Zaur İbrahimli: “Təəssüf ki, beynəlxalq təşkilatalr, xüsusən insan hüquqlarının müdafiəsi sahəsində çalışan təşkilatlar, aparıcı dövlətlər...”
Torpaqlarımız işğaldan azad edildikdən sonra ərazilərimizdə kütləvi məzarlıqlar aşkar olunmağa başladı, qazıntılar zamanı böyük işgəncələrlə qətlə yetirilmiş azərbaycanlıların sümükləri müəyyən olundu. Ermənilər tərəfindən amansızlıqla öldürülən vətəndaşlarımızın qalıqları bu gün də aşkarlanır.
Ağdərə rayonunun Baş Güney kəndində insana məxsus sümük qalıqları aşkarlanıb. Tapılan sümük fraqmentlərinin Qəribov Balay Ələsgər oğlunun ailə üzvlərinə aid olduğu ehtimal edilir.
Sümük qalıqları ailənin yaşadığı evin həyətində, nəvəsi Bəxtiyar Əsgərov tərəfindən aparılan axtarışlar zamanı aşkar olunub.
Qeyd edək ki, 1992-ci il martın 12-də Baş Güney kəndi erməni silahlı qüvvələri tərəfindən işğal edilən zaman ailənin 5 üzvü itkin düşüb. Bunlar 1890-cı il təvəllüdlü Qəribov Balay Ələsgər oğlu, onun həyat yoldaşı 1928-ci il təvəllüdlü İsmayılova Saray Eyvaz qızı, qızları — 1946-cı il təvəllüdlü Ələsgərova Zabilə Balay qızı və 1954-cü il təvəllüdlü Ələsgərova Ramilə Balay qızı, eləcə də nəvəsi, 1972-ci il təvəllüdlü Xudaverdiyeva Nərgiz Aydın qızı olub.
Aşkarlanan sümük fraqmentləri aidiyyəti qurumlar tərəfindən götürülərək ekspertiza üçün təqdim olunub.
Bakıdakı diplomatik missiyalardan və beynəlxalq təşkilatlardan bu dəhşətli fakta heç bir reaksiya yoxdur. Ermənilərin qətlə yetirdiyi insanlar içində iki yaşlı uşalar da, qadınlar da var. Bu məsələyə niyə beynəlxalq reaksiya verilmir? Söhbət bir ailənin 5 üzvünün qətlindən gedir ki, buna beynəlxalq reaksiya olmalı idi. Amma görmədik...
Politoloq Zaur İbrahimli baki-xeber.com-a bildirdi ki, insan hüquqlarının, xüsusilə də dinc sakinlərin, o cümlədən uşaqların və qadınların kütləvi şəkildə qətlə yetirilməsi faktı beynəlxalq hüququn ən ciddi pozuntusudur. “Hüquqi nöqteyi-nəzərdən, bir hadisənin "soyqırımı", "müharibə cinayəti" və ya "insanlıq əleyhinə cinayət" kimi beynəlxalq səviyyədə tanınması üçün həmin faktın məhkəmə-tibbi ekspertizası ilə təsdiqlənməsi, cinayət işinin açılması və faktların rəsmi sənədləşdirilməsi vacibdir. Lakin, nəzərə alsaq ki, artıq bu vaxtda qədər erməni işğalçılarından azad edilmiş Azərbaycan ərazilərində indiyədək 32 kütləvi məzarlıq aşkarlanıb. Bu məzarlıqlardan çıxarılan meyit qalıqları Birinci Qarabağ müharibəsində itkin düşmüş şəxslərə aiddir. Onların bir çoxunun işgəncələrə məruz qaldığı, əl və ayaqlarının bağlı şəkildə qətlə yetirildiyi ekspertizalarla sübut olunub. Ehtimal etmək olar ki, Qəribov ailəsi üzvləri də kütləvi şəkildə işğalçılar tərəfindən qətlə yetiriliblər. Diqqətə çatdıraq ki, bu vaxta Birinci Qarabağ müharibəsində 3999 nəfər itkin düşmüş şəxs kimi qeydiyyatdadır. Hərbi Prokurorluq tərəfindən məzarlıqlardan 450-dən çox insan meyitinin qalıqları çıxarılaraq müvafiq molekulyar-genetik ekspertizalar aparılır. Qəribov ailəsi üzvlərinin faciəli taleyi və kütləvi qətli Birinci Qarabağ və 44 günlük Vətən Müharibəsində erməni işğalçılarının mülki əhaliyə qarşı qətl, məhv etmə, işgəncə və digər qeyri-insani əməllərin geniş miqyasda, sistemli şəkildə törədildiyini bir daha göstərir. Bu barədə Azərbaycan rəsmiləri, vətəndaş cəmiyyəti nümayəndələri, qurbanların yaxınları deyil, məhz faktlar danışır. Təəssüf ki, beynəlxalq təşkilatalr, xüsusən insan hüquqlarının müdafiəsi sahəsində çalışan təşkilatlar, aparıcı dövlətlər, Aİ strukturları, BMT qurumları bu miqyasa adekvat reaksiya vermirlər”.
Z.İbrahimli hesab edir ki, Azərbaycanlılara qarşı müharibə cinayətlərinə qiymət verilməsində yenə ikili standart ön plana çıxır. Ekspert vurğuladı ki, Azərbaycandan bir qrup QHT bu ilin 4-5 mayında Emənistanda Aİ Siyasi Birliyinin sammitindən əvvəl bir daha Aİ liderlərinə müraciət edərək bu məsələni diqqətə çatdırıblar. “Bu ikili standartların aradan qaldırılması, Ermənistanın cavabdeh saxlanılması üçün sistemli və ardıcıl səylər göstərməliyik. Zamanında Xocalı soyqırımın tanıdılması üçün bu cür iş aparıldı və əhəmiyyətli naliyyətlər əldə olunub. Düşünrəm ki, çoxtərəfli səylərlə Azərbaycanlılara qarşı müharibə cinayətlərinə qiymət verilməsinə də nail olacağıq”-deyə Z.İbrahimli bildirdi.
İradə SARIYEVA
