Əli Mustafa: “Brüssel Cənubi Qafqaza region olaraq bütöv baxır”
Prezident İlham Əliyev İtaliya Prezidenti Sercio Mattarella ilə mətbuata bəyanatında son vaxtlar Avropa İttifaqı-Azərbaycan əlaqələrinin müsbətə doğru inkişafında İtaliyanın rolunu vurğuladı:
“Bu gün danışıqlar zamanı biz, həmçinin, Avropa İttifaqı-Azərbaycan əlaqələri haqqında danışdıq. İtaliya hər zaman Azərbaycanın Avropa İttifaqı ilə əlaqələrinin inkişafına dəstək vermişdir, bu gün də biz bunu hiss edirik və son vaxtlar Avropa İttifaqı-Azərbaycan əlaqələrində də müsbətə doğru addımlar atılır. Bu da bizi təbii olaraq məmnun edir. Bir sözlə, bizim strateji tərəfdaşlığımız həm rəsmi sənədlərdə, həm həyatda, praktik işlərdə özünü büruzə verir”.
Ümumilikdə, son vaxtlar Azərbaycanla Avroittifaq arasında münasibətlərdə nələr dəyişib?
“Avroittifaq da fərqindədir ki, Mərkəzi Asiya ilə optimal nəqliyyat əlaqəsi Azərbaycansız mümkün deyil”
Sözügedən məsələyə aydınlıq gətirən siyasi şərhçi Əli Mustafa “Bakı-Xəbər”ə açıqlamasında bununla bağlı bir sıra məqamlara toxundu: “Azərbaycanla Avropa İttifaqı arasında ciddi ticarət tərəfdaşlığı mövcuddur. Aİ-nin üzvü olan bir sıra dövlətlərlə ölkəmiz strateji tərəfdaşdır. Azərbaycan neft-qazının əsas alıcısı Avropadır. Bütün bunlarda da İtaliyanın müstəsna rolu var. Ceyhan limanından neftimiz əsasən İtaliyaya gedir. Azərbaycan İtaliyanın qaza olan tələbatının ödənilməsində ikinci ölkədir. İki ölkə arasında olan ticarət dövriyyəsinin həcmi siyasi əlaqələrə də öz təsirini göstərir. Rəsmi Roma bundan çıxış edərək çalışır ki, Aİ ilə Azərbaycan arasında olan bəzi fikir ayrılıqları ortadan qalxsın. Çünki indiyə qədər Azərbaycanla Ermənistan arasında sülhün olmaması bu gərginliyə əsas yaradırdı. Artıq bu da ortadan qalxıb. Çünki Trampın şahidliyi ilə tərəflər Vaşinqtonda sülh sazişinin maddələrini parafladılar. Halbuki, əvvəllər bəzi Aİ ölkələri sülhə inanmırdılar. Ermənistanın verdiyi birtərəfli məlumatlara uyaraq Azərbaycanı ittiham edirdilər. Guya Azərbaycan Ermənistana hücum etməyə çalışır və s. cəfəng fikirlər ortaya atırdılar. Bu da bəzi hallarda Aİ ilə Azərbaycan arasında münasibətlərin gərginləşməsinə səbəb olurdu. Artıq bunların heç biri yoxdur. Fikrimcə, son aylar Aİ ilə Azərbaycan arasında təmasların artması bununla əlaqədardır. Bütün bunlar müsbət haldır. Çünki Aİ-nin siyasi xəritəsində biz də varıq. Bir məqamı nəzərə almaq lazımdır ki, Brüssel Cənubi Qafqaza region olaraq bütöv baxır. Hesab edirəm ki, bölgənin təhlükəsizliyi üçün Avropa İttifaqının dəstəyi əhəmiyyətlidir. Bunu qorumaq üçün bizim güclü tərəfdaşlara ehtiyacımız var. Bu baxımdan İtaliya önəmli rol oynayır. Azərbaycanın mövqelərinin möhkəmlənməsinə dəstək verir. Aİ də fərqindədir ki, Mərkəzi Asiya ilə optimal nəqliyyat əlaqəsi Azərbaycansız mümkün deyil. Ona görə də proseslər müsbətə doğru gedir”.
Vidadi ORDAHALLI
