"3-cü iclas layihə ilə bağlı işləri daha da sürətləndirəcək"
ABŞ dövlət katibinin enerji diplomatiyası üzrə köməkçisinin müavini Robin Danniqan Bakıda keçiriləcək "Cənub Qaz Dəhlizi" Məşvərət Şurasının iclasında ölkəsini təmsil edəcək. Bu barədə "Trend"ə ABŞ Dövlət Departamentindən məlumat verilib.
Qeyd edək ki, "Cənub Qaz Dəhlizi"nin Məşvərət Şurasının 3-cü iclası 23 fevralda keçiriləcək.
Şuranın ilk iclası 2015-ci il fevralın 12-də, ikinci iclası isə ötən il fevralın 29-da keçirilib.
Məşvərət Şurasının sayca 3-cü tədbirinin Bakıda keçirilməsi layihənin reallaşması istiqamətində nə kimi rola malik olacaq?
Ekspert Günel Fərhadqızı qəzetimizə açıqlamasında bildirdi ki, dünya bazarlarında neftin qiymətinin düşməsinin yaratdığı reallıqlara baxmayaraq, Azərbaycan üzərinə götürdüyü öhdəliklərə sadiq qalaraq, tərəfdaşlıq etdiyi ölkələrlə əlaqələrini daha da gücləndirir, təşəbbüskarı olduğu nəhəng transmilli layihələrin icrasını uğurla davam etdirir: "Bəllidir ki, Avropa ilə Asiya arasında körpü rolunu oynayan ölkəmiz enerji resurslarının nəqli üçün böyük tranzit imkanlarına malikdir.
Hazırda mürəkkəb geosiyasi şəraitdə olan Avropanın qarşıdakı 100 ildə enerji təhlükəsizliyinin təminatını və şaxələndirilməsini şərtləndirən əsas amillərdən olan "Cənub Qaz Dəhlizi" Azərbaycanın liderliyi, eləcə də bu layihə ilə bağlılığı olan ölkələr və dünyanın maliyyə qurumlarının sıx əməkdaşlığı sayəsində uğurla reallaşdırılır.
Avropanın çox nüfuzlu siyasi və maliyyə qurumlarının rəhbərləri dəfələrlə bəyan ediblər ki, bu layihə "köhnə qitə" üçün prioritetdir.
Prezident İlham Əliyevin fevralın 6-da Brüsseldə Avropa İttifaqı Şurasının prezidenti Donald Tuskla görüşündən sonrakı mətbuat konfransında D.Tusk bildirdi ki, bundan sonra enerji sahəsində etibarlı və strateji tərəfdaş olan Azərbaycanla işbirliyini daha da artırmaq niyyətindədirlər: "Azərbaycan Avropanın enerji təhlükəsizliyi və təchizatının şaxələndirilməsi üçün mühüm əhəmiyyət kəsb edir. Bizim "Cənub Qaz Dəhlizi"ni tamamlamaq üçün ortaq öhdəliyimiz var. Bu, faktiki olaraq, hər iki tərəf üçün əsas prioritetdir".
"Cənub Qaz Dəhlizi" enerji təhlükəsizliyi və şaxələndirilməsi layihəsidir. Şaxələndirilmə dedikdə mən yalnız marşrutları deyil, o cümlədən mənbələri də nəzərdə tuturam. Azərbaycanın nəhəng qaz ehtiyatları var və ölkəmiz Avropa bazarı üçün yeni alternativ təbii qaz mənbəyidir.
Yeri gəlmişkən, ötən ilin dekabr ayının 20-də DB-nin Direktorlar Şurası "Cənub Qaz Dəhlizi" layihəsinin reallaşdırılması məqsədilə Azərbaycana 400 milyon dollar həcmində kreditin ayrılmasını təsdiq edib.
Bütün bu irəliləyişlərə Azərbaycanın təşəbbüskarı olduğu layihə ilı bağlı koordinasiya işlərinin düzgün aparılması sayəsində nail olunub. Sözsüz ki, ölkəmizin ev sahibliyi etdiyi Məşvərət Şurasının iclaslarının bu məsələdə böyük rolu var. 3-cü iclas layihə ilə bağlı işləri daha da sürətləndirəcək".
Məhəmmədəli QƏRİBLİ
