Məhəmməd Əsədullazadə: "Vaşinqton Ankaranı yanında görmək istəyirsə, ilk növbədə YPG kürd terrorçularına dəstəyi kəsməlidir"
ABŞ-ın dövlət katibi Tillerson rəsmi Vaşinqtonun Türkiyə-Rusiya yaxınlaşmasından narahatlıq duyduğunu bildirib. O, Türkiyə ilə Rusiyanın yaxınlaşmasından narahat olduqlarını ilk dəfə açıq şəkildə etiraf edib. Tillerson Senatın Rusiyaya qarşı sanksiyalarla bağlı müzakirəsi zamanı bu yaxınlıqdan narahat olduqlarını deyib.
Bununla yanaşı, o, Türkiyə ilə münasibətlərin həm ABŞ, həm də Avropa və NATO üçün son dərəcə əhəmiyyətli olduğunu vurğulayıb. Türkiyə NATO üzvü olduğu üçün, ABŞ bu barədə ona dəfələrlə xəbərdarlıq edib. Eyni zamanda, Əroğanla Trampın görüşündə də, Tillersonun Türkiyəyə gəlişində də müəyyən təqdimatların verildiyi hiss olunurdu.
Bu arada Rusiya Türkiyəyə daha çox yaxınlaşmağa cəhd edir. Çünki Rusiya həm sanksiyalardan yaxa qurtarmaq, həm də öz karbohidrat ehtiyatlarını müxtəlif bazarlara çıxarmaq üçün partnyor axtarır.
Ancaq o da məlumdur ki, ABŞ NATO üzvü olan Türkiyənin regionda maraqlarını o qədər də nəzərə almır. Bir sıra məsələlərdə tərəflərin mövqeləri fərqlidir. Belə olan halda, Türkiyə məcburdur ki, digər aparıcı ölkələrlə yaxınlaşsın. O halda, ABŞ Türkiyə-Rusiya yaxınlaşmasından niyə bu qədər narahatdır?
Sözügedən məsələ ilə bağlı fikirlərini "Bakı-Xəbər"lə bölüşən politoloq Məhəmməd Əsədullazadənin sözlərinə görə, Yaxın Şərqdə davam edən ABŞ-Rusiya geosiyasi mübarizəsində Türkiyənin Rusiya ilə yaxınlaşması ilk növbədə ABŞ-ın regionda strateji səhvinin nəticəsidir: "Çünki ABŞ Suriyada Türkiyənin maraqlarını görməzdən gələrək, Türkiyə əleyhinə formalaşmış PKK-PYD terrorçularını dəstəkləmək kursu götürüb. ABŞ Suriyada PYD kürd terrorçularını silahlandırmaqla gələcəkdə bu regionda yeni dövlətin qurulmasına çalışır. Bu da Türkiyənin milli təhlükəsizlik və suverenliyini ciddi şəkildə təhdid edir. Kürd məsələsində Türkiyə ilə anlaşa bilməyən ABŞ Rusiyanın regionda Türkiyə ilə yaxınlaşmasının şahidi olur. ABŞ ona görə narahatdır ki, Türkiyə Rusiya ilə birgə Əsədin hakimiyyətdə qalmasını dəstəkləyə bilər. Regionda yeni siyasi ittifaq yarana bilər. Türkiyə-Rusiya yaxınlaşması İranın da prosesə qoşulması deməkdir. Bu, Yaxın Şərqdə siyasi toqquşmaları genişləndirə bilər. ABŞ Türkiyəni yanında görmək istəyirsə, ilk növbədə YPG kürd terrorçularına dəstəyi kəsməlidir. Eyni zamanda, Türkiyənin Suriyada antiterror əməliyyatlarına mane olmamalıdır. Artıq Suriyada Rusiya-Türkiyə ortaq razılaşmaya yaxınlaşır. Türkiyə-Rusiya strateji yaxınlaşması baş verəcəksə, ABŞ Türkiyə əleyhinə kürd terrorçularını daha da aktivləşdirəcək. Regionda ABŞ kürdlərin iştirakı ilə vəziyyəti mürəkkəbləşdirəcək. Türkiyə çalışır ki, Rusiyanın kürd terrorçularına dəstəyi olmasın. Putin də zamanla Türkiyəyə görə məsafə saxlayır. Bundan əlavə, Rusiya-Türkiyə iqtisadi əlaqələri inkişaf edir. Türkiyə Qərbdən uzaqlaşmaqla, Rusiyanın Yaxın Şərqdə fəallaşmasına zəmin yaradır. Ona görə də ABŞ bu əlaqələrdən ciddi şəkildə narahatlığını dilə gətirir. Buna baxmayaraq, Ankara-Moskva yaxınlaşması davam edəcək".
Vidadi ORDAHALLI