Qulamhüseyn Əlibəyli: “Sözügedən müraciət Rusiyanın düşdüyü ağır vəziyyətlə əlaqədardır”
Rusiyanın xarici işlər naziri Sergey Lavrovun ardınca prezident Vladimir Putinin köməkçisi və mətbuat katibi Dmitri Peskov da ABŞ prezidenti Donald Trampa müraciət edərək, Ukraynadakı hərbi münaqişənin həlli ilə bağlı Kreml ilə təmasları bərpa etməsini xahiş edib:
“Biz səmimi olaraq ümid edirik ki, Prezident Tramp hələ də Ukrayna probleminin siyasi və diplomatik yolla həllinə yardım etməyə hazırdır”.
Peskov Birləşmiş Ştatlar və Rusiyanı nəzərdə tutaraq, “tərəflər üçün çox parlaq üfüqlərin açıldığını”, mövcud vəziyyətin “vaxt itirməyə, pul itirməyə, mənfəət itirməyə” gətirib çıxardığını bildirib.
Burada diqqəti çəkən məqam odur ki, ABŞ-ın “Rosneft” və “Lukoyl” neft şirkətlərinə qarşı sanksiyaların qüvvəyə minəcəyi 21 noyabr yaxınlaşdıqca Rusiyadan belə çağırışların sayı artır. Əvvəlcə xarici işlər naziri Lavrov oxşar məzmunda müraciət edib, indi də prezident köməkçisi Peskov. Nə baş verir?
“Yeni sanksiyalar problemləri daha da kəskinləşdirəcək və Kreml bunların fərqində olduğu üçün danışıqlarla bağlı çağırış edir”
Sözügedən məsələ ilə bağlı fikirlərini “Bakı-Xəbər”lə bölüşən sabiq millət vəkili, hüquqşünas Qulamhüseyn Əlibəylinin fikrincə, ümumiyyətlə, həm Lavrovun, həm Peskovun müraciəti Rusiyanın düşdüyü ağır vəziyyətlə əlaqədardır: “Rusiya faktiki olaraq dünyadan təcrid edilmiş vəziyyətdədir. Avropa ölkələri ilə, ABŞ-la əlaqələr yox dərəcəsindədir. Rusiyaya qarşı çoxsaylı sanksiya paketləri tətbiq edilib. Düzdür, Rusiyanın ərazisi böyükdür, təbii sərvətləri çoxdur. Bir sıra hallarda sanksiyalardan yayına bilir, amma istər-istəməz müasir dövrdə ərazinin böyüklüyü, təbii sərvətlərin çoxluğu heç də hər zaman problemləri həll etmir. Mütləq digər dövlətlərlə qarşılıqlı normal münasibətlər olmalıdır. Həm iqtisadi, həm siyasi, həm də mədəni münasibətlər olmalıdır ki, dövlət öz daxilində inkişaf etsin. Rusiya indi çətin vəziyyətə düşüb. Düzdür, Tramp prezident seçiləndən sonra yaranan əlaqələr Rusiyanı həvəsləndirdi. Kremldə gözləntilər var idi ki, Tramp onların maraqlarını müdafiə edəcək, Ukraynanı güzəştə sövq edəcək. Ona görə də daha ağır şərtlər irəli sürdü, müharibəni şiddətli müstəviyə keçirdi. Trampın atəşkəslə bağlı müəyyən təklifləri oldu, Ukrayna qəbul etdi, amma Rusiya bunu rədd etdi. Baxmayaraq ki, bu, Rusiyanın maraqlarına daha uyğun idi. Nəticədə danışıqlar, müzakirələr dayandırıldı. Rusiyaya qarşı sanksiyaların daha da sərtləşdirilməsi gündəmə gəldi. Növbəti sanksiyalar hazırlandı, ABŞ “Rosneft” və “Lukoyl” kimi nəhəng neft şirkətlərinə qarşı sanksiyalar qəbul etdi. Əminəm ki, bu sanksiyaların Rusiyanın enerji sektoruna təsiri ciddi olacaq. Zatən Rusiyanın enerji sektoru yaxşı vəziyyətdə deyil və xeyli ciddi problemlər var. Yeni sanksiyalar problemləri daha da kəskinləşdirəcək və Kreml bunların fərqində olduğu üçün danışıqlarla bağlı çağırış edir. Çünki danışıqlar başlasa, sanksiyalar təxirə salına bilər. Ancaq Rusiya bununla çalışır ki, ABŞ-ı bir qədər çətin vəziyyətə salsın. Məqsəd vaxt qazanmaqdır. O üzdən, bu, Putinin növbəti hiyləsidir. Ancaq reallıqdan irəli gələn hiylədir. Çünki reallıq ondan irəli gəlir ki, Rusiyanın enerji sektorunda vəziyyət yaxşı deyil”.
Vidadi ORDAHALLI
