Samir Hümbətov:“ Biz Türkiyə diplomatiyasının bütün vasitələrlə, bütün imkanları ilə Azərbaycan diplomatiyasının yanında olduğunu gördük”
Azərbaycan xarici işlər naziri Ceyhun Bayramov İTV-də yayımlanan “Təmas xətti” verilişində deyib ki, 44 günlük müharibə zamanı Türkiyənin və onun lideri Rəcəb Tayyib Ərdoğanın dəstəyi əvəzolunmaz idi.
“Müharibə günlərində Ankaradan Türkiyənin bütün səfirliklərinə gedən bir mesaj var idi ki, Ankaradan gələn təlimatla Bakıdan gələn təlimat eyni qüvvəyə malikdir. Yəni Bakıdan nə təlimat gəlirsə, Ankaradan bunu yoxlamadan yerinə yetirməlisiniz”-deyə C. Bayramov bildirib.
“Təbii ki, diplomatik etiketə uyğun olaraq biz bunu etmirdik. Sözümüz olanda Türkiyə XİN vasitəsilə çatdırırdıq. Ancaq bu mesajın verilməsi dünya diplomatiyasında bənzəri olmayan faktdır. Sözdə deyil, əməldə əsl qardaşlığın bir təzahürü idi”, - nazir bildirib.
44 günlük müharibə dövründə Türkiyəyə məxsus F-16-ların Azərbaycanda olmasının mənəvi əhəmiyyətini yüksək qiymətləndirən Ceyhun Bayramov deyib ki, bu, diplomatiya tarixində təkrarı olmayan presedent idi.
“Bu o deməkdir ki, Türkiyə ən azı Azərbaycan qədər bu mövzuda həssas davranıb”
Beynəlxalq Münasibətlər və Diplomatiya Araşdırmaları Mərkəzinin rəhbəri Samir Hümbətov “Bakı-Xəbər”ə bildirdi ki, Türkiyə diplomatiyasının Azərbaycan diplomatiyasına dəstəyi yüksək qiymətləndirilməlidir. “İkinci Qarabağ Müharibəsində də, həm ondan əvvəlki, həm də sonrakı mərhələdə də biz Türkiyə diplomatiyasının bütün vasitələrlə, bütün imkanları ilə Azərbaycan diplomatiyasının yanında olduğunu gördük. Ceyhun Bayramovla yanaşı Mövlud Çavuşoğlunun da mütəmadi açıqlamalarının şahidi olurduq. Türkiyənin Azərbaycan qədər mövzuya həssas olduğu məlumdur. Hesab edirəm ki, Türkiyənin bu addımları Azərbaycan diplomatiyasına böyük dəstək olaraq qiymətləndirilməlidir.
Düzdür, ona qarşı hər hansı bir kampaniya aparsalar da ki, niyə Türkiyə Azərbaycanı bu qədər müdafiə edib, reallıq bundan ibarətdir ki, Türkiyə və Azərbaycan iki dövlət, bir millətdir. Bu şüarı həmişə əllərində bayraq edib bu prinsiplə hərəkət ediblər.
Hətta iyul hadisələri zamanı belə azərbaycanlılar Ermənistanın Çexiyadakı səfirliyinin önündə nümayiş keçirəndə Türkiyənin Çexiyadakı ovaxtkı səfiri Egemen Bağış gəlib o nümayişdə iştirak etmişdi. Bu o deməkdir ki, Türkiyə ən azı Azərbaycan qədər bu mövzuda həssas davranıb və bu gün də bu siyasəti davam etdirir”-deyə S.Hümbətov qeyd etdi.
İradə SARIYEVA
