Rauf Zeyni: "Bu cür cəsarətli addımlar Ermənistanda olan narazı elektorata rejimlə mübarizə aparmaq üçün əlavə stimul verəcək"
Məlum olduğu kimi, erməni əsilli bir neçə hüquq müdafiəçisi Bakıda sülh konfransında iştirak edib. İnformasiyaya əsasən, Vahan Martirosyan və Vahe Avetyan konfransın başlanğıcına qədər Xocalı soyqırımı qurbanlarının abidəsini ziyarət edib, önünə gül qoyub.
Vahe Avetyan bildirib ki, Xocalıda öldürülmüş günahsız qurbanların sayı onu təəcübləndirib. Avetyanın sözlərinə görə, Xocalı erməni xalqının tarixində qara ləkə olaraq həmişəlik qalacaq: "Beynəlxalq normalar ölkələrin ərazi bütövlüyü və suverenliyinə hörmət olunmasını tələb edir. Ermənistan beynəlxalq hüquqa daim saymazyana münasibət göstərə bilməz, o, Azərbaycanın ərazi bütövlüyünə hörmət etməlidir".
V.Avetyan qeyd edib ki, ictimai təşkilatlar olaraq dəfələrlə bildiriblər ki, Azərbaycanın ərazi bütövlüyünə hörmət edirlər: "Burada olmağımız isə xalq diplomatiyasının tərəfdarı olduğumuzu göstərir".
Onun sözlərinə görə, Bakıda keçirilmiş "Ermənistan-Azərbaycan, Dağlıq Qarabağ münaqişəsi: əsas maneələr və nizamlanma perspektivləri. Ermənistan və Azərbaycandan baxış" konfransında siyasi, sülhməramlı fəaliyyət və digər bəndlər üzrə iş üçün fundamental baza yaradılıb.
V.Avetyan deyib: "Ermənistanda hakimiyyətlə eyni mövqedən çıxış edən ictimai hərəkatın bütün fəaliyyəti bizim azərbaycanlı həmkarlarla yaratmağa çalışdığımız prosesi dağıtmağa yönəlib".
Hüquq müdafiəçisinin sözlərinə görə, o, Dağlıq Qarabağ münaqişəsi haqqında kitab yazıb və onu Bakıda nəşr etmək istəyir. V.Avetyan kitabın satışından əldə olunan gəliri müharibədən zərər çəkmiş azərbaycanlı və ermənilərə verməyə hazır olduğunu deyib.
Beynəlxalq konfransın digər iştirakçısı, "Meridian" qeyri-hökumət təşkilatının sədr müavini, hüquq müdafiəçisi Suzanna Çaqinyan isə bildirib ki, artıq münaqişənin sülh yolu ilə həllinin zamanı çatıb: "Qarabağda erməni və azərbaycanlı gənclərin ölməsi faciədir. Mən Azərbaycan Prezidentinə təşəkkür edirəm. Nəhayət, bu münaqişəyə son qoyulsun. Mən bilirəm ki, Ermənistan hakimiyyəti bu münaqişənin həllini istəmir. Serj Sarkisyan istefa verməlidir. Mənim bu gün burada olmağım Serj Sarkisyanın siyasəti ilə əlaqədardır. Serj Sarkisyan erməni xalqını talan edir. O, prezident yox, işğalçıdır. Serj Sarkisyan erməni xalqına qarşı soyqırımı həyata keçirib".
S.Çaqinyan qeyd edib ki, Sarkisyan onun öldürülməsinə qərar verib: "Mən Ermənistanda hüquqların tapdanmasına qarşı mübarizə aparmışam. Mən izlənirdim. Onlar məni terrorçuluqda belə günahlandırırdılar. Mən bu gün ölüyəm, Ermənistanı tərk etmişəm. Əgər onlar məni həbs edib, məni terrorçu kimi mühakimə etsəydilər, mən ölü olardım. Mən mütəxəssis kimi illərdir ki, ölkəmdə iş tapmamışam. Ermənistanda bütün xalq mənim kimi yaşayır. Hakimiyyət zəbt edilib. Mənim vətəndaşlıqdan imtina barədə Azərbaycan mətbuatında məktubum dərc olunandan sonra Serj Sarkisyan ölümüm barədə qərar vermişdi".
Erməni əsilli fəalların Bakıda səsləndirdiyi obyektiv və cəsarətli fikirlər Ermənistanda narazıların ictimai hərəkatının başlanmasına səbəb ola bilərmi?
Erməni əsilli hüquq müdafiəçilərilə Bakıda sıx təmasda olan Milli Qeyri-Hökumət Təşkilatları Forumunun prezidenti Rauf Zeyni qəzetimizə açıqlamasında bildirdi ki, həmin hüquq müdafiəçiləri Azərbaycana təsadüfən gəlməyib: "Bilirsiniz ki, onlar öz ölkələrində çox tanınmış şəxslərdir. Bir müddət əvvəl onlardan biri sığınacaq üçün məhz Bakını seçdi. Burada qalandan sonra üçüncü ölkəyə təhvil verildi. Hazırda yaşadığı ölkədə də öz fəaliyyətini davam etdirir. Yəni görünür ki, onların məqsədi Ermənistanı tərk etmək olmayıb. Ermənistan tərəfi nə qədər məsələni bu kontekstə yönəltməyə çalışsa da, həmin versiyalar özü-özünü alt-üst edib. Suzanna Çaqinyanın böyük əziyyət hesabına 3 gün əvvəl Ermənistanı tərk edərək Gürcüstan vasitəsilə Azərbaycana keçməsi və burada ermənilərin törətdiyi əməllərə görə bütün Azərbaycan xalqından üzr istəməsi onların məsələyə obyektiv yanaşmasını ortaya qoydu. Təbii ki, Ermənistan cəmiyyətində kifayət qədər tanınan bu şəxslərin atdığı cəsarətli addım həmin ölkədə canlanmaya səbəb olacaq. Hüquq müdafiəçiləri Ermənistanda vəziyyətin çox acınacaqlı olduğunu bildirir. Sarkisyanın ünvanına konkret ittihamlar səsləndirirlər. Ən maraqlısı isə budur ki, xanım Çaqinyan keçirdiyi mətbuat konfransında bildirdi ki, onun hansısa ölkəyə getmək fikri yoxdur, Ermənistana geri qayıtmaq barədə düşünür. Hesab edirəm ki, bu cür cəsarətli addımlar Ermənistanda olan narazı elektorata rejimlə mübarizə aparmaq üçün əlavə stimul verəcək".
Məhəmmədəli QƏRİBLİ