Məhəmməd Əsədullazadə: “...Rusiya və Azərbaycan arasındakı münasibətlərə kölgə salmağa xidmət edir, bu da heç bir nəticə verməyəcək”
2020-ci ilin 9 noyabrında, İkinci Qarabağ müharibəsi zamanı Azərbaycan Silahlı Qüvvələri tərəfindən Rusiyanın Mi-24 hücum helikopterinin təsadüfən vurulduğu məlumdur. Bununla bağlı Azərbaycan tərəfin aydın rəsmi mövqeyi də var.
Helikopter daşınabilən hava hücumundan müdafiə sistemi ilə yerdən açılan atəş nəticəsində Ermənistanın Yerasx (Arazdəyən) kəndi yaxınlığında, Azərbaycanın Naxçıvan Muxtar Respublikasından bir neçə kilometr aralıda vurulub. Ekipaj üzvlərindən ikisi ölüb, biri isə yaralanıb.
Azərbaycanın Xarici İşlər Nazirliyi Rusiyanın Hərbi Hava Qüvvələrinə məxsus helikopterin vurulmasına görə qarşı tərəfdən üzr istəyib, atışmanın səhvən baş verdiyini bildirib və bununla bağlı təzminat təklif edib.
Bu faktları xatırlatmağımız təsadüfi deyil. Ermənistanda bəzi qüvvələr Yerasxda (Arazdəyən) beş il əvvəl Rusiyaya məxsus Mi-24 döyüş helikopterinin heyətinin xatirəsinə həsr olunmuş anım mərasimi keçirib.
Hadisənin beşinci ildönümündə MIR Humanitar Fondunun nümayəndələri və Rusiya hərbçiləri Ermənistanın Yerasx (Arazdəyən) kəndində yerləşən "Xatirə Təpəsi" abidə kompleksində mayor Yuri İşçuk və baş leytenant Roman Fedinanın büstləri önünə əklil və gül dəstələri qoyublar. Bu barədə MIR Humanitar Fondunun mətbuat xidməti məlumat verib.
"Tarixi yaddaşın itirilməsi yeni faciələrə gətirib çıxarır. Bu gün biz həlak olan yoldaşlarımızın, həyatları səma ilə ayrılmaz şəkildə bağlı olan əsl peşəkarların xatirəsini yad edirik. Onlar təkcə pilot deyil, həm də cəsarəti və fədakarlığı ilə həyatları xilas edən və uçuş təhlükəsizliyini təmin edən qəhrəmanlar idilər. Onların cəsarəti və qəhrəmanlığı qəlbimizdə əbədi qalacaq. Biz onları həlak olanlar kimi deyil, əbədi olaraq səmada qalanlar kimi xatırlayacağıq. Amma biz heç nəyi unutmayacağıq...”
Ermənilərin hadisəyə qızışdırıcı mövqedən yanaşması və qaşınmayan yerdən qan çıxarmaq cəhdləri diqqəti çəkir. Beş il bundan əvvəl təsadüfən baş vermiş bir hadisə ətrafında manipulyasiya etmələrinin nəyə xidmət etdiyi də aydındır.
Ermənistan 5 il bundan əvvəl Azərbaycanın Rusiya vertolyotunu vurmasının 5 illiyini keçirib. Vertolyot qəzasının 5 illiyini nə yaxşı belə təntənəli keçirirlər? Səbəb nədir?
“Ermənistandakı bəzi mərkəzlər hesab edirlər ki, bu məsələni gündəmə gətirməklə...”
Politoloq Məhəmməd Əsədullazadə “Bakı-Xəbər”ə bildirdi ki, İkinci Qarabağ müharibəsi zamanı Rusiyaya məxsus Mi-24 döyüş helikopterinin sözügedən ərazidə vurulması səhvən baş versə də, əslində bu, Rusiyanın öz təxribatı idi. “Amma hadisənin baş verməsinə görə Azərbaycan məsuliyyəti öz üzərinə götürdü və bu məsələdə iki dövlət arasında xüsusi bir problem olmadı. İndi Ermənistandakı bəzi qüvvələr anım mərasimi keçirməklə çalışırlar ki, helikopterin vurulması ilə bağlı məsələni şişirdib yenidən gündəmə gətirsinlər. Məqsədləri budur ki, beş il əvvəl baş vermiş bir hadisəni gündəmə gətirməklə Azərbaycana qarşı hansısa bir xoşagəlməz nəticə əldə etsinlər. Amma heç nəyə nail ola bilməzlər. Ermənilər anlamalıdırlar ki, bu davranışları Ermənistan və Azərbaycan arasında başlanan sülh prosesinə ziddir. Ermənistandakı bəzi mərkəzlər hesab edirlər ki, bu məsələni gündəmə gətirməklə Rusiya-Azərbaycan əlaqlərini poza bilərlər, müəyyən suallar yarada bilərlər. Amma məsələ bitib. Beş il əvvəl Rusiyaya məxsus Mi-24 hücum helikopterinin həlak olunan ekipaj üzvləri ilə bağlı məsələni bu şəkildə gündəmə gətirməklə məsələni siyasiləşdirmək istəyirlər”.
Ermənistanda bəzi mərkəzlərin bu hadisəni siyasiləşdirmə cəhdlərinin antiazərbaycan mövqeyi ilə bağlı olduğunu deyən M.Əsədullazadənin fikrincə, əsas məqsəd Rusiya və Azərbaycan arasındakı münasibətlərə xələl gətirməkdir: “Bu mərasimin keçirilməsi Rusiya və Azərbaycan arasındakı münasinətlərə kölgə salmağa xidmət edir, bu da heç bir nəticə verməyəcək”.
İradə SARIYEVA
