Üzeyir Cəfərov: "Bununla da sübut olunur ki, son günlər atəşkəsin pozulmasında maraqlı tərəf məhz Ermənistan olub"
Ötən həftə cəbhədə təxribatlara əl atan düşmən tərəfi ciddi itkilərə məruz qalıb. 16 və 17 iyun tarixlərində Ermənistan ordusunun 6 hərbi qulluqçusu məhv edilib. Hətta Qarabağda məhv edilən erməni əsgərlərin adları da açıqlanıb:
Arayik Rudik Matinyan Vigen Jirayr Petrosyan Vardan Tsovak Sarkisyan Myasnik Martin Ovannisyan Vardan Armen Harutyunyan Narek Tiqran Qasparyan
Qarşıdurma xəttində baş verən toqquşmalar zamanı bir neçə erməni əsgəri isə ağır güllə yarası alıb. Yaralı hərbçilər yerli hospitallara yerləşdirilib.
Ermənistanın Müdafiə Nazirliyi yaralıların sayını və adlarını indiyədək açıqlamayıb. Erməni KİV-lərində yer alan xəbərə görə, Yuri Zakaryan Qarabağdakı döyüşlərdə yaralanıb. O, ölümcül vəziyyətdə Xankəndidən İrəvan hospitalına köçürülüb. Digər yaralılardan isə xəbər yoxdur.
İyunun 20-də axşam saatlarında Ermənistan silahlı qüvvələrinin kəşfiyyat-təxribat qrupu qoşunların təmas xəttində müdafiə xəttini keçməyə cəhd göstərib.
Müdafiə Nazirliyindən verilən məlumata görə, bölmələrimiz tərəfindən aşkar edilən düşmənə qarşı görülən qabaqlayıcı tədbirlər nəticəsində kəşfiyyat qrupu itki verərək geri çəkilməyə məcbur edilib.
Təxribat qrupunun bir üzvü ələ keçirilib.
Göründüyü kimi, fakt olaraq Ermənistanın təxribat qrupunun bir üzvü ələ keçirilib. Bununla da sübut edilir ki, son günlər Ermənistanın atəşkəsin pozulmasını üzərindən ataraq, belə hərəkətlərdə Azərbaycanı günahlandırması ilə bağlı yürütdüyü siyasət tam iflasa uğramış olur.
Hərbi ekspert Üzeyir Cəfərovun sözlərinə görə, əslində baş verən hadisə, demək olar ki, ermənilərin iç üzünü göstərir:
"Çünki onlar həm danışıqlar prosesində iştirak edir, həm də Azərbaycanın işğal olunmuş ərazilərində təxribat xarakterli hərəkətlər həyata keçirirlər. Bu dəfə isə əsgərlərimizin ayıq-sayıqlığı onları çox pərt edib. Onlar onsuz da ardıcıl uğursuzluqlardan sonra çox əsəbi idilər. Son günlər verdikləri itkilərin, yaralıların sayının çox olmasına görə Ermənistanda psixoz vəziyyət yaranıb. Üstəgəl erməni kəşfiyyatçısının da ələ keçməsi onu deməyə əsas verir ki, Azərbaycan beynəlxalq qurumlar qarşısında konkret məsələ qoymalıdır ki, Ermənistanın beynəlxalq hüquq və normalara münasibəti əslində budur və ona qarşı konkret tədbirlər görülməli, təzyiq edilməlidir. Hamı gözəl bilir ki, Ermənistan və beynəlxalq hüquq normaları ayrı-ayrı məfhumlardır. Əslində ermənilər çoxdan işğal etdikləri əraziləri tərk edib getməli idilər, amma bu günədək xislətlərindən əl çəkmirlər, üstəlik təxribatlar da törədirlər. Ermənilər bu cür təxribatları bundan sonra da davam etdirəcəklər. Bu dəfə bəxtləri gətirməyib. Çünki həm əsəbi, həm də çaşqın vəziyyətdədirlər. Bu faktın özü və Silahlı Qüvvələr Günü öncəsi düşməni belə məyus, pərt etməsi Ordumuz üçün böyük stimuldur. Azərbaycan əsgərinə bir daha eşq olsun. Bununla da sübut olunur ki, son günlər atəşkəsin pozulmasında maraqlı tərəf məhz Ermənistan olub".
Məhəmmədəli QƏRİBLİ