Azər Həsrət: “Yunanıstanda türk düşmənçiliyi var”
Gəncədən havaya qalxan Türkiyə Hərbi Hava Qüvvələrinə məxsus "C130" tipli hərbi nəqliyyat təyyarəsinin Gürcüstan ərazisində qəzaya uğraması nəticəsində həlak olan 20 hərbiçinin nəşinin Türkiyəyə aparıldığı məlumdur.
Faciədən dolayı Türkiyənin acılı günlər yaşadığı bir vaxtda Yunanıstanın hava qüvvələri ordusu “C130” təyyarələrinin şəkillərini “günün fotosu” adı altında paylaşıb. “C130” təyyarələrinin düzülmüş formada şəkillərini paylaşıblar. Bununla onların nə mesaj vermək istədikləri məlum deyil, səbəbini özləri bilirlər. Amma Türkiyənin bir “C130” təyyarəsi düşüb dağılıb və 20 hərbiçisi faciəli şəkildə həlak olub. Bu vəziyyətdə Yunanıstan tərəfi bu şəkilləri yaymaqla, sanki Türkiyəyə acıq verir. Türkiyə kanalları da bunu “Yunanıstandan əxlaqız paylaşım” adlandırıb.
Belə məqamda Yunanıstanın belə bir başlıq altında foto paylaşmasının mahiyyəti, mənası nədir?
Təbii ki, Yunanıstan əxlaqsızlıq etdi, “C130” təyyarələrinin kompleks halda çəkilmiş fotolarını nümayiş etdirdi, həm də “günün fotosu” adı altında.
Burda məqsəd nə ola bilər?
“Qardaş Türkiyənin bu ağır günlərində Yunanıstanın bu cür davranışı, əlbəttə əxlaqsızlıqdır”
Siyasi şərhçi Azər Həsrət “Bakı-Xəbər”ə bildirdi ki, Ermənistan Azərbaycan Respublikası üçün necə bir dövlətdirsə, Yunanıstan da qardaş Türkiyə üçün elə bir dövlətdir. “Yəni Yunanıstanın gözü qardaş Türkiyənin torpaqlarındadır. Yunanlar türkləri həmişə düşmən hesab edirlər. Hətta onlar İstanbulu yenidən ələ keçirmək iddialarındadırlar. Bütün bunların fonunda onların belə bir paylaşım etməsi təəccüblü deyil. Üstəlik də Yunanıstanın daxilində - Batı Trakya deyilən bölgədə böyük bir türk toplumu var. Yeri gəlmişkən, XX yüzilin əvvəlində həmin bölgədə Batı Trakya Cumhuriyyəti qurulmuşdu, yunanlar onu məhv etdilər. Necə ki, Rusiya 1920-ci ildə Azərbaycan Xalq Cumhuriyyətini məhv etdi. Yəni Yunanıstanda türk düşmənçiliyi var. Ondan savayı da Yunanıstanda türk milli kimliyinin dilə gətirilməsi ümumiyyətlə yasaqdır. Yunanıstandakı türklərə türk azlıq yox, “müsəlman azlıq” deyilir. Əgər kimsə hardasa, bir sənəddə türk azlığı ifadəsi işlədərsə, yaxud çıxışlarında bu ifadəyə yer verərsə ona qarşı təqiblərə başlanılır, o adam cəzalandırılır. Tələb budur ki, Yunanıstanda türklər sadəcə olaraq “müsəlman azlıq” kimi dilə gətirilə bilər. Yəni faktiki olaraq türk düşmənliyi həm Yunanıstanın içində, həm də dışında həmişə özünü göstərməkdədir. Bir tərəfdən də Kıbrıs məsələsi. Quzey Kıbrıs Türk Cumhuriyyətinin güneyində olan Kıbrıs rum-yunan kəsimi eyni düşmənçiliyi edir. Yəni qardaş Türkiyənin bu ağır günlərində Yunanıstanın bu cür davranışı əlbəttə əxlaqsızlıqdır. Düşmən olanda da adam əxlaqlı olmalıdır, yüksək səviyyəli olmalıdır. Ona görə də xatırlatmaq istəyirəm ki, Azərbaycan xalqı və dövləti Yunanıstan məsələsində qardaş Türkiyəyə münasibətini birmənalı ifadə edib, edəcək də. Xatırlayırsınızsa, illər əvvəl Yunanıstan Azərbaycana bir səfir təyin etmişdi, o səfiri Prezident İlham Əliyev qəbul edərkən ona açıq mətnlə xəbərdarlıq etdi ki, Yunanıstanın Türkiyəyə etdiyi Azərbaycana etdiyidir. Bunu da niyə demişdi? Çünki həmin vaxt Yunanıstan qardaş Türkiyəyə hədələr yağdırmaqla məşğul idi. Təbiidir ki, Türkiyə ilə bacaracaq gücü yoxdur. Amma təxribatlar törədirdi. Ona görə də Azərbaycan Prezidenti İlham Əliyev qardaş Türkiyəyə dəstəyi bu cür ifadə etmişdi. Bu baxımdan hesab edirəm ki, Yunanıstan təkcə Türkiyəyə qarşı tərbiyəsizlik etmir, həm də Azərbaycan Respublikasına, Azərbaycan xalqına, bütün türk dünyasına qarşı tərbiyəsizlik edir”.
A.Həsrətin fikrincə, Azərbaycanın müvafiq qurumları da bu məsələyə reaksiya verməlidir, eyni zamanda Türk Dövlətləri Təşkilatının rəhbərliyi buna ayrıca münasibət bildirməlidir. “Yəni Yunanıstan və onun kimilər, yaxud Yunanıstanı üstümüzə qaldıranlar görməlidir ki, biz türk xalqları birlikdə onların cavablarını veririk. Yeri gəlmişkən, bu qədər xəbis olduqlarına görə, heç sayları da artmır. Xatırlatmaq istəyirəm, 100 il öncə qardaş Türkiyə ilə Yunanınıstanın əhalisinin sayı bərabər idi. 8-10 milyon civarında Yunanıstan əhalisi idi, bir o qədər də qardaş Türkiyənin əhalisi idi. Bu gün Türkiyə əhalisini sayı 85 milyondu, amma Yunanıstan əhalisinin sayı 10 milyonun ətrafındadır, yerində saymaqdadır. Görürsüzmü, xəbis millətlər, xəbis dövlətlər heç insan sayını da artıra bilmirlər. Ona görə də düşünürəm ki, biz türk xalqları olaraq buna ortaq bir reaksiya verməliyik”-deyə A.Həsrət qeyd etdi.
İradə SARIYEVA
