Rusiya prezidenti Vladimir Putinin səhhətində yaranmış problemlər və Qərb ölkələri ilə münasibətlərinin gərgin olmasından dolayı postunu vaxtından əvvəl tərk edə biləcəyi iddia edilir.
Baki-xeber.com xəbər verir ki, belə bir iddia ilə Kremlin mətbəxinə yaxşı bələd olan Moskva Dövlət Beynəlxalq Əlaqələr İnstitutunun professoru, politoloq Valeri Solovey çıxış edib.
Politoloqa görə, Rusiyada növbədənkənar prezident seçkiləri keçiriləcək: “64 yaşlı ölkə başçısı Vladimir Putinin “bəzi problemləri” var, buna görə də hakimiyyəti başqasına – varisinə ötürəcək”.
Soloveyin bu barədə müsahibəsi “Moskovskiy komsomolets” qəzetinin saytında dərc olunub, ancaq maraqlıdır ki, onun müsahibəsi yayımlandıqdan 3 saat sonra saytdan çıxarılıb. Professor Solovey isə, xəbər saytdan çıxarıldıqdan sonra da fikirlərini bu dəfə sosial mediada israrla müdafiə edib. Solovey Putinin vəzifədən ayrılacağı tarixi də göstərib - 2017-ci il.
Politoloq Kremlin mətbəxi barədə yetərincə məlumatlı adam kimi tanınır. Buna misal kimi, Prezident Administrasiyasının indiki rəhbəri Anton Vainonun bu vəzifəyə gətiriləcəyini öncədən dediyini göstərmək olar.
Solovey deyir ki, Rusiya prezidenti gələn ilin yazında hakimiyyəti tərk edə və bu vəzifəni varisinə buraxa bilər. Politoloqun sözlərinə görə, Putinin növbədənkənar seçkilərə gedib-getməyəcəyi bu ilin dekabrında bilinəcək. O, indiki dövlət başçısının “hansısa problemləri” olduğunu, bu üzdən gələn il ictimaiyyət arasında aylarca görünməyəcəyini və ya nadir hallarda üzə çıxacağını iddia edir.
Politoloq təcili seçkilərin keçirilməsini iki il sonra ölkədə durumun daha da pisləşəcəyi ilə də əsaslandırır. Soloveyin dediyinə görə, güc strukturlarındakı kadr ehtiyatı, onların “barış siyasəti” aparmaq qabiliyyətinin olmaması Putini xəyal qırıqlığına uğradıb. Politoloqun daha bir iddiası da var: Rusiya prezidenti onun hakimiyyəti dönəmində ölkəsinin Qərblə münasibətlərinin yaxşılaşmayacağına artıq əmindir.
Solovey Vladimir Putinin varisinin indiki baş nazir Dmitri Medvedyev olacağını və onun bu rola hazırlandığını söyləyir, amma güc qurumlarının “varis”in əleyhinə olduğunu bildirməyi də unutmur.
Varisliyə ikinci namizəd xüsusi xidmət orqanlarının 2008-ci ildə irəli çıxardığı, bir qədər öncə Prezident Administrasiyası rəhbərliyindən uzaqlaşdırılan Sergey İvanov ola bilər.
Politoloq Yekaterina Şulman həmkarı Valeriy Solovey-in söylədiklərini doğru sayır. O, professorun daha öncə “Gazeta.ru”ya da eyni məzmunlu müsahibə verdiyini yada salır.
Yekaterina Şulman deyir ki, Solovey artıq bir neçə dəfə Putinin “bəzi obyektiv səbəblərdən” 2018-ci ildəki seçkilərə qatılmayacağı haqda proqnozlar səsləndirib. Onun qənaətincə, buna Rusiya prezidentinin səhhəti səbəb ola bilər.
Şulmanın fikrincə, dövlət başçısının kadr yerdəyişmələrini bir neçə dəfə öncədən dəqiqliklə söyləyən professorun, çox güman, hakimiyyətdə öz qaynağı var. Həmin qaynaq da bəlli məqsəd gedə, verilən məlumatın ictimailəşməsini gözləyə bilər. Politoloq düşünür ki, hakimiyyətin və ya hakimiyyətdəki bir qrupun ictimai rəyə nələrisə ötürmək istəməsi mümkündür.
Qərb mediasının da diqqətini çəkən bu xəbərlə bağlı Kremldən hər hansı açıqlama vermək istəməyiblər.
TAHİR