Aqşin Əliyev: "Vyana və Sankt-Peterburq görüşündən sonra mərhələli həll variantı ilə bağlı ilkin razılaşmanın olduğu barədə fikirlər bildirildi"
"Dağlıq Qarabağ münaqişəsi zonasında aprel hadisələri ATƏT-in Minsk Qrupu üçlüyünün vasitəçiliyinin vacibliyini göstərdi". Bu sözləri Rusiyanın ATƏT yanında daimi nümayəndəsi Aleksandr Lukaşeviç təşkilatın Daimi Şurasında çıxışı zamanı deyib.
"Azərbaycan və Ermənistan prezidentlərinin Vyana və Sankt-Peterburq görüşündə əldə edilən razılaşmaların tam icra olunmasına çağırırıq. Fransa və ABŞ-la birlikdə Dağlıq Qarabağ münaqişəsinin həllində konsensusun əldə olunması istiqamətində kömək etməyə davam edəcəyik", - deyə o bildirib.
Rusiyanın ATƏT yanında daimi nümayəndəsinin məlum açıqlaması nəyə hesablana bilər?
Ekspert Aqşin Əliyev qəzetimizə açıqlamasında bildirdi ki, bütün bu bəyanatlar Hamburq görüşündə nəticənin olmasına hesablanıb: "Bundan əvvəl ABŞ-ı təmsil edən həmsədr Uorlik də oxşar bəyanatla çıxış etmişdi. ATƏT-in Minsk Qrupunun keçirdiyi görüşlərin əksəriyyəti qeydiyyat naminə, formal xarakterlidir. Lakin Hamburq görüşünün nə qədər ciddi keçəcəyi həmsədrlərin səyləri nəticəsində müəyyən olunacaq. Azərbaycan bu səfərə hazırlaşır, rəsmi Bakının da öz arqumentləri, tələbləri var. Görünür, Ermənistan hakimiyyəti aprel ayında keçiriləcək parlament seçkilərinə qədər heç bir yükün altına girmək istəmir və sadəcə vaxt qazanmaq niyyətindədir. Bu səbəbdən də həmsədr dövlətlərin nümayəndələri konkret hədəf göstərir. Vyana və Sankt-Peterburq görüşündən sonra mərhələli həll variantı ilə bağlı ilkin razılaşmanın olduğu barədə fikirlər bildirildi. Bundan sonra da Ermənistan qeyri-konstruktiv oldu. Onlar vaxtaşırı ucuz taktiki gedişlər edir, Azərbaycanı qıcıqlandırmaq üçün müxtəlif addımlar atırlar. Amma yalançını mənzilinə qədər qovarlar. Rəsmi Bakı Dağlıq Qarabağa muxtariyyət verməyə hazırdır və bunu açıq şəkildə ifadə edir. Naxçıvan Muxtar Respublikası presedent sayıla bilər. Dağlıq Qarabağdakı erməni milli azlığı silahlı birləşmələrə malik olmamaq şərti ilə bütün mülki strukturları formalaşdıra bilər. Onsuz da zaman bizim güclü olduğumuzu göstərir və Ermənistan, gec-tez, bizim diktə etdiyimiz şərtləri qəbul etməli olacaq. Cənab Prezident dəfələrlə qeyd edib ki, görüş naminə görüşə getmək fikrində deyil. Ermənistan tərəfindən sadəcə diplomatik görüşlərin keçirilməsi təklifi olsa da, Azərbaycan bunu qəbuledilməz hesab edir. Xarci işlər nazirlərinin görüşündə mövqelər bir daha aydınlaşdırılacaq. Ermənistan Azərbaycanın ərazi bütövlüyünə hörmət etmək
fikrində deyilsə, görüşə getməyin heç bir mənası yoxdur".
Məhəmmədəli QƏRİBLİ