Dünyanın diqqəti ABŞ prezidenti Donald Tramp və Rusiya prezidenti Vladimir Putin arasında avqustun 15-də Alyaskada keçiriləcək tarixi görüşə yönəlib. Belə bir vaxtda Kennedi Mərkəzində keçirilən tədbirdə çıxış edən prezident Tramp Putinə sərt mesajlar göndərib.
Putinlə Alyaskada görüşəndən sonra Ukrayna prezidenti Zelenskiyə və Avropa liderlərinə zəng edəcəyini deyən Tramp bildirib ki, Putin cümə günü müharibəni dayandırmaqdan imtina edərsə, bunun ağır bədəli olacaq: “Rusiya müharibəni bitirməsə, bunun nəticələri ilə üzləşməli olacaqdir".
Tramp bəyan edib ki, Putinlə görüşü müsbət keçərsə, Putin və Zelenskini bir araya gətirəcək ikinci sammiti keçirmək istəyir. "İkinci görüşün baş tutma ehtimalı yüksəkdir. Əgər orada olmağımı istəyirlərsə, ordada olacağam" – deyə ABŞ prezidenti bildirib.
İkinci görüşün birincidən daha məhsuldar olacağı ehtimalının yüksək olduğunu qeyd edən ABŞ prezidenti Putinlə görüşündə vəziyyəti aydın şəkildə görəcəyini vurğulayıb.
Tramp qeyd edib ki, sammitdə Putinlə görüşdən istədiyi nəticəni əldə etməsə, ikinci görüş baş tutmayacaq. "İlk görüş bu problemi həll etməyəcək, lakin biz ilk görüşdə bir sıra mühüm nəticələr əldə edə bilərik. Bu görüş ikinci görüş üçün zəmin hazırlayacaq. Ancaq bundan sonra ikinci görüş yenə də olmaya bilər, çünki bizə lazım olan cavabları almasaq, ikinci görüş olmayacaq"- deyə Tramp bildirib.
Cümə günü keçiriləcək sammitdə Putini müharibəni dayandırmağa inandıra biləcəyinə inanıb-inanmadığı sualına ABŞ prezidenti belə cavab verib: “Bu suala “çox güman ki” cavabını verəcəm, çünki Putini yaxşı tanıyıram və onunla çoxlu görüşümüz olub”.
CBS News isə mənbələrə istinadən bildirir ki, ABŞ Tramp, Putin və Zelenskinin iştirakı ilə üçtərəfli sammit üçün yer axtarır. Qeyd edilir ki, görüş hətta gələn həftənin sonunda baş tuta bilər.
Bu arada, “Axios”un ABŞ rəsmilərinə istinadən verdiyi məlumata görə, Tramp hələ də Rusiya lideri Putinə qəzəblidir. Xəbərdə bildirilir ki, Trampın ara-sıra Rusiyayönlü bəyanatları əslində onun sövdələşmələr üçün istifadə etdiyi taktikadır. "Ancaq tərəf seçmək məcburiyyətində olsa, o, Rusiya iqtisadiyyatını məhv etməyə başlayacaq. O, həqiqətən onlardan bezib" –deyə mənbə bildirib.
TAHİR
