Arzu Nağıyev: "Həmsədrlərin Azərbaycana gəlişi ərəfəsində bizim hansı marağımız ola bilər ki, atəşkəsi pozaq?"
ATƏT-in Minsk Qrupunun həmsədrlərinin Azərbaycana planlaşdırılan səfəri ərəfəsində, Azərbaycan Müdafiə Nazirliyinin məlumat verdiyi kimi, Ermənistan silahlı qüvvələri tərəfindən atəşkəsin ağır silahlardan intensiv şəkildə pozulması və təxribat əməliyyatlarının törədilməsi həyata keçirilib. Bunu XİN-in mətbuat xidmətinin rəhbəri Hikmət Hacıyev cəbhədə vəziyyətin gərginləşməsi ilə əlaqədar şərhində deyib.
Onun sözlərinə görə, 15 iyundan etibarən cəbhədə vəziyyətin inkişaf xronikası açıq şəkildə göstərir ki, atəşkəsin pozulması və təxribatların törədilməsinin təşəbbüskarı məhz Ermənistan tərəfidir: "Bununla Ermənistanın atəşkəsin birinci kimin tərəfindən pozulması barəsində mifik propaqanda iddiaları növbəti dəfə tamamilə alt-üst olur. ATƏT-in Minsk Qrupunun həmsədrləri nəzərə almalıdırlar ki, Ermənistan tərəfindən cəbhədə vəziyyətin gərginləşdirilməsi onların regiona, o cümlədən Azərbaycanın işğal olunmuş ərazilərinə səfərinin ardınca baş verib. Ermənistan qəsdən cəbhədə vəziyyətin gərginləşdirilməsi yolu ilə Ermənistan-Azərbaycan, Dağlıq Qarabağ münaqişəsinin substantiv danışıqlar yolu ilə həllinə imkan verməməyə və işğala əsaslanan mövcud status-kvonu saxlamağa çalışır".
XİN rəsmisi bəyan edib ki, Ermənistan silahlı qüvvələrinin Azərbaycanın işğal olunmuş ərazilərində mövcudluğu atəşkəsin pozulmasının başlıca səbəbidir: "Beynəlxalq hüququn norma və prinsipləri, BMT Təhlükəsizlik Şurasının müvafiq qətnamələri, ATƏT-in Minsk Qrupunun həmsədrlərinin bəyanatları və hazırda danışıqlar masasında olan təkliflər Ermənistan qoşunlarının Azərbaycanın işğal olunmuş ərazilərindən çıxarılmasını tələb edir.
Azərbaycan Silahlı Qüvvələri ölkəmizin suveren ərazilərində fəaliyyət göstərərək Ermənistanın Azərbaycana qarşı təcavüzü fonunda Azərbaycanın ərazilərinin müdafiəsini və xüsusilə təmas xətti boyu yaşayan mülki əhalinin təhlükəsizliyini təmin edir".
H.Hacıyev qeyd edib ki, cəbhədə yaranmış vəziyyətə görə məsuliyyət tam şəkildə Ermənistanın üzərinə düşür.
Ermənilərin məhz həmsədrlərin bölgəyə və xüsusilə də Azərbaycana səfəri ərəfəsində belə addımlar atması nəyə hesablana bilər?
Ekspert Arzu Nağıyevin sözlərinə görə, ATƏT-in Minsk Qrupunun həmsədrləri regionda olarkən düşmən tərəfi hər zaman cəbhədə vəziyyəti gərginləşdirməyə çalışır: "ATƏT-in Minsk Qrupu həmsədrlərinin regiona səfəri ərəfəsində ermənilər tərəfindən aktivləşmə hiss olunur. Onlar göstərməyə çalışır ki, guya sülh, danışıq tərfdarıdırlar, lakin Azərbaycan tərəfi bunu pozur. Amma məlum məsələdir ki, proseslər tam əksinə baş verir. Həmsədrlər Ermənistan prezidenti Serj Sarkisyan və səhra komandirlərindən ibarət komanda ilə görüşüb. Eyni zamanda Xankəndidə qondarma rejimin "rəhbəri" ilə bir araya gəlib. Məhz bu görüşlərin yekunu üzrə materiallar toplandıqdan sonra həmsədrlər Azərbaycana gələcək. Maraqlıdır ki, bu müddətdə atəşkəs rejimi pozulur. Həmsədrlərin Azərbaycana gəlişi ərəfəsində bizim hansı marağımız ola bilər ki, atəşkəsi pozaq? Aydındır ki, atəşkəsin pozulmasında maraqlı tərəf Ermənistandır. Məqsəd odur ki, danışıqlara getməsinlər, status-kvo saxlansın".
A.Nağıyev hesab edir ki, Cocuq Mərcanlıya böyük qayıdışdan sonra ermənilərin cəbhədə aktivləşməsi təsadüfi deyil: "Bu gün Azərbaycan tərəfindən həmin ərazilərə qayıdış başlanıb. Bunun əksi olaraq ermənilər öz ölkələrini tərk edir. Bu bir-birinə zidd məsələlərdir. Təbii ki, ictimaiyyət qarşısında Ermənistan rəhbərliyi cavab vermək üçün bu cür addımlar atır. Hətta iş o yerə çatıb ki, Ermənistan parlamentinin spikeri Dağlıq Qarabağa gedərək separatçılarla görüşüb. Bu məsələlərin, birbaşa olmasa da, dolayı yolla Cocuq Mərcanlıdan başlayan böyük qayıdışla əlaqəsi var. Artıq ictimai fikir, rəy, nə separatçıların, nə də Ermənistan rəhbərliyinin lehinə işləyir. Cəbhədə aktivlik də bununla bağlıdır".
Məhəmmədəli QƏRİBLİ