Arzuxan Əlizadə: "ABŞ super dövlət olduğu üçün ölkədəki bir sıra dövlət təsisatları ölkə siyasətinin müəyyən olunmasında mühüm rol oynayır"
ABŞ-da keçirilən prezident seçkilərinin nəticəsi erməniləri çətin bir duruma salıb. Daha çox ümidlərini demokrat namizəd Hillari Klintonun qələbəsinə bəsləyən erməni diasporu və Ermənistan hakimiyyəti artıq təbliğat kampaniyasını respublikaçı Donald Trampa qarşı yönəldib.
Ermənilərə məxsus "168.jam" saytı yazır ki, Tramp məsələlərə biznesmen kimi yanaşır, düşüncə tərzi fərqlidir. Daha sonra isə yazır ki, "Birləşmiş Ştatların Qafqazdakı siyasətinə gəldikdə, bu siyasətdə Ermənistan heç vaxt diqqət mərkəzində olmayıb. Trampın üzv olduğu respublikaçıların Qafqazdakı siyasəti əsasən "türk-gürcü" və Azərbaycan tandemi üzərində qurulur. Bu da dərhal Ermənistana təsirsiz ötüşmür - Ermənistana qarşı siyasət dəyişir, ölkə regional layihələrdən izolyasiya olunur".
Ermənistanın Regional Tədqiqatlar Mərkəzinin direktoru, politoloq Riçard Kirakosyan da bildirib ki, Donald Trampın qələbəsindən sonra ABŞ-la Rusiyanın münasibətlərinin yaxşılaşmasından Ermənistanın da qazanacağını gözləyən ekspertlərin fikirlərinə şərik deyil. Politoloqun fikrincə, bu yalnız ilk baxışda belə görünə bilər: "Yox, kiçik bir dövlət olaraq, Ermənistanın əlavə balansa ehtiyacı var. Əgər Qərb və ABŞ bizə olan maraqlarını itirərsə, Rusiyanı Azərbaycanla münasibətlərini daha da yaxşılaşdırmaqdan heç nə saxlaya bilməz. Bu isə daha çox silah satışı və bizim alternativimizin olmaması deməkdir".
Ancaq Donald Trampın gözlənilməz addımlardan ibarət siyasətini şərh edən politoloq bunları qeyd edib: "Aprelin 24-də Donald Tramp "erməni soyqırımı"nı tanıyanda təəccüblənəcəksiniz. Elə-belə. Səhər yuxudan oyanacaq və deyəcək - niyə də yox?".
Erməni politoloqun yanaşmasından belə çıxır ki, Trampın qalmaqallı açıqlamalarla çıxış etməsi qondarma "soyqırım"ı tanıyacağına əsas verir. O baxımdan maraqlıdır, bu nə dərəcədə reallığa uyğundur? Məsələyə münasibət bildirən AMİP-in baş katibi Arzuxan Əlizadə deyilənlərlə razılaşmadı. Onun fikrincə, ABŞ-ın ənənəvi siyasəti var: "Seçki kampaniyası dövründə namizədlərin qalmaqallı açıqlamalarla çıxış etməsi, müəyyən vədlər verməsi o demək deyil ki, prezident seçiləndən sonra nəyi desələr edəcəklər. Təbii ki, belə olmayacaq. Ona görə ki, ABŞ-ın dövlət siyasətini bir nəfər müəyyən etmir. Birləşmiş Ştatlar super dövlət olduğu üçün ölkədəki bir sıra dövlət təsisatları ölkə siyasətinin müəyyən olunmasında mühüm rol oynayır. Ona görə də Trampın birdən-birə belə bir addım atacağı real deyil. Digər tərəfdən, nəzərə almaq lazımdır ki, ermənilər nə qədər hiyləgər davransalar da, faktiki olaraq seçkilərdə səslərini əsasən Hillari Klintona verdilər. Hillari Klinton dövlət katibi olduğu dönəmdə 2 dəfə Ermənistana səfər etdi, qondarma "soyqırım" abidəsini ziyarət etdi və ən başlıcası, 2009-cu ildə "Sürix protokolları"nın imzalanması zamanı xüsusi fəallıq göstərdi. Protokollar imzalanarkən onun necə sevindiyi çoxlarının xatirindədir. Ancaq bu faktorlar belə, nəticə etibarilə, ABŞ-ın qondarma "soyqırımı" tanımasına gətirib çıxarmadı. Ona görə də deyilənlərlə razılaşmıram və düşünmürəm ki, Donald Tramp belə bir addım atsın". Vidadi ORDAHALLI