Ramiz Tağıyev: "Onlar ölkənin daxilində olan etnik qruplarla bağlı humanist siyasətə start verməlidir"
ABŞ-ın dövlət katibi Reks Tillerson ölkəsinin strategiyasının İranda hakimiyyət dəyişikliyi üçün ölkə daxilindəki rejim əleyhdarı qüvvələri dəstəkləməkdən ibarət olduğunu bildirib. İranın Xarici İşlər Nazirliyinin rəsmi nümayəndəsi Bəhram Qasımi həmin bəyanata sərt reaksiya verib. "ABŞ-ın uzun müddətdir davam edən anti-İran siyasəti yararsızdır. Bu siyasət İran xalqında ABŞ-a nifrəti artırır", - deyə o bildirib.
Qeyd edək ki, İranın dini lideri Əli Xamneyi hərbi əməliyyatlarda həyatını itirənlərin ailələri ilə görüşdə ABŞ rəhbərlərinə qarşı təhqir dolu sərt bəyanatlar səsləndirib: "Bu inqilab yarandığı gündən cürbəcür düşmənçiliklərlə üz-üzə qalıb. Amerikada yenicə iş başına gələn bu cənabların boşboğazlığına fikir verməyin. Bu təhdidlər bizim üçün təzə bir şey deyil. Bizə qarşı bu hədə-qorxular əvvəllər də olub. Sadəcə olaraq indi onların bir az dili və tonu dəyişib. Yoxsa qırx ilə yaxındır bunlar heç bir qələt edə bilməyiblər və bundan sonra da edə bilməyəcəklər.
Deyirlər ki, islam respublikası rejimini dəyişmək istəyirik. Sizlər İran millətini hələ tanımamısınız. Amerikada təzəcə iş başına gələn bu şəxslər kriminal aləminə yenicə daxil olan, üstlərində bıçaq gəzdirən təcrübəsiz naşı xuliqanlara bənzəyir. Onlar nə etdiklərini qanmır. Lakin elə ki, ağızlarından vurdun, onda hesab-kitab əllərinə gələr".
Tillerson strategiyalarının İranda hakimiyyət dəyişikliyi üçün ölkə daxilindəki rejim əleyhdarı qüvvələri dəstəkləməkdən ibarət olduğunu deməklə hansı qüvvələri nəzərdə tutur?
Siyasətçi Ramiz Tağıyev qəzetimizə açıqlamasında bildirdi ki, ABŞ bu məsələdə İranın daxilində olan etnik qrupları nəzərdə tutur: "Bilirsiniz ki, həmin ölkənin daxilində ən aparıcı etnos Azərbaycan türkləridir. Soydaşlarımız orada milli azlıq deyil, çoxluğu təşkil edir. Fars rejimi onların müəyyən hüquqlarını da əlindən alıb. Ana dilində təhsilə imkan vermirlər. Ancaq buna baxmayaraq, ABŞ-ın məhz etnik azərbaycanlılardan öz məqsədinə çatmaq üçün vasitə kimi istifadə etməsini də təqdir etmirəm. Çünki bunun ziyanı bizim ölkəyə də dəyə bilər. İranın daxilindəki narazılar isə yalnız azərbaycanlılardan ibarət deyil. Düşünürəm ki, ABŞ İranın daxilində də kürd faktorundan yararlana bilər. Görürsünüz ki, İraqda onların dəstəyilə bir kürd dövləti yaranmaq üzrədir. İranda da milyonlarla kürd yaşayır. Yəqin ki, onların da imkanından yararlanmağı düşünürlər. Hesab edirəm ki, bu, İran rejimi üçün ciddi siqnal olmalıdır. Onlar ölkənin daxilində olan etnik qruplarla bağlı humanist siyasətə start verməlidir. Əks halda, bundan maraqlı dövlətlər yararlana bilər".
Məhəmmədəli QƏRİBLİ