Fikrət Sadıqov: "Atılan addımlar artıq dərəcədə ziddiyyətlidir və başadüşülən deyil"
Məlum olduğu kimi, Qətər hökuməti ABŞ-la 36 ədəd F-15 qırıcı təyyarəsinin alınmasına dair razılığa gəlib. Məlumata görə, 12 milyard dollarlıq sazişə Pentaqon rəhbəri Ceyms Mettis və Qətər nümayəndələri iyunun 14-də imza atıb. 2016-cı ilin noyabrında ABŞ Dövlət Departamenti Qətərə 72 ədəd F-15 qırıcı təyyarələrin satılması barədə qərar qəbul edib. Razılaşmanın məbləği 21,1 milyard dollar təşkil edib.
Bundan başqa, ABŞ Hərbi Donanmasına məxsus iki döyüş gəmisi Qətər sahillərinə yan alıb. Buna səbəb Doha ilə Vaşinqton arasında Qətər böhranından sonra ilk dəfə birgə təlimlə bağlı razılaşma əldə edilməsidir.
Qeyd edək ki, iyunun 5-də Misir, Səudiyyə Ərəbistanı, Bəhreyn və BƏƏ rəsmi Dohanı terror qruplaşmalarını dəstəkləməkdə və Yaxın Şərqdə vəziyyəti gərginləşdirməkdə ittiham edərək, Qətərlə diplomatik münasibətləri dayandırdıqlarını bəyan edib. Sonradan daha bir neçə ölkə Qətərlə diplomatik münasibətləri kəsib.
Bununla yanaşı, iyunun 9-da isə ABŞ prezidenti Donald Tramp Qətəri terrorizmi maliyyələşdirməkdə günahlandırıb. "Qətəri terror təşkilatlarını maliyyələşdirməyi dayandırmağa çağırmağın vaxtı çatıb. Onlar ekstremist ideologiyaya sponsorluğu dayandırmalıdır", - deyə D.Tramp bildirib.
Bütün bunların fonunda, ABŞ-la Qətərin qısa bir müddətdə belə razılaşma əldə etməsi ilk baxışdan təəccüb doğurmaya bilmir. Məsələ ondadır ki, bir neçə gün əvvəl terrorizmi dəstəkləməkdə ittiham olunan ölkə ilə belə razılaşmanın əldə olunması qəribə görünür. Maraqlıdır, tərəflər arasında nə baş verdi ki, sözügedən razılıq əldə olundu?
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, rəsmi Vaşinqtonun Yaxın Şərq və ümumiyyətlə, körfəzdə yerləşən ölkələrin mövqeləri ilə bağlı konkret, ardıcıl, prinsipial siyasəti yoxdur: "Hər halda, atılan addımlar artıq dərəcədə ziddiyyətlidir və başadüşülən deyil. Sözügedən addımları ancaq belə qiymətləndirmək olar. Çünki buna başqa bir qiymət vermək çox çətindir. Birləşmiş Ştatlar kimi dövlət əvvəlcədən başqa bir dövləti terrorçuları dəstəkləməkdə günahlandırırsa, daha sonra onunla saziş imzalayırsa, bu dövlətə silah ixrac edirsə, o zaman buna birmənalı prizmadan yanaşmaq çətindir. Belə çıxır ki, ya bunun arxasında gizli, pərdəarxası məqamlar var, ya da bu, ABŞ-ın apardığı ziddiyyətli siyasətin bariz nümunəsidir. Bundan başqa heç bir şey ola bilməz. Hər halda, Birləşmiş Ştatların bu yöndə həyata keçirdiyi siyasətə başqa ad vermək çətindir".
Vidadi ORDAHALLI