Elşən Mustafayev: "Vətəndaşlar mətbuat vasitəsilə bildirib ki, onlar öz torpağında rusların əsirinə çevrilib"
Ermənistanın yalnız sözdə müstəqil ölkə olduğu hamıya bəllidir. Artıq vəziyyət o həddə çatıb ki, bəzi başqa ölkələr verdikləri rəsmi bəyanatlarında belə bu faktı gizlətmir. Həmin ölkə 25 illik müstəqilliyini təmtəraqla qeyd etdiyi bir zamanda Rusiya FTX-si Ermənistan sərhədinin qorunmasının 150 illiyini bayram edir.
Bildirilir ki, bu tarix Ermənistanın Rusiyanın tərkibinə qatıldığı dönəmdən indiyə kimi davam edir. Qeyd edilir ki, Ermənistanın Türkiyə ilə 280 km, İranla isə 42 km-lik sərhədi var. Ermənistanda rus sərhədçilərinin qalması 30 sentyabr 1992-ci ildən sonra mümkün olub. Rusiya Federal Təhlükəsizlik Xidmətinin Sərhəd İdarəsinin mətbuat xidmətinin məlumatında deyilir ki, Ermənistanın dövlət sərhədinin mühafizəsi sistemi SSRİ vaxtlarından qalıb: "Rus sərhədçilərinin Türkiyə və İran sərhədində xidməti 1992-ci ildə Rusiyanın Sərhəd Qoşunlarının statusu haqqında dövlətlərarası müqavilə ilə tənzimlənir. Ermənistanda Rusiyanın Federal Təhlükəsizlik Xidmətinin Sərhəd İdarəsinin 4 sərhəd dəstəsi - Gümrü, Armavir, Artaşat və Mehri, həmçinin, "Zvartnos" İrəvan beynəlxalq aeroportunda ayrı nəzarət-buraxılış məntəqəsi fəaliyyə göstərir. Ermənistanda Rusiya sərhədçilərinin (təxminən 4,5 min) saxlanması bərabər şəkildə iki dövlətin hökumətləri tərəfindən təmin olunur. Eyni zamanda Müdafiə Nazirliyinin qoşunları Azərbaycanla sərhədi, Ermənistan Milli Təhlükəsizlik Xidmətinin Sərhəd Qoşunları isə Gürcüstanla sərhədi mühafizə edir.
Erməni siyasi şərhçi Naira Ayrumyan qeyd edir ki, Ermənistan hələ sərhədlərinin mühafizəsini öz üzərinə götürmək niyyətində deyil və əvvəlki kimi, "Rusiya imperiyası"na aid xüsusi xidmət orqanları onları qoruyur". Rusiyanın Federal Təhlükəsizlik Xidməti bununla xüsusi olaraq vurğulayır ki, Ermənistan Rusiyanın bir hissəsidir və Ermənistan buna etiraz etməyə çalışmır.
Ermənistanın sərhədlərinə başqa ölkə nəzarət edirsə, bunun harası müstəqillik oldu?
Ekspert Elşən Mustafayev qəzetimizə bildirdi ki, Ermənistan əhalisi belə bunu dərk edir və açıq söyləyir: "Bu yaxınlarda Gümrüdə yerləşən 102-ci hərbi bazanın texnikaları Ermənistanın Şirak rayonunun Marmaşen kəndinin sakinlərinə məxsus əkin sahələrini yararsız hala saldı. Rus hərbçilərin əkin sahələrindən tank yolu kimi istifadə etməsi yerli sakinlərin etirazına səbəb olub. Onlar şikayətlərində bildirib ki, rus hərbçilər tankları, yük maşınlarını əkin sahələri ilə aparır. Şikayətlərinə baxan yoxdur. Vətəndaşlar mətbuat vasitəsilə bildirib ki, onlar öz torpağında rusların əsirinə çevrilib. Ermənistan hakimiyyəti Rusiyanın ölkə ərazisində hərbi iştirakını genişləndirməklə, ilk növbədə, özünü xarici təhlükələrdən qoruduğu təəssüratını yaradır. İkincisi, erməni ordusu Rusiyadan müasir hərbi texnikanı və silahları havayı alır. Belə ki, buna böyük pullar xərcləmək lazım gələrdi. Rusiya Ermənistanda hökm sürən siyasi və iqtisadi situasiyadan istifadə edərək Cənubi Qafqazda mövqelərini möhkəmləndirir. Çünki Ermənistan Rusiyaya ilk növbədə geosiyasi baxımdan maraqlıdır. Oradan Rusiya müəyyən dərəcədə Türkiyə, Azərbaycan, Gürcüstan və İran üzərində hərbi monitorinq imkanları əldə edir. Təbii ki, bütün bu faktorlar Ermənistanın müstəqil ölkə olmadığını şərtləndirir".
Məhəmmədəli QƏRİBLİ