Akif Nağı: “Kostanyan və Harutyunyanın İrəvana təhvil verilməsi rəsmi Moskvaya qətiyyən sərf etmir”
İrəvan bir daha Moskvadan 1 mart hadisəsində adı hallanan iki keçmiş hökumət məmurunun ekstradisiyasını istəyəcək.
Ermənistanın keçmiş baş prokuroru Gevork Kostanyan və 1 mart istintaq qrupunun keçmiş rəhbəri Vaaqn Harutyunyan 1 mart işi üzrə axtarışdadırlar. Bu barədə Korrupsiyaya Qarşı Mübarizə Komitəsinin sədri Artur Nahapetyan noyabrın 18-də parlamentdə “1 mart işinə yenidən baxılması” mövzusunda keçirilən ictimai müzakirə zamanı bildirib.
Öz növbəsində baş prokuror Anna Vardapetyan Ermənistanın tezliklə Rusiyadan Gevork Kostanyanın ekstradisiyasını sürətləndirməsini xahiş edəcəyini açıqlayıb. İrəvan həmçinin Vaaqn Harutyunyanın ekstradisiyasını tələb etmək niyyətindədir. Hər iki keçmiş yüksək vəzifəli şəxs 1 mart hadisəsi ilə bağlı vəzifə səlahiyyətlərindən sui-istifadə, sübutların saxtalaşdırılması və istintaqın təhrif edilməsində ittiham olunur.
“Ermənistan tərəfinin məlumatına görə, hər ikisi hazırda Rusiyadadır. Biz Rusiya ilə çoxtərəfli müqavilə - Kişinyov Konvensiyası çərçivəsində işləyirik. Lakin Rusiya hələlik onları ekstradisiya etməyə razılıq verməyib. Ermənistan Baş Prokurorluğu tezliklə əvvəllər rədd edilmiş ərizəyə yenidən baxılmasını tələb edən ərizəni Rusiya Federasiyasına yenidən təqdim edəcək”, - Vardapetyan bildirib.
Xatırladaq ki, 2008-ci il martın 1-də İrəvanın mərkəzində hökumətlə müxalifət arasında baş verən qarşıdurma nəticəsində 8 nümayişçi və Daxili Qoşunların 2 hərbçisi həlak olub.
Moskva bu iki erməni məmurunu niyə vermir?
“...Proses Rusiyanın əleyhinə çevriləcək”
Azad Vətən Partiyasının sədri Akif Nağı “Bakı-Xəbər”ə bildirdi ki, 2008-ci ilin mart hadisələri Ermənistan tarixində qara bir gün hesab edilir. “Çünki həmin vaxt Köçəryan-Sarkisyan klanı hakimiyyəti əldə saxlamaq üçün cəhdlər etdilər. Qarabağ klanını hakimiyyətdə saxlamaq üçün seçkini saxtalaşdırmaq kimi məsələlər də vardı. O dövrdə Köçəryan hakimiyyəti öz silahdaşı Sarkisyana ötürürdü. Buna da erməni cəmiyyətində ciddi etirazlar vardı, aksiyalar keçirilirdi. Paşinyan hökuməti mart hadisələrinin baş verməsində rolu olanları cəzalandırmaq istəyir. Hesab edirəm ki, o dövrdə baş prokuror və istintaq qrupunun rəhbəri olmuş şəxsləri Rusiyadan geri almaq və məhkəmə prosesini onlar üzərində qurmaq istəyirlər. Bu proses eyni zamanda Köçəryana və Sarkisyana qarşı yönələcək. Bu böyük bir prosesə hazırlığın başlanğıcıdır. Mart hadisələrində Rusiyanın da iştirakı istisna deyil. Sarkisyanı ilk dəfə Köçəryanın yerinə prezident gətirmək istəyirdilər və bu da Rusiyanın ssenarisi idi. Rusiya bu gün də Köçəryanın, Sarkisyanın dəstəsinə dəstək verir. Ona görə də, iki nəfər keçmiş dövlət məmurunun Ermənistana təhvil verilməsi və həmin şəxslər üzərində məhkəmə qurulması Rusiyanın maraqlarına uyğun deyil. Çünki bu, Rusiya üzərində məhkəmə qurulması demək olacaq, proses Rusiyanın əleyhinə çevriləcək. Bu səbəbdən də Rusiya onları İrəvana verməkdən imtina edir və bütün vasitələrlə onların tələb və müraciətlərini yerinə yetirməməyə çalışır. Məhkəmədə Rusiyanın iştirakı ilə bağlı faktlar ortaya çıxacaq. Hətta ehtimal etmək olar ki, Rusiya həmin o iki şəxsin həyatına qəsd edib onları aradan götürsün. Çünki onlar Rusiya ilə bağlı olduqlarına görə çox şey bilirlər. Bu baxımdan, Kostanyan və Harutyunyanın İrəvana təhvil verilməsi rəsmi Moskvaya qətiyyən sərf etmir. Məsələ bu şəkildədir”.
A.Nağı hesab edir ki, onlar Ermənistana təhvil verilərsə, eyni zamanda Köçəryanla, Sarkisyanla bağlı yeni faktlar üzə çıxacaq, Rusiyanın onların əli ilə Ermənistanda törətdiyi cinayətlər ifşa olunacaq. “Ən azı, tarixi 1997-ci ildən başlayan bir sıra cinayətlər var. Burada Levon Ter-Petrosyana qarşı atılan addımlar, Ermənistan parlamentinin gülləbaran edilməsi hadisələrini və sairi qeyd edə bilərik. Bunların hamısında da Rusiyanın əli var. Bu gün əgər 2008-ci il hadisələrini araşdırmağa başlasalar (o hadisədə itkilər çox oldu, xeyli sayda adam həyatını itirdi, yaralananlar da oldu-A.N), bu, Rusiyanın cinayətlərinin üzə çıxarılması olacaq. Buna görə də Rusiya hələ müqavimət göstərir. Bu, məsələnin bir tərəfidir. Digər tərəfdən, Paşinyan çalışır ki, bu hadisələrdə iştirakı olanların heç biri cəzasız qalmasın. Yəni Moskvaya qaçanlar geri qaytarılmalıdır və onlar cəzalarını almalıdır. Eyni zamanda onların şahid ifadələrinə əsasən Köçəryan, Sarkisyan cəzalandırılmalıdır. Paşinyanın məsələyə yanaşması belədir ki, cinayətkarlar cəzasız qalmamalıdır. Bu prosesdə Rusiya tərəfindən iştirak edənlər də onlar tərəfindən cəzalarını alsınlar. Bu cinayətdə Rusiya tərəfdən kimlərinsə iştirakı məhkəmə qərarı ilə təsdiqlənərsə, Paşinyan onların beynəlxalq axtarışa verilməsi, yaxud onlara qarşı beynəlxalq tribunalın qurulması ilə bağlı təşəbbüs göstərə bilər. Burada həmçinin Paşinyanın özünün də bir şəxsi marağı var. Çünki həmin etiraz aksiyalarında Paşinyan da birbaşa iştirak etmişdi və həmin etiraz aksiyasında iştirak etdiklərinə görə həbs olunanların içində Paşinyan da vardı, o, 7 il azadlıqdan məhrum edilmişdi. Düzdür, bir az yatandan sonra çıxdı və Ermənistanda keçirilən parlament seçkilərində iştirak etdi. Ona görə də bu məsələ ilə bağlı onun şəxsi incikliyi də var. Rusiyanın iştirakı ilə onun özünün də içində olduğu insanlara qarşı belə bir ədalətsizlik ortada oldu. Həm Ermənistanın keçmiş rəhbərliyinə qarşı öz şəxsi incikliyini ortaya qoyur, həm də Rusiya rəhbərliyinə qarşı. Yəni Paşinyanın Rusiyaya qarşı mövqe tutmasının səbəblərindən biri də vaxtilə Rusiyanın sifarişi ilə Paşinyan və onun ətrafındakı adamlara verilən cəzalarla, onların azadlığının, fəaliyyətinin məhdudlaşdırılması ilə bağlıdır. Burada başqa bir məsələ də var ki, Paşinyanın özünün ümümi bir xətti var, antirusiya mövqeyi tutur, Qərb xətti ilə gedir. Hesab edirəm ki, buna həmçinin Paşinyan özünün antirusiya siyasətinin tərkib hissəsi kimi baxır. Yəni bu məhkəməni qurmaqla, bu caniləri cəzalandırmaqla Rusiyaya qarşı mövqeyini bir daha nümayiş etdirmək istəyir”-deyə A.Nağı bildirdi.
İradə SARIYEVA
