Rəsul Cahangirli: “Mərkəzi Asiyanın Avropaya çıxışı baxımından ən qısa yol bu dəhliz üzərindən keçir”
Zəngəzur dəhlizinin açılması bütün Mərkəzi Asiya ölkələrinə fayda gətirəcək. Bu barədə Prezident İlham Əliyev Özbəkistanın UzA agentliyinə müsahibəsində bildirib.
Dövlət başçısı, həmçinin qeyd edib ki, ölkəmizdə yaradılan müasir nəqliyyat infrastrukturu, o cümlədən ticarət donanması, yaxın illərdə gücü 25 milyon tona çatacaq Ələt Beynəlxalq Ticarət Limanı, Bakı-Tbilisi-Qars dəmir yolu və ölkənin doqquz beynəlxalq hava limanı Azərbaycanın qlobal nəqliyyat və logistika qovşağı kimi rolunu gücləndirən amillərdir.
Ümumilikdə, Zəngəzur dəhlizinin Orta Asiya ölkələri üçün iqtisadi və digər faydalarını ekspertlər necə dəyərləndirir?
“Bu, sözügedən ölkələrin iqtisadi inkişafına, ticarət dövriyyəsinin genişlənməsinə müsbət təsir edəcək”
Sözügedən məsələni “Bakı-Xəbər”ə şərh edən ekspert Rəsul Cahangirlinin fikrincə, Prezident Əliyevin toxunduğu məsələlər Zəngəzur dəhlizinin qlobal əhəmiyyət kəsb etməsinin göstəricisidir: “Düzdür, Zəngəzur dəhlizi Azərbaycan üçün müstəsna əhəmiyyətə malikdir. Çünki bu dəhlizin hesabına Azərbaycanın əsas hissəsi ilə Naxçıvan arasında birbaşa quru əlaqəsi qurulacaq, maneəsiz gediş-gəliş təmin ediləcək. Ancaq nəzərə almaq lazımdır ki, bu dəhlizdən həm də Mərkəzi Asiya ölkələri faydalanacaq. Öz məhsullarını Türkiyəyə, Avropaya ixrac edəcəklər. Eyni zamanda, əks istiqamətdə idxal təmin ediləcək. Nəzərə almaq lazımdır ki, Zəngəzur dəhlizi Orta Dəhlizin bir halqasıdır. Özü də vacib halqası. Orta Dəhlizin tam funksional olması bilavasitə Zəngəzur dəhlizi ilə bağlıdır. Ona görə ki, bu dəhliz hesabına məsafə qısalacaq. Məsafənin qısalması isə daşıma xərclərinin azalması deməkdir. Üstəlik, Zəngəzur dəhlizi Çindən Avropaya qədər uzanan və tarixi marşrutların üzərində yerləşən bir dəhlizdir. Elə bir vəziyyət, fürsət yaranıb ki, heç vaxt olmadığı qədər Azərbaycan üzərindən daşımalara zərurət yaranıb. Bir tərəfdən Rusiya-Ukrayna müharibəsi, o biri tərəfdən Yaxın Şərqdəki qeyri-stabilliyə görə məlum marşrutlar tam gücü ilə işləmir. Bu səbəbdən Zəngəzur dəhlizinin önəmi hər keçən gün daha da artır. Ona görə də Prezidentin toxunduğu məqamlar və Zəngəzur dəhlizinin bütün Mərkəzi Asiya ölkələrinə fayda gətirəcəyini qeyd etməsi təsadüfi deyildi. Bu, Zəngəzur dəhlizinin əhəmiyyəti barədə ən vacib mesajlardan biri idi. Mərkəzi Asiyanın Avropaya çıxışı baxımından ən qısa yol bu dəhliz üzərindən keçir. Bu, sözügedən ölkələrin iqtisadi inkişafına, ticarət dövriyyəsinin genişlənməsinə müsbət təsir edəcək”.
Vidadi ORDAHALLI
