Son hadisələr Ermənistanda mövcud hakimiyyətdən narazılığın gedərək artmaqda olduğunu, Serj Sarkisyan iqtidarından narazıların sayının daha da çoxaldığını göstərir. Hətta bu xüsusda indi çağırışlar səslənir ki, silah gücünə olsa belə, mövcud hakimiyyət mütləq şəkildə devrilməlidir. Bu məsələ "Sasna Tsrer" silahlı qruplaşmasının işi üzrə məhkəmədə növbəti dəfə qaldırılıb. Belə ki, qrupun lideri Varujan Avetisyan silahlı üsyana və prezident Serj Sarkisyanın fiziki məhvinə çağırıb. İrəvanın Nor Nork inzibati rayon məhkəməsində keçirilən proses zamanı o bildirib: "Mən üsyana çağırıram, silah götürün və Serji, onun bandasını fiziki məhv edin".
Xatırladaq ki, ötən il iyulun 17-dən "Sasna Tsrer" qruplaşmasının üzvləri "Müəssislər məclisi" adlı radikal müxalif hərəkatının lideri Jirayr Səfilyanın azadlığa buraxılması və prezident Serj Sarkisyan hakimiyyətinin istefası tələbilə İrəvanda polis keşikçi-patrul xidməti alayını ələ keçirmişdi. Səfilyan isə həmin vaxt "qanunsuz silah-sursat saxlamaq, bir qrup şəxslə İrəvanda inzibati binalar və televiziya qülləsinin ələ keçirilməsini planlaşdırmaq" ittihamı ilə həbs edilmişdi. Buna etiraz edən "Sasna Tsrer" qruplaşmasının üzvləri alayı ələ keçirdilər və hətta bir neçə polisi də qətlə yetirdilər. Ardınca hökumət qüvvələri tərəfindən keşikçi-patrul xidməti mühasirəyə alındı. Lakin əhali "Sasna Tsrer" qruplaşmasının üzvlərinin yanında olduğunu bəyan etdi və bu fonda keşikçi-patrul xidməti alayının yanında hər gün kütləvi aksiyalar keçirilirdi. Aksiyalar polis qüvvələri ilə toqquşmalarla müşayiət olunurdu, onlarla insan xəsarət almış, kütləvi iğtişaşlar faktı üzrə cinayət işləri açılmışdı. Jurnalist sorğularına görə, həmin günlər hətta aksiyalarda iştirak etməyən Ermənistan sakinlərinin əksəriyyəti "Sasna Tsrer"i dəstəkləyirdi. Mitinqdə çıxış edənlər silahlı dəstə üzvlərinin bu "ümidsiz addımı" atmağa məcbur olduğunu bildirirdilər. İzdiham silahlı dəstə üzvlərini "qəhrəman" adlandırırdı. İki həftə sonra dəstə silahı yerə qoyub hakimiyyətə təslim olduğunu bəyan etdi. Dəstənin lideri Varujan Avetisyan rejimlə mübarizəni hərbi əsir qismində davam edəcəklərini bildirdi: "Bizim missiyamız başa çatmayıb. Bizim üçün başlıcası xalqı ayağa qaldırmaq idi. Bir qədər ləng də olsa, xalq hərəkətə gəldi". Hazırda gedən cinayət işi üzrə 62 nəfər məsuliyyətə cəlb olunub. Onlardan 44 nəfəri barəsində həbs cəza tədbiri seçilib, 13 nəfər ölkəni tərk etməmək haqqında iltizam verib, üç nəfər girovla azadlığa buraxılıb, iki nəfər barəsində axtarış elan edilib.
İndinin özündə də məhkəməsi gedən qruplaşma üzvləri əhali tərəfindən dəstəklənir. Bu mənada hesab edilir ki, Varujan Avetisyanın silahlı üsyana çağırışı da cavabsız qalmayacaq və Ermənistanda vəziyyətin qarışmasını hər an gözləmək olar. Onsuz da "Sasna Tsrer" qruplaşmasının məhkəmə prosesi kifayət qədər gərgin keçir. İndi istisna deyil ki, bu gərginlik Varujan Avetisyanın çağırışlarından sonra daha da artsın. Eyni zamanda, Avetisyanın dediyi kimi, ölkədə silahlı üsyanın olması da tam gözləniləndir. Özü də Sarkisyana qarşı silahlı üsyana təkcə Avetisyan çağırmır. Bundan əvvəl həbs edilən qondarma "DQR"in keçmiş "müdafiə naziri" Samvel Babayan da eyni mövqedədir. Xatırladaq ki, Ermənistan Milli Təhlükəsizlik Xidməti Samvel Babayanı Gürcüstandan ölkə ərazisinə "İqla" daşınan zenit-raket qurğusunun gətirilməsi işi üzrə həbs edib. Erməni mediası yazır ki, əslində Samvel Babayanı həbs etməklə hakimiyyət özü üçün təhlükə saydığı fiqurlardan birini neytrallaşdırıb. "Aykakan Jamanak" qəzeti iddia edir ki, Samvel Babayan ölkədə silahlı üsyan törədilməsinə ciddi surətdə hazırlaşıb: "Samvel Babayan geniş etiraz aksiyaları ilə silahlı üsyan təşkil etməyə hazırlıq görüb. Bununla o, "Sasna Tsrer"in təkrarı olan silahlı qruplaşmanın yeni formasını yaratmağı da düşünüb. "Sasna Tsrer"in təkrarlanmasına yalnız İrəvanda deyil, Ermənistanın müxtəlif bölgələrində də cəhd olunması nəzərdə tutulub". İddia edilir ki, indinin özündə də hakimiyyətə qarşı silahlı üsyan fikirlərinə son qoyulmayıb və Ermənistan hər an qarışa bilər. Hadisələrin inkişaf axarı göstərir ki, yeni olaylar Ermənistan üçün o qədər də asan olmayacaq. Hakimiyyət isə bu və digər etirazların qarşısını güc yolu ilə almağa çalışır. Lakin bunun özü də vəziyyətin daha gərgin xarakter almasına rəvac verə bilər. Ümumiyyətlə, ekspertlər yaxın tezlikdə Ermənistanda yeni vətəndaş müharibəsinin başlana biləcəyini istisna etmir.
Tahir TAĞIYEV