Elşən Mustafayev: "Təbii ki, yeni adamları əməkdaşlığa cəlb etməyə çalışacaqlar"
ABŞ-da keçirilən prezident seçkilərinin nəticələri daha çox erməniləri məyus edib. Həmin ölkədəki erməni lobbisinin Tramp əleyhinə apardığı kampaniya və onların bu istiqamətdə xərclədiyi pulların heç bir səmərəsi olmayıb.
Artıq ABŞ-ın siyasi elitasında təmsil olunan və ermənipərəst baxışları ilə seçilən konqresmenlərin mövqeyinin zəiflədiyi də qeyd olunur. Azərbaycan Prezidenti Administrasiyası rəhbərinin müavini, Xarici əlaqələr şöbəsinin müdiri Novruz Məmmədov "Twitter"dəki səhifəsində bu barədə yazıb: "ABŞ-dakı prezident seçkilərinin nəticələri Ermənistan və dostları üçün daha bir sürprizə çevrildi".
N.Məmmədov qeyd edib: "Bob Dold, Mark Körk və başqa ermənipərəst konqresmenlər seçkilərdən kənarda qaldılar. "Azərbaycanda Demokratiya" adlı bədnam aktın həmmüəlliflərindən olan Cozef Hek də seçkini uduzanlar sırasındadır".
Ermənipərəst konqresmenlərin bu məğlubiyyəti nə ilə bağlıdır?
Azərbaycan Milli İstiqlal Partiyasının sədr müavini Elşən Mustafayev qəzetimizə açıqlamasında bildirdi ki, məsələyə ermənipərəstlərin tam məğlub olduğu kontekstindən yanaşmaq düz deyil: "Bu dəqiqdir ki, erməni lobbisi daha çox xanım Klintonun prezident seçilməsi üçün çalışıb. Ermənilərin güclü olduğu Kaliforniya ştatında qələbəni də məhz Klinton qazandı. Məlumdur ki, Senat və Konqresə də yerlərin çoxunu respublikaçılar qazanıb. Bəli, bir sıra adlar var ki, onların Konqresə düşməməsi bizi sevindirir. Çünki adları çəkilən şəxslər öz ifrat erməni təəssübkeşliyilə seçilib. Həmin şəxslərin məğlubiyyətinə yalnız ermənipərəst olmaları rakursundan baxmaq olmaz. Erməni lobbisinin təsiri altında olan senator və konqresmenlərin sırasında həm demokratlar, həm də respublikaçılar var. Biz çalışmalıyıq ki, ümumi fikrin dəyişməsi üzərində fəaliyyətimizi qurmağı bacaraq. Çünki erməni lobbisi üçün fərdlər yox, maraqlar öndə durur. Dünən Bob idisə, sabah o adam Con ola bilər. Təbii ki, yeni adamları əməkdaşlığa cəlb etməyə çalışacaqlar. Bu istiqamətdə fəaliyyətimizi gücləndirməliyik. Yeni tərkibdən daha çox senator və konqresmen cəlb etməyə çalışmalıyıq".
Məhəmmədəli QƏRİBLİ