Məlumat verildiyi kimi, Rusiya prezidenti Vladimir Putin hökumətin Rusiya Federasiyası ilə Ermənistan arasında Vahid Ordu Birləşmələrinin yaradılması haqda təklifini dəstəkləyib. Bildirilir ki, bununla bağlı Rusiya prezidenti sərəncam imzalayıb. Sərəncamda deyilir: "Rusiya Müdafiə Nazirliyi və Xarici İşlər Nazirliyi müqavilənin imzalanması üçün Ermənistanla danışıqlara başlasın".
Qeyd edək ki, Vahid Ordu Birləşmələrinin fəaliyyəti ilkin olaraq beş il müddətində nəzərdə tutur. Bu birləşmənin rəhbəri iki ölkə prezidentləri tərəfindən təyin olunur. Dinc şəraitdə birləşmiş ordu Ermənistanın Baş Qərargahına tabe olacaq. Müharibə şəraitində isə tabeçilik birbaşa Rusiya Müdafiə Nazirliyinin Cənub Hərbi Dairəsinə keçəcək. İndi bu prosesin regiona təsiri geniş müzakirə mövzusudur. Proseslərin gedişi göstərir ki, əslində, Rusiya bununla düşmən ölkə üzərində təsirini daha da artırır. Ermənistanda isə iddialar səslənir ki, baş verənlər Qarabağ münaqişəsinin yenidən alovlanmasının qarşısını ala bilər. Amma o da etiraf olunur ki, Azərbaycan öz ərazilərində hərbi əməliyyatlar aparsa, bu halda Vahid Ordu Birləşmələrinin Ermənistan üçün heç bir faydası olmayacaq. Digər tərəfdən Vahid Ordu Birləşmələrinin yaradılması Ermənistan üçün yeni təhdidlər yaradaraq, onu NATO-nun hədəfinə çevirir. Məsələ burasındadır ki, Vahid Ordu Birləşmələrinin yaradılması Rusiyanın Ermənistanda hərbi gücünü artırması və ümumilikdə bölgədə möhkəmlənməsi deməkdir. Rusiyalı hərbi ekspert Vladislav Şurıqin Rusiyanın əsas hədəfinin məhz NATO olduğunu vurğulayır: "Faktiki olaraq, birləşmiş ordu mövcuddur, çünki Ermənistan ərazisində Rusiya hərbi bazası var. Lakin indi söhbət iki ölkə arasında hərbi ittifaqdan gedir. Bu onu göstərir ki, Rusiya cənub sərhədlərində öz maraqlarını müdafiə etməyə hazırlaşır. Amma burada əsas məsələ Dağlıq Qarabağ deyil. Rusiyanın hədəfi başqadır: regionda sabitliyi saxlamaq. Bununla yanaşı, Gürcüstanın NATO-ya daxil olmağa hazırlaşması təxmin etməyə imkan verir ki, ittifaqın hərbi bazaları tezliklə bu ölkədə yaradılacaq. Fikrimcə, Rusiya və Ermənistan qoşunlarının birləşmiş ordusu lazım olanda NATO-nu bölgədə sıxışdıracaq". Aydındır ki, məhz belə vəziyyətdə NATO istər-istəməz Vahid Ordu Birləşmələrini, beləliklə də Ermənistanı özü üçün potensial hədəf olaraq müəyyənləşdirəcək. Onsuz da Rusiyanın Ermənistana və ümumilikdə Qafqaza ordu cəmləşdirməsi NATO-da müsbət qarşılanmır. Xatırladaq ki, Rusiya Müdafiə Nazirliyi cənub istiqamətinə 350 vahid yeni hərbi texnika göndərir. Məlumata əsasən, Cənub Hərbi Dairəsinin qoşun hissələri hərbi texnika parkının yenilənməsi çərçivəsində ilin sonuna qədər 350 vahid təyyarə, gəmilər, tanklar və digər zirehli texnika alacaq.
Konkret olaraq Rusiya Hava-Kosmik Qüvvələrinin Rostov, Kuban və Krımdakı bazalarına 30 vahid yeni, o cümlədən modernləşdirilmiş Su-30SM qırıcıları və Ka-52 zərbə vertolyotları alacaq. Bu fonda Qara dəniz və Xəzər donanmalarına 20 vahid gəmi, kater və təchizat gəmiləri daxil olacaq. Quru qoşunları hərbi texnikasının böyük əksəriyyəti, yəni 300 vahidə yaxın texnika isə Rusiyanın separatçı Abxaziya və Cənubi Osetiyadakı, habelə Ermənistandakı hərbi bazalarına göndəriləcək.
Xatırladaq ki, Rusiya durmadan Ermənistandakı hərbi bazasını və Xəzər donanmasını gücləndirir. Bu ilin əvvəllərində İrəvan yaxınlığındakı Erebuni hava bazasına onlarla zərbə vertolyotu və Miq-29 qırıcıları yerləşdirilib. Gümrüdəki 102-ci bazanın arsenalı gücləndirilib. Bütün bunlar isə NATO-nun genişlənməsinə qarşı görülən tədbirlər sayılır. Xüsusən də NATO-nun Gürcüstana gəlmək niyyəti Moskvanı narahat edir və Kreml cavab tədbirləri görür. Bu hal isə NATO-nun da adekvat reaksiya verməsini şərtləndirir. Bu da, öz növbəsində, Rusiyanın hərbi poliqonuna çevrilən Ermənistanın da NATO üçün hədəf olması anlamına gəlir. Onsuz da Ermənistanda hərbi parad zamanı nümayiş olunan "İsgəndər" operativ-taktiki raketləri NATO-nun bu ölkəyə diqqətini artırmışdı. Beynəlxalq ekspertlərin gəldiyi qənaətə görə, bu gün Rusiyanın "İsgəndər" raket sistemlərini Ermənistanda yerləşdirməsi Ermənistana qarşı açıq təhlükə faktoru yaradır. Belə ki, Rusiyanın NATO ilə mümkün qarşıdurma halında NATO-nun ilk hədəfi Rusiyanın raket artilleriya sistemlərini sıradan çıxarmaq olacaq ki, bu da Rusiyanın bufer zona seçdiyi Ermənistan ərazisinin hədəf olaraq vurulması deməkdir.
Nahid SALAYEV