Qabil Hüseynli: "Aİ üçün bir müsəlman ölkəsinin onunla yaxın əməkdaşlıq münasibətində olması çox mühüm göstəricidir"
Azərbaycanla Avropa İttifaqı (Aİ) arasında yeni saziş üzrə danışıqların başlanması üçün mandat verilib. Bu barədə Avropa İttifaqı Şurasının açıqlamasında bildirilir.
Məlumata əsasən, Avropa İttifaqı Şurası Avropa Komissiyasına və xarici əlaqələr və təhlükəsizlik siyasəti üzrə ali nümayəndəsinə bütün üzv ölkələr adından Azərbaycanla hərtərəfli razılaşma üzrə danışıqlar başlaması üçün mandatı təsdiqləyib.
Qeyd edək ki, yeni razılaşma 1996-cı ildə imzalanan əməkdaşlıq və tərəfdaşlıq razılaşmasını əvəzləyəcək və Azərbaycanla Aİ-nin qarşılaşdığı ümumi maraq və çağırışlara cavab verəcək.
Azərbaycan Xarici İşlər Nazirliyinin (XİN) mətbuat xidmətinin rəhbəri Hikmət Hacıyev bildirib ki, Azərbaycan Avropa İttifaqı (Aİ) tərəfindən Azərbaycan Respublikası ilə hərtərəfli əməkdaşlığa dair danışıqlar aparılması üçün mandatın verilməsini alqışlayır.
H.Hacıyev qeyd edib ki, Avropa İttifaqı tərəfindən Azərbaycan Respublikası ilə hərtərəfli razılaşmanın hazırlanması üçün Avropa Komissiyasına və xarici siyasət və təhlükəsizlik məsələləri üzrə ali nümayəndəyə mandat verilib: "Avropa İttifaqı tərəfindən Azərbaycan Respublikası ilə hərtərəfli əməkdaşlığa dair sazişin hazırlanması və bu istiqamətdə danışıqların aparılması üçün mandatın verilməsini alqışlayır və təqdir edirik".
XİN rəsmisi xatırladıb ki, Azərbaycanın xarici işlər naziri Elmar Məmmədyarov 2015-ci ilin mayında "Şərq Tərəfdaşlığı" üzrə 4-cü Riqa zirvə toplantısında iştirakı çərçivəsində Aİ-nin Avropa Qonşuluq Siyasəti və Genişlənmə danışıqları üzrə komissarı Yohannes Hanla görüşüb, Azərbaycanla Avropa İttifaqı arasında strateji tərəfdaşlığa dair saziş layihəsini ona təqdim edib və Azərbaycanın bu müstəvidə Aİ ilə əlaqələri inkişaf etdirmək niyyətində olduğunu vurğulayıb: "Hesab edirik ki, yeni sazişin imzalanması Avropa İttifaqı ilə Azərbaycan arasında əməkdaşlığın strateji müstəvidə keyfiyyətcə yeni səviyyəyə qalxmasına və əlaqələrin hərtərəfli inkişafına əsaslı hüquqi çərçivə yaradacaq və töhfə verəcək".
Yeni əməkdaşlıq istiqamətində gedən işlərdən nə gözləmək olar?
Politoloq Qabil Hüseynlinin sözlərinə görə, Avropa İttifaqı ilə Azərbaycan arasında ciddi yaxınlaşma prosesi gedir: "Bu yaxınlarda Aİ-dən gəlmiş nümayəndə heyətinin Prezident İlham Əliyev tərəfindən qəbul edilməsi və onlarla açıq, prinsipial danışıqların aparılması bu işlərin xeyrinə oldu. İndi artıq Aİ Azərbaycanla danışıqların aparılması və hərtərəfli əlaqələrin qurulması istiqamətində addımlar atmaq niyyətindədir. Aİ üçün bir müsəlman ölkəsinin onunla yaxın əməkdaşlıq münasibətində olması çox mühüm göstəricidir. Son zamanlar Türkiyə ilə münasibətlərin zəifləməsi, hətta qırılma nöqtəsinə gəlib çatması başqa bir müsəlman ölkəsi üçün əlaqələrin qurulmasına təkan verdi. Azərbaycanın bu işə razılıq verməsi çox müsbət hadisədir. Çünki bölgədə formalaşmaqda olan geosiyasi vəziyyət, xüsusilə Rusiyanın Ermənistanla əlaqələrini hərtərəfli inkişaf etdirməyə başlaması Azərbaycanı məcbur edir ki, özünə yeni tərəfdaşlar və müttəfiqlər axtarışına çıxsın".
Politoloq hesab edir ki, Aİ təkcə bir siyasi qurum kimi yox, həm də yaxşı bir ticarət ortağı kimi Azərbaycanla münasibətlərin möhkəmlənməsinə böyük töhfə verə bilər: "Üstəlik, ölkəmiz neftinin böyük hissəsini Avropa bazarlarına çıxarır, Azərbaycanın gələcək qaz ehtiyatlarının əsas alıcısı məhz Aİ ölkələri olacaq. Rusiyanın qazı var, yeni qaz kəmərləri çəkir, amma alıcısını tapa bilmir, Azərbaycan hələ qaz xəttini çəkməkdədir və qaz gələn ilin sonundan Avropaya ötürülməyə başlayacaq, lakin artıq bütün alıcıları hazırdır. Beləliklə, Aİ ilə Azərbaycan arasında münasibətlərin yaxşılaşması ölkəmizə gələcək münasibətlərə, xüsusilə öz qazını Avropa bazarlarına göndərməsinə indidən yaşıl işıq yandırır. Mən bu mandatın verilməsindən sonra aparılacaq danışıqların hər iki tərəf üçün əhəmiyyətli olacağına inanıram".
Məhəmmədəli QƏRİBLİ