Qabil Hüseynli: "Rusiya ilə əldə olunan razılıq əsasında rəsmi Moskva nizamlanma istiqamətində hansısa addımları ata bilər"
Rusiya xarici işlər naziri Sergey Lavrov dekabrın 1-də Türkiyəyə işgüzar səfərə gedəcək. Bu barədə Rusiya Xarici İşlər Nazirliyinin sözçüsü Mariya Zaxarova keçirdiyi brifinqdə bildirib ki, Türkiyənin Alanya şəhərində Rusiya və Türkiyə prezidentlərinin başçılıq etdiyi Yüksək Səviyyəli Əməkdaşlıq Şurası çərçivəsində fəaliyyət göstərən Rusiya-Türkiyə birgə strateji planlaşdırma qrupunun 5-ci iclası keçiriləcək.
"İkitərəfli, regional və beynəlxalq məsələlərə dair dərin fikir mübadiləsinin aparılması nəzərdə tutulur. Suriyadakı, ümumilikdə Yaxın Şərq regionundakı vəziyyət müzakirə ediləcək. Beynəlxalq terrorizmə qarşı mübarizədə səmərəliliyin artırılması da diqqət mərkəzində olacaq. Cənubi Qafqaz, Mərkəzi Asiya, Ukraynadakı vəziyyətlə bağlı dialoq davam etdiriləcək" - M.Zaxarova vurğulayıb.
Bundan əlavə, S.Lavrov Yüksək Səviyyəli Əməkdaşlıq Şurasının növbəti iclası və Türkiyənin baş naziri Binəli Yıldırımın Moskvaya edəcəyi səfər çərçivəsində Rusiya və Türkiyə hökumət başçılarının görüşünün gündəliyi ilə bağlı məsələləri müzakirə etmək niyyətindədir.
M.Zaxarova bildirib ki, bu, 2015-ci il noyabrın 24-də Türkiyə-Suriya sərhədində baş verən insidentlə korlanan Türkiyə-Rusiya münasibətlərinin normallaşması prosesinin başlamasından sonra Rusiya-Türkiyə birgə strateji planlaşdırma qrupunun ilk iclası olacaq.
Bəzi şərhçilərin qənaətinə görə, mümkün Türkiyə-Rusiya yaxınlaşması Qafqazdakı duruma da əsaslı surətdə təsir edəcək və bunun da nəticəsində Dağlıq Qarabağ probleminin həlli də tezləşə bilər.
Bu iddiaları nə dərəcədə əsaslı saymaq olar?
Politoloq Qabil Hüseynlinin fikrincə, Rusiya-Türkiyə münasibətlərinin inkişafı Dağlıq Qarabağ münaqişəsinin həllinə ciddi bir təsir göstərməyəcək: "Rusiya-Türkiyə münasibətlərinin çox gözəl olduğu bir dövr vardı, söhbət hətta strateji əməkdaşlıqdan gedirdi. İki dövlətin bu qədər yaxınlaşması çoxlarında böyük gözləntilər yaratmışdı. Ancaq həmin dövrdə də Rusiya-Türkiyə münasibətlərinin pozitiv inkişafının, əməkdaşlığın genişləndirilməsinin Dağlıq Qarabağ münaqişəsinin həllinə ciddi bir təsiri olmurdu. Çünki Rusiya Türkiyənin bölgəyə müdaxiləsini və Azərbaycanla hərbi əməkdaşlığı dərinləşdirməsini istəmir. Ancaq bir fakt da var ki, Dağlıq Qarabağ münaqişəsinin açarı məhz Rusiyanın əlindədir. Problemin həllinə təkanı məhz Rusiya verə bilər. İş burasındadır ki, ermənilər yalnız bizimlə deyil, eyni zamanda Türkiyə ilə də düşmənçilik edir. Bu baxımdan da Türkiyənin nizamlanma prosesində yer alması elə də inandırıcı görünmür. Ancaq Rusiya ilə əldə olunan razılıq əsasında rəsmi Moskva nizamlanma istiqamətində hansısa addımları ata bilər".
Məhəmmədəli QƏRİBLİ