Arzuxan Əlizadə: "Artıq heç bir qüvvə bu layihənin qarşısını ala bilməz"
Məlum olduğu kimi, müxtəlif səbəblərdən Bakı-Tiflis-Qars dəmir yolunun açılışı bir neçə il yubandı. Ancaq aparılan işlərin nəticəsi onu deməyə əsas verir ki, dəmir yolunun açılışına çox az qalıb. Çünki bununla bağlı Türkiyədə görülən işlər artıq yekunlaşıb.
Ancaq həmişə olduğu kimi, bu məsələyə də erməni mətbuatı özünəməxsus don geyindirməyə çalışır. Erməni mətbuatı hazırda layihənin inşası ilə bağlı yubanmanı tam fərqli formada təqdim etməyə cəhd göstərərək, bu layihənin ümumiyyətlə baş tutmayacağı fikrini ictimai rəyə sırımağa çalışır. Ermənistan mətbuatının yazdığına görə, guya Türkiyə bilərəkdən dəmir yolunun açılışını yubadır. Onlar bunu onunla əlaqələndirməyə çalışırlar ki, Ermənistan dəmir yolu Gürcüstanın dəmir yolu ilə birləşdiyi üçün onlar da bu yoldan istiifadə etmək imkanı əldə edəcəklər. Guya bunu əngəlləməkdən ötrü dəmir yolunun açılışı yubadılır və Türkiyə öz tərəfdaşları ilə açıq qarşıdurmaya getməməkdən ötrü bunu edir. Onların təbirincə, dəmir yolları birləşdiyi üçün ermənilər də Türkiyə və Azərbaycana bu şəbəkədən istifadə etməyə görə məhdudiyyət qoya bilər. Həmçinin qeyd edirlər ki, Ermənistan dəmir yolları Rusiyanın idarəçiliyinə verilib.
Bu arada Türkiyənin nəqliyyat və kommunikasiya naziri Əhməd Arslan mətbuata açıqlamasında bildirib ki, Bakı-Tiflis-Qars dəmir yolu bu ilin avqustunda tam gücü ilə istismara veriləcək. Nazir deyib ki, Türkiyə öz ərazisində bu layihənin inşasını tam olaraq yerinə yetirib, lakin yolun Gürcüstan ərazisindən keçən hissəsində torpaq sürüşməsi baş verdiyindən, dəmir yolunun inşasında problem yaranıb.
Məsələyə münasibət bildirən AMİP-in baş katibi Arzuxan Əlizadənin sözlərinə görə, bu, ermənilərin daha bir qərəzli təbliğat kampaniyasıdır: "Sözügedən dəmir yolunun yubanmasının başlıca səbəbi 2008-ci ildə Rusiya ilə Gürcüstan aprasında yaşanan müharibə oldu. Halbuki, işlər yolunda ketsəydi, BTQ 2011-ci ildə istismara veriləcəkdi. Müəyyən obyektiv və subyektiv səbəblər üzündən layihənin reallaşması yubandı. Türkiyənin Ermənistanla sərhədləri bağlı olduğu üçün bu ölkə ilə heç bir əlaqəsi yoxdur. Ancaq bu heç də ona əsas vermir ki, arada üçüncü ölkə olduğuna görə Ermənistan BTQ-dən istifadə edə bilər. Təbii ki, bu mümkün olan iş deyil. Dəmir yolu şəbəkəsi nə qədər mürəkkəb olsa da, Ermənistanın ondan istifadə etməsindən söhbət gedə bilməz. Nəzərə almalıyıq ki, Rusiya ilə Gürcüstan arasında dəmir yolu əlaqəsi yoxdur. Rusiyadan Ermənistana gələn dəmir yolu Abxasiyadan keçdiyi üçün həmin yol bağlıdır. O baxımdan erməni mətbuatının BTQ ilə bağlı səsləndirdiyi fikirlər cəfəngiyatdır. Başqa bir tərəfdən, artıq heç bir qüvvə bu layihənin qarşısını ala bilməz".
Vidadi ORDAHALLI