Sahil Kərimli: “Hərbi parad keçirəcəksə, bu özünü rüsvay etməkdən başqa bir şey olmayacaq”
Ermənistanın baş naziri Nikol Paşinyan parlamentdə çıxışında Bakıda keçirilən möhtəşəm hərbi paraddan da danışıb və bildirib ki, belə bir tədbir keçirmək niyyətindədir: “Bəli, Azərbaycanda keçirilən Zəfər paradından sonra bu mövzu Ermənistanda da aktuallaşıb. Əgər paradın keçirilməsi barədə qərar qəbul olunsa, tədbir çox təsirli ola bilər. Əhalinin yeni alınan hərbi texnikaları görmək istəyi böyükdür”.
O bildirib ki, artıq bununla bağlı kifayət sayda vətəndaş müraciət edib: “Biz yaxın gələcəkdə onların silahları görməsi üçün təşkilatlanacağıq. Cəmiyyətimizin müxalifətin buradakı iddialarının da yalan olduğunu bilməsi də vacibdir”.
Hərbi paradın təşkili məsələsinə gəldikdə, Paşinyan deyib: “Hərbi paradın keçirilməsi ilə bağlı fikirlər var, keçirilməməsi ilə bağlı fikirlər də var...”
Paşinyanın sözlərinə görə, “noyabr və ya dekabr aylarında hərbi parad təşkil etsəydilər, bu, təsirli olardı”.
“Ermənistanda hərbi paradın keçirilməsi həm də bölgə üçün hərbi təhdid kimi qiymətləndirilə bilər”
Siyasi ekspert Sahil Kərimli “Bakı-Xəbər”ə bildirdi ki, Ermənistanda hərbi parad keçirilməsi ilə bağlı son günlər müəyyən çağırışlar var: “Bu istiqamətdə baş nazir Nikol Paşinyanın da açıqlamalarını görmüşük. Sual olunur, Ermənistan hərbi paradı hansı hərbi texnika, hansı hərbi qüvvə və hansı məqsədlə keçirir? Ermənistan nə üçün hərbi parad keçirməlidir? Ermənistan Azərbaycanla müharibədə biabırçı məğlubiyyətə uğramış bir ölkədir. Əgər Ermənistan özünü dünya qarşısında rüsvay etmək istəyirsə, buyurub o paradı keçirsin. Beş il bundan əvvəl Ermənistan ordusu Azərbaycan ordusu qarşısında diz çöküb məhv olub. Bu ordu uzun on illər özündə təpər tapıb ayağa qalxmaq iqtidarında olmayacaq. Ermənistan hansı üzlə hərbi parad keçirmək istəyir, buna gücü, hərbi potensialı varmı ki, bu istəklə çıxış edir?
Uzun illər işğalçılıq siyasəti yürütmüş, sonda Azərbaycanla müharibədə darmadağın edilmiş Ermənistan hansı gününə parad keçirir? Onun ordusu məhv edildi. Məğlub Ermənistanın hərbi texnikaları bu gün Azərbaycanın Hərbi Qənimətlər Parkında sərgilənir. Bu elə Ermənistanın “paradıdır”. Yəni Ermənistanın hərbi texnikaları İrəvanın mərkəzində yox, Azərbaycanın paytaxtı Bakıda Hərbi Qənimətlər Parkında saxlanılır. Bu da Ermənistan üçün çox böyük göz dağıdır. Xüsusilə də onu vurğulamalıyıq ki, son dövrlər Ermənistan hökuməti xarici ölkələrdən müasir silah-sursat almaları ilə bağlı açıqlamalar verib. Müharibədən sonra Ermənistan Hindistandan, Fransadan və başqa Avropa ölkələrindən silahlar alıb. Amma bu o demək deyil ki, Ermənistan ordusunun, silahlı qüvvələrinin silahları, hərbi texnikası yüksək səviyyədədir. Hesab edirəm ki, Ermənistanda hərbi paradın keçirilməsi həm də bölgə üçün hərbi təhdid kimi qiymətləndirilə bilər. Yəni Ermənistan güc nümayiş etdirməyə çalışır, öz hərbi gücünü göstərməyə cəhd edir ki, bu da qəbuledilən deyil. Açıq demək lazımdır ki, Ermənistanın aldığı silah-sursat Azərbaycanın hərbi arsenalı ilə heç müqayisəyə gəlməz. Ermənistan hərbi parad keçirəcəksə, bu özünü rusvay etməkdən başqa bir şey olmayacaq”.
S.Kərimli qeyd etdi ki, Ermənistanın planlaşdırdığı paradla hərbi güc nümayiş etdirmək istəkləri heç də qəbuledilən deyil. “Ermənistan hərbi parad keçirməyi planlaşdırmaqdansa, paraflanmış sülh müqaviləsinin imzalanması istiqamətində addımlar atsın, konstruktiv mövqe nümayiş etdirərək Azərbaycanın tələblərini yerinə yetirsin, konstitusiyasını dəyişsin, Azərbaycana qarşı ərazi iddialarından konstutsiya səviyyəsində əl çəksin. Zəngəzur dəhlizinin açılmasına şərait yaratsın, nəqliyyat-kommunikasiya xətlərinin şaxələnməsinə dəstək olsun və Azərbaycan-Ermənistan sərhədlərinin delimitasiya və demarkasiya prosesini sürətləndirsin”-deyə S.Kərimli bildirdi.
İradə SARIYEVA
