Ceyhun Məmmədov: “Azərbaycan bu təkliflə razılaşsaydı, təbii ki, biz tamam fərqli bir mənzərənin şahidi olardıq, bu gün bəlkə də Azərbaycan öz torpaqlarını tam şəkildə işğaldan azad edə bilməmişdi”
Azərbaycan xarici işlər naziri Ceyhun Bayramov İTV-nin efirində yayımlanan “Təmas xətti” sənədli filmində deyib ki, 2020-ci il oktyabrın 8-də Rusiya tərəfi Ermənistanla danışıqların keçirilməsini təkidlə təklif edib.
Oktyabrın 9-da görüşün keçirilməsi ilə bağlı razılıq əldə olunub. Danışıqlar başlayanda maraqlı məqam ondan ibarət olub ki, Rusiya XİN başçısı Sergey Lavrov tərəflərə sənəd təqdim edib. Sənəd cəmi bir neçə maddədən ibarət olub. Oktyabrın 10-a keçən gecə bütün hərbi əməliyyatların dayandırılması, təmasın şərq hissəsində Rusiya sülhməramlıları və Azərbaycan ordusu, təmas xəttinin qərbində isə yenə Rusiya sülhməramlılarının və Ermənistan ordusunun yerləşdirilməsi təklif olunurdu. “Bu o demək idi ki, məsələ tam dondurulsun və bundan sonra heç nə artıq baş verə bilməz. Biz öz mövqeyimizdən çıxış edərək bildirdik ki, Ermənistanla danışığa hazırıq, Ermənistan ərazidən nə vaxt çıxacağını göstərsin. Sənədə Ermənistan da etiraz etdi”, - nazir bildirib.
5 il əvvəl Rusiya sülh planı təqdim edib, Azərbaycan qəbul etməyib.
Azərbaycan o zaman bu planı qəbul etsəydi nə baş verərdi və bu planı ortaya atmaqda Rusiyanın qəsdi, məqsədi nə idi?
Millət vəkili Ceyhun Məmmədov “Bakı-Xəbər”ə bildirdi ki, biz sülh məsələsinə bütöv bir proses kimi yanaşsaq, bunu bütöv bir proses kimi qəbul etsək, burada Prezident İlham Əliyevin qətiyyəti və prinsipial yanaşmasının hər zaman olduğu kimi ciddi rol oynadığını deyə bilərik. “Birmənalıdır ki, bu prosesdə cənab Prezidentin prinsipiallığı, qətiyyətli və ciddi mövqeyi olub. Son günlər açıqlanan fikirləri də təhlil edəndə görürük ki, danışıqlar nə qədər ağır gedib, Rusiya çalışıb ki, bu prosesdə də öz mövqeyini ortaya qoysun. Amma cənab Prezidentin qətiyyəti, prinsipiallığı bu məsələnin qarşısını ciddi bir formada aldı, buna imkan vermədi. Əgər Azərbaycan bu təkliflə razılaşsaydı, təbii ki, biz tamam fərqli bir mənzərənin şahidi olardıq, bu gün bəlkə də Azərbaycan öz torpaqlarını tam şəkildə işğaldan azad edə bilməmişdi. Yəni bu gün bu reallığın yaranmasında cənab Prezidentin prinsipiallığı, qətiyyəti öz sözünü dedi və öz rolunu oynadı. Hesab edirəm ki, önəmli məsələlərdən biri də budur. Biz məsələyə xüsusi diqqətlə yanaşmalıyıq və bu məsələni xüsusi nəzarətdə saxlamalıyıq”.
C.Məmmədov qeyd etdi ki, bu prosesin belə uğurlu nəticə verməsinin səbəbkarı, əsas memarı Azərbaycan Prezidentidir. “Cənab Prezidentin sayəsində qələbəmizi təmin edə, uğurlarımızı davam etdirə bildik. Əgər bu addım atılmasaydı, ortaya bu qətiyyətli mövqe qoyulmasaydı, bəlkə də hələ bölgəmizə sülh gəlməmişdi, Azərbaycan hələ də bu məsələni həll edə bilməmişdi. Amma biz bunu qətiyyətlə həll edə bildik”-deyə C.Məmmədov bildirdi.
İradə SARIYEVA
