Elşad Həsənov: “Rusiya Xarici Kəşfiyyat Xidməti Ermənistanda pozuculuq işlərini daha da gücləndirir”
Bir neçə gün əvvəl Rusiyanın Xarici Kəşfiyyat Xidməti (XKX) tərəfindən iddia irəli sürülüb ki, Ermənistan Rusiya taxılını daha bahalı Ukrayna taxılı ilə əvəz etməyi planlaşdırır və onu Avropa Birliyinin vəsaitləri hesabına almaq niyyətindədir.
Yəni ermənilər Moskvadan “azad olmaq” və lazımi taxılın bir hissəsini “müstəqil” ölkədən almaqla Ukraynaya kömək etmək istəyirlər. Əvəzində isə Brüsseldən Ukrayna taxılının dəyərini kompensasiya etməsi istənilir.
Ermənistanın Baş naziri Nikol Paşinyan, ölkəsinin Rusiya taxılı əvəzinə Ukrayna taxılını seçərək Moskvadan "qurtulmağı" planlaşdırdığı barədə məlumatların yalan olduğunu bildirib.
Paşinyan mətbuat konfransında bu iddianı rədd edib: "Bu ola bilməz. Bu tamamilə cəfəngiyatdır".
Rusiya Xarici Kəşfiyyat Xidməti Paşinyanın təkzib etdiyi bu xəbəri niyə yayıb?
“Bu həm də informasiya mübarizəsinin getdiyini göstərir”
Siyasi ekspert Elşad Həsənov “Bakı-Xəbər”ə bildirdi ki, Paşinyan Rusiya XKX-nin iddiasını təkzib etdi və onu absurd adlandırdı. “Eyni zamanda Avropa İttifaqının, Avropanın Ermənistandan Rusiya qazından, neftindən, eləcə də taxılından imtina etməsini tələb etməsi Nikol Paşinyanı çətin vəziyyətə salır. Ona görə də Paşinyan açıq bazar iqtisadiyyatına guya uyğun olaraq digər ölkələrdən də taxıl almağa haqları olduğunu bildirir. Çünki Avropa İttifaqı istəyir ki, Rusiyadan heç nə, o cümlədən də taxıl alınmasın, bu ölkənin iqtisadi durumu ağırlaşsın. Taxılın qiyməti bahadır və Ermənistan da baha qiymətə taxılı Ukraynadan alsın və bu taxılın da pulunu Avropa İttifaqı konpensasiya edir. Həm də artıq Rusiya Ermənistanda hakimiyyəti dəyişmək üçün son mübarizəyə başlayıb. Gələn il Ermənistanda keçiriləcək parlament seçkilərinə bu ölkədəki Rusiyayönümlü partiyalar, siyasi qüvvələr, beşinci kolonun adamları, Rusiyanın müəyyən dairələri, o cümlədən də XKX ciddi hazırlaşır. Rusiya Xarici Kəşfiyyat Xidməti Ermənistanda pozuculuq işlərini daha da gücləndirir. Bunu bilən Paşinyan da müəyyən oyunlar oynamağa məcburdur. Mübarizə, müharibə həm də informasiya texnologiyaları vasitəsilə aparılır, hazırda informasiya müharibəsinin aparıldığı da göz önündədir. Bu həm də informasiya mübarizəsinin getdiyini göstərir. Ona görə də Paşinyan etmək istədiyini danır və bunu absurd adlandırır. Halbuki, Paşinyan Rusiya ilə əlaqələri çoxdan kəssə də, ancaq bunu tam həyata keçirməyə imkanı yoxdur. Edə biləcəklərini etdi, amma daha artığına onun gücü çatmır, o cümlədən də Rusiyanın adamları hesab edilən müxalif qüvvələri ciddi nəzarətə ala bilmir. Gücü çatanları artıq həbs edib, o cümlədən 10 nəfər kilsə mənsubunu həbsxanaya atıb. II Qareginə qarşı açıq cəbhə açıb, onun fəaliyyətinin qeyri-legitim olduğunu bildirir. Yəni Rusiya da özünün keçmiş vassalı olmuş Ermənistanı bu gün əldən vermək istəmir”.
E.Həsənovun fikrincə, bu baxımdan mübarizə getdikcə qızışır və informasiya müharibəsi, mübarizəsi gələn ilin iyun ayında keçiriləcək parlament seçkilərinə qədər getdikcə artan xətlə davam edəcək. E.Həsənovun sözlərinə görə, eyni zamanda Paşinyan da ciddi qərarlar qəbul etmək istəyində olacaq və bununla müəyyən məsələləri də həll edəcək. “Ona görə də onun absurd adlandırdığı məsələ əslində Paşinyanın həyata keçirmək istədiyi məsələdir. Rusiya Xarici Kəşfiyyat İdarəsi də bu xəbərini yaymaqla əslində nələr olacağı barədə yeni praktiki addımlar atmağa hazırlaşır. Hesab edirəm ki, seçki yaxınlaşdıqca Ermənistanda daha böyük siyasi hadisələr, siyasi gərginlik, müxalifətlə hakimiyyət arasında ciddi toqquşmalar planlaşdırılır”-deyə E.Həsənov qeyd etdi.
İradə SARIYEVA
