövcud rejim ölkə əhalisini öz ambisiyalarına görə ac vəziyyətdə saxlayır. Bütün nəfəsliklər bağlandığı üçün, hazırda Ermənistan cəmiyyəti doymuş buxar halına gəlib. Bu da partlayışa gətirib çıxara biləcək bir vəziyyətdir. Artıq onun simptomları görünür. Belə çağırışların mətni Ermənistan mətbuatında yayılırsa, əminliklə demək olar ki, yaxın gələcəkdə orada silahlı konflikt yarana bilər. Belə bəyanatlar Ermənistandakı mövcud vəziyyətin necə olduğunu və orada dövlət adında bir cinayətkar rejimin olmasını açıb ortaya qoyur. Sübut olunur ki, xalq bu rejimdən canını qurtarmağın yolunu silahlı üsyanda görür".
Məhəmmədəli QƏRİBLİ