Zakir Əhmədov: "Bütün o deyilənlər real olmayan açıqlamalardır"
Ermənistan Azərbaycanın işğal altında olan Madagiz kəndində (Qarabağın şimalı) qanunsuz olaraq kürü istehsalından illik 15-20 ton qara kürü əldə etməyi planlaşdırır.
Erməni mətbuatının məlumatına görə, bunu qondarma rejimin "baş naziri" Arayik Harutyunyan bildirib. Harutyunyan prosesin kürü satışı ilə məşğul olan beynəlxalq şirkət tərəfindən reallaşdırılacağını vurğulayıb.
Məlumat üçün qeyd edək ki, ermənilər sözügedən ərazidə qara kürünün istehsalı üzrə infrastrukturun tikintisinə 2014-cü ildə başlayıb. Tikintinin bütün xərclərini erməni mənşəli isveçrəli sahibkar Vardan Sermakeş öz üzərinə götürüb.
Layihə çərçivəsindən 350-dən çox su hovuzu tikilməsi nəzərdə tutulub. Bu arada separatçı qurum təmsilçiləri bildirib ki, 5-6 il ərzində qara kürü istehsalçısı və ixracatçısı olacaqlar. Onlar iddia edir ki, istehsal etdikləri qara kürü keyfiyyətinə görə dünyanın aparıcı markalarından aşağı deyil. Həttə bir az da irəli gedərək bildiriblər ki, qara kürü ixracına görə Azərbaycanı geridə qoyacaqlar. Adətən qara kürü dənizdə olan nərə balığından əldə edilir. Düzdür, süni hovuzlarda da nərə balığı saxlanır, amma bu çox məhdud səviyyədə olur. Bütün hallarda, ermənilərin bu iddiaları nə dərəcədə reallığa uyğundur?
Məsələyə münasibət bildirən ekspert Zakir Əhmədovun sözlərinə görə, bu, ermənilərin xam xəyalıdır: "O üzdən, bütün bu deyilənlər real görünmür. Məsələ ondadır ki, qara kürünün əsas istehsalçıları Rusiya və İrandır. Kürü istehsalının 10 faizi isə Fransanın payına düşür. Son 15 ildə Xəzər dənizindəki nərəkimilərin sayı 40 dəfə azalıb. Ekoloji fəlakət nəticəsində qara kürünün dünya bazarındakı qiyməti 500 dollardan 5 min dollara qalxıb. Qiymətlərin sürətli artımına əsas səbəb Xəzər dənizi hövzəsində nərəkimilərin ovuna qoyulan qadağadır. Dünya üzrə kürü istesalının 90%-i Xəzər hövzəsinə aiddir. Amma hazırda Avropa ölkələrinə, ABŞ-a və hətta dünya üzrə nərə balıqlarının mərkəzi sayılan Rusiyaya belə İsrail şirkətləri nərə kürüsü satır. İsrail hövzələrində 70 mindən artıq nərə balığı yetişdirilir. İsraildə yetişdirilən bu balıqlar Həştərxan və Xəzər dənizindən gətirilib. Xəzər dənizinin nərə balıqları yalnız 13-15 yaşlarından kürü tökməyə başlayır. Demək ki, İsrailin iqlimi, həmçinin, istifadə olunan bəzi xüsusi texnologiyalar bu müddəti 3-4 il azaldıb. Ermənilərin bununla bağlı nə böyük maliyyəsi var, nə də xüsusi texnologiyası. O baxımdan bütün o deyilənlər real olmayan açıqlamalardır. Qara kürü istehsal etsələr belə, bu çox məhdud həcmdə olacaq".
Vidadi ORDAHALLI