Üzeyir Cəfərov: "Prezidentin bu fikirləri çox ciddi mesaj kimi qəbul edilməlidir"
Xəbər verildiyi kimi, Prezident, Silahlı Qüvvələrin Ali Baş Komandanı İlham Əliyev Füzuli rayonu ərazisində ön xətdə yerləşən komanda-idarəetmə məntəqəsində əməliyyat şəraiti ilə tanış olub.
Dövlət başçısı hərbçilərlə görüşüb və döyüşdə fərqlənmiş hərbi qulluqçular qarşısında çıxış edib. O bildirib ki, Azərbaycan Ordusu istənilən hədəfi məhv edə bilər: "Bu gün biz Lələtəpə ərazisindəyik. Hələ bir neçə ay bundan əvvəl bu ərazi işğal altında idi. Biz bu işğala son qoyduq. Füzuli, Cəbrayıl və Ağdərə rayonlarının ərazilərində işğal altında olan 2000 hektardan çox torpaq uğurlu əks-hücum əməliyyatı nəticəsində işğalçılardan azad edilib. Minlərlə hektar torpağa bu gün Azərbaycan Ordusu tam nəzarət edir. Onu da qeyd etməliyəm ki, əks-hücum əməliyyatımız əlverişsiz mövqelərdən başlayıb. Biz yüksəklikləri, təpələri işğalçılardan azad etmişik və böyük qəhrəmanlıq göstərmişik. Aprel döyüşləri hərbi dərsliklərə salınmalıdır. Azərbaycan Ordusu bu döyüşlərdə peşəkarlıq, qəhrəmanlıq, məharət göstərib. Azərbaycan Ordusu öz gücünü göstərdi. Ermənistan uzun illər öz ordusu haqqında yalanlar, miflər uydururdu. Guya onların yenilməz ordusu var. Aprel döyüşləri göstərdi ki, hansı ordu yenilməzdir. Azərbaycan Ordusu yenilməz ordudur, istənilən vəzifəni icra etməyə qadirdir. İşğal edilmiş torpaqlarda, Dağlıq Qarabağda elə bir hərbi hədəf yoxdur ki, bu gün biz onu məhv edə bilməyək. Bu gün Azərbaycan Ordusu güclü ordular sırasındadır. Bunu biz bilirik, Azərbaycan xalqı bilir və bütün dünya bilir. Güclü orduların reytinqlərində Azərbaycan Ordusunun çox yüksək yeri var. Ordumuzun döyüş qabiliyyəti yüksək səviyyədədir, günbəgün artır, ordumuzda nizam-intizam hökm sürür, maddi-texniki təminatı ən yüksək səviyyədədir".
Dövlət başçısının Azərbaycanın istənilən hədəfi vura biləcəyini bəyan etməsini ekspertlər necə dəyərləndirir?
Məsələyə münasibət bildirən hərbi eksprt Üzeyir Cəfərov bunun mümkün olduğunu və Azərbaycan Ordusunun buna qadir olduğunu bildirdi: "Azərbaycan Ordusu düşmənin istənilən hədəfini məhv etməyə qadirdir. Prezidentin bu fikirləri çox ciddi mesaj kimi qəbul edilməlidir. Azərbaycan Prezidentinin bu fikirləri artıq Ermənistanda narahatlıq yaradıb. Dağlıq Qarabağdakı qondarma qurumun nümayəndəsi David Babayan bu ritorikanın nəyə hesablandığı barədə açıqlama verib. Amma ermənilər başa düşmür ki, Azərbaycan dediyi sözü dəfələrlə təkrarlamayacaq. Yəni Azərbaycan öz ərazisində ikinci erməni dövlətinin yaranmasına heç bir halda razı olmayacaq. Ona görə Prezident İlham Əliyevin hərbi geyimdə çıxışı və bu fikirləri məhz apreldə düşmən işğalından azad olunmuş Lələtəpədə səsləndirməsi çox ciddi mesaj kimi qəbul edilməlidir. Bu gün Azərbaycan cəmiyyəti və mətbuatı beynəlxalq ictimaiyyətin diqqətinə məhz bu kontekstdən çatdırmalıdır ki, Azərbaycanın mövqeyi qətidir, öz torpaqlarını, nəyin bahasına olursa-olsun, işğaldan azad edəcək, ona görə də bütün resurslar buna hesablanmalıdır".
Məhəmmədəli QƏRİBLİ