Məlum olduğu kimi, noyabrın 12-dən 18-dək səhər şəraitində qoşunların idarəolunması və silahların döyüş tətbiqinin yoxlanması məqsədilə Silahlı Qüvvələr irimiqyaslı təlimlərə başlayıb.
Müdafiə Nazirliyinin yaydığı məlumatlara görə, bu çərçivədə Silahlı Qüvvələrdə keçirilən irimiqyaslı təlimlərin planına əsasən qoşunların, döyüş texnikalarının, döyüş gəmilərinin, qüvvə və vasitələrin təyin olunan məntəqələrə çıxarılması həyata keçirilib. "Həyəcan" siqnalı ilə qaldırılan qoşunların və komanda idarəetmə məntəqələrinin əməliyyat təyinatı rayonlarına, döyüş aviasiya vasitələrinin ehtiyat aerodromlarına, Hərbi Dəniz Qüvvələrinin gəmi və katerlərinin əməliyyat rayonlarına, Raket və Artilleriya Qoşunlarının birlik və hissələrinin müvəqqəti atəş və start mövqelərinə çıxarılması və yenidən qruplaşması sona çatdırılıb. Təlimdə iştirak edən qoşunlar, həmçinin, şərti düşmənin ehtimal olunan fəaliyyətlərinin qarşısının alınması məqsədilə plana uyğun yaradılmış vəziyyətlərdə sərəncamda olan müasir vasitələrdən, idarəetmə sistemlərindən, silah və texnikalardan effektiv istifadə edilməsi üzrə tapşırıqları yerinə yetirirlər. Təlimlər xeyli əvvəldən planlaşdırılsa da, onun miqyası Ermənistanda ciddi qorxuya səbəb olub. Xatırladaq ki, təlimlərə 60 minədək şəxsi heyət, 50-dən çox təyyarə və helikopter, 150-dən artıq tank və zirehli texnika, eləcə də raket və artilleriya qoşunlarının 700-dək qurğu və sistemi cəlb olunub. Düşmən tərəf hesab edir ki, Azərbaycan bununla növbəti dəfə güc nümayiş etdirərək işğal altındakı ərazilərin hərbi yolla azad olunmasına strat verə bilər. Elə erməni ekspert David Apinyan da təlimlər fonunda vurğulayır ki, gözlənilməz müharibə hər an başlaya bilər: "Azərbaycanın hərbi təlimləri təsadüfi ola bilməz və sonda Ermənistan ciddi zərbə ilə qarşılaşa bilər. Müharibənin yenilənməsi təhlükəsi var". Belə bir vaxtda Ermənistan üçün narahatlıq yaradan amillərdən biri də Rusiyanın mövqeyidir. Erməni mediası yazır ki, Kreml Qarabağ münaqişəsinin həllində müəyyən irəliləyişlərin olmasında maraqlıdır və bu səbəbdən Dağlıq Qarabağ ətrafında ən azı iki rayonun azad olunması üçün İrəvana təzyiqlər edilir. İrəvanın isə sonadək bu təzyiqlərə davam gətirə biləcəyi inandırıcı sayılmır. Çünki burada yaxşı bilirlər ki, Rusiya İrəvanın arxasından çəkilsə, Azərbaycan qısa zaman ərzində ərazilərini güc yolu ilə azad edəcək. Rusiyanın mövqeyi isə erməniləri getdikcə daha çox narazı salır. Məsələn, status məsələsində Kremlin mövqeyi ermənilərdə narahatlıq yaradır. Rusiya Xarici İşlər Nazirliyinin rəsmi nümayəndəsi Mariya Zaxarova isə status məsələsi ilə bağlı bildirir: "Rusiya, ATƏT-in Minsk Qrupunun digər həmsədr ölkələri, Ermənistan da daxil olmaqla digər ölkələr Dağlıq Qarabağı müstəqil dövlət kimi tanımır. Hesab edirik ki, Dağlıq Qarabağın statusu danışıqlarda müəyyən olunmalıdır. Bununla əlaqədar hazırda onun yeni adlandırılmasının ortaya çıxması Rusiyanın Dağlıq Qarabağ münaqişəsinin nizamlanması ilə bağlı mövqeyinə təsir etməyəcək".
Rusiya Federasiya Şurasının üzvü Nikolay Rıjkovun İrəvanda söylədiyi fikirlər də ermənilərdə narazılıq yaradır. Ermənistan parlamentində jurnalistlərin suallarını cavablandıran Rıjkov "Rusiya Azərbaycana niyə silah satır" sualının cavabında bildirib: "Bəli, biz silahı satırıq, lakin bu o demək deyil ki, müharibə istəyirik. Hər şeyin yoluna düşməsi üçün Dağlıq Qarabağ münaqişəsini tezliklə həll etmək lazımdır. Yalnız o halda bu problemlər aradan qalxacaq". Aydındır ki, Rusiya Ermənistana Rıjkovun dili ilə "Azərbaycana silah satmağımızı istəmirsənsə, Dağlıq Qarabağ münaqişəsinin həlli üçün mənim planımı qəbul et" mesajını verir.
"Armenianreport" saytı da yazır ki, Rıjkov əslində Ermənistanın ərazilərin Azərbaycana qaytarılmasını nəzərdə tutan "Qarabağ planı" ilə razılaşmasına işarə edir: "O, "əraziləri qaytarın, Rusiyanın Qarabağ planı ilə razılaşın və bütün bu problemlər aradan qalxsın" demək istəyir. İkinci mesajı da belədir:"bununla razılaşmasanız, o zaman Azərbaycan güc yolu ilə sizi yola gətirəcək". Bunu Ermənistan rəhbərliyi də yaxşı bilir, lakin susur. Bu, sadəcə Ermənistanın milli biabırçılığıdır". Beləliklə, indi Ermənistanda qorxu yaradan əsas məqam Azərbaycanın güc variantına əl ata biləcəyidir. Düşmən bilir ki, Rusiya onun arxasında durmasa, çətin vəziyyətdə qalacaq. Bu səbəbdən ermənilər ya Rusiyanın da istədiyi kimi işğal altındakı ərazilərin tədricən boşaldılmasına start verməli, ya da yeni müharibəyə hazırlaşmalıdır. Bu müharibədə isə məğlub duruma düşəəklərini onlar özləri də yaxşı bilir.
Tahir TAĞIYEV