Əli Mustafa: “Rusiya XİN-in bəyanatı səmimi deyil”
Ermənistana buğda tədarükü Azərbaycan və Gürcüstandan keçən yeni dəmir yolu marşrutu ilə mümkün qədər tez təşkil olunub. Bu barədə Rusiya Xarici İşlər Nazirliyinin bəyanatında deyilir.
“İlk partiya bu il noyabrın 6-na keçən gecə gəlib. Bu, regional kommunikasiyaların qarşısının alınması üzrə Üçtərəfli İşçi Qrupu çərçivəsində görülən səylər və Rusiya, Ermənistan, Azərbaycan liderləri arasında 2020-2022-ci illərdə əldə edilmiş razılaşmalar nəticəsində mümkün olub. Rusiya yuxarıda adları çəkilən Cənubi Qafqaz respublikaları arasında münasibətlərin tənzimlənməsində iştirak edərkən həmişə onların suveren milli maraqlarını rəhbər tutub. Lakin Qərbin vasitəçilik səyləri hələ zamanın sınağından çıxmayıb” - deyə Rusiya XİN qeyd edib.
Bəyanatda iddia edilir ki, əldə edilən bu nəticə 2020-2022-ci illərdə əldə edilmiş razılaşmalar sayəsində mümkün olub. Nə dərəcədə doğru yanaşmadır? 8 avqust Vaşinqton görüşü olmadan bu necə reallaşa bilərdi?
“Regionda indi heç bir rol oynamadığını anladığına görə, bunu keçmişdəki fəaliyyəti ilə ört-basdır etmək istəyir”
Sözügedən məsələni “Bakı-Xəbər”ə şərh edən siyasi şərhçi Əli Mustafanın fikrincə, Rusiya tərəfinin son açıqlaması təəccüblüdür: “Hətta bu, ikrah hissi yaradır. Sadəcə olaraq bir şeyi anlamaq lazımdır ki, regionda baş verən proseslərdə Rusiya özünün də rol aldığını, hansısa fayda verdiyini deməyə çalışır. Düzdür, 2020-2022-ci illərdə üçtərəfli komissiyanın fəaliyyəti olub, amma real heç bir nəticə olmayıb. Məsələ ondadır ki, 2020-ci ilin 10 noyabrında imzalanan üçtərəfli razılaşmaya əsasən kommunikasiya xətləri açılmalı idi. Zəngəzur dəhlizi işə düşməli idi. Ermənistan silahlı qüvvələri Qarabağdan çıxarılmalı idi. Lakin bu müddət ərzində Rusiyanın moderatorluğu ilə aparılan danışıqlar bir nəticə vermədi. Çoxsaylı nöqsanlar var ki, onu Rusiya tənqid etməli idi, amma etməyib. Yaxud da elə əməllər var idi ki, bunlar törədilməməli idi, amma törədilib. Özü də Rusiya sülhməramlılarının gözü qarşısında bunlar baş verib. O üzdən, Rusiya XİN-in bəyanatı səmimi deyil. Sanki Rusiya “regionda baş verən proseslərdə mən də varam” demək istəyir. Halbuki, bir sıra məsələlər Azərbaycanla Ermənistan arasında birbaşa danışıqlar sayəsində əldə edilib. Yəni vasitəçilər olmadan nəticə əldə olunub. Onlardan biri də sərhədlərin müəyyən hissəsinin demilitasiyası ilə bağlıdır. Ən başlıcası, Vaşinqtonda prezident Donald Trampın şahidliyi ilə Azərbaycanla Ermənistan sülh sazişinin bəndlərini parafladılar. Zəngəzur dəhlizinin ABŞ şirkətinə icarəyə verilməsi ilə bağlı razılıq əldə edildi. Bütün bunların fonunda, regionda baş verən proseslərdə özünün indi heç bir rol oynamadığını anladığına görə, bunu keçmişdəki fəaliyyəti ilə ört-basdır etmək istəyir. Dolayı yolla həm də regiona olan maraqlarını ifadə etmək istəyir. Demək istəyir ki, mən də Cənubi Qafqazda varam, harasa getməmişəm. Düzdür, Rusiya böyük qonşu dövlətdir. Kimsə istəməz ki, bu ölkə ilə problemi olsun. Ancaq yaxşı olardı ki, bu ölkənin siyasəti sülhpərvər olsun, qonşu dövlətlərin işinə qarışmasın. Belə yanaşma olarsa, bu, region dövlətlərinin maraqlarına uyğundur”.
Vidadi ORDAHALLI
