Məlum olduğu kimi, avqustun 8-də Azərbaycan Prezidenti İlham Əliyev ilk dəfə Amerika prezidenti Trampla rəsmi görüşdü. İlk görüşdən yaranan təəssürat budur ki, Tramp Əliyevlə yaxın işgüzar və səmimi münasibətlər qurmaq istəyir.
Üçtərəfli görüşlərdə Trampın Əliyevə daha çox önəm verdiyi isə aşkar görünürdü. Trampın Azərbaycan Prezidenti ilə səmimi söhbətləri bunu deməyə əsas verir. Ermənistanın baş nazirinə isə Trampın göstərdiyi münasibət rəsmi qaydalara uyğun idi. Məlum görüş onu deməyə əsas verir ki, yaxın gələcəkdə Əliyev-Tramp mübasibətləri əsl dostluğa çevriləcək. Müşahidə edilən görüntülər buna aparır. Görüşdən sonra Tramp da eyni rəğbəti açıq ifadə etməyə başlayıb.
Onu da bildirək ki, Əliyevin Trampa münasibəti hələ aylar öncədən məlum idi. Xatırladaq ki, ötən il Şuşa forumunda Əliyev Prezident Trampın siyasətdə ailə dəyərlərinə nə qədər önəm verdiyini və müharibələrə qarşı olduğunu, sülh siyasəti apardığını qeyd etmişdi.
Görəsən, İlham Əliyevin siyasətində və şəxsiyyətində hansı nüanslar Trampda Azərbaycan prezidentinə belə rəğbətin oyanmasına şərait yaradır? Trampın Əliyevə böyük rəğbətinin kökündə nələr var?
Aydın Mirzəzadə: “Tramp İlham Əliyevin simasında Şərqin, İslam dünyasının, keçmiş sovet məkanının güclü liderini görür”
Millət vəkili Aydın Mirzəzadə “Bakı-Xəbər”ə şərhində bildirdi ki, ABŞ bir qayda olaraq dünyanın müxtəlif regionlarında öz suverenliyini qoruya bilən, sözü ilə əməli bir olan nüfuzlu ölkələrlə yaxınlıq qurmağa çalışır: “Donald Tramp özünün praqmatikliyi, dünya siyasətinə yeni ab-hava gətirməsi ilə fərqlənir. O, Azərbaycanın timsalında bu gün özü-öz problemini həll etmiş, beynəlxalq hüquq normalarına uyğun olaraq dünyada stabillik, inkişaf yaratmağa töhfə verən nüfuzlu dövlət görür. Nüfuzlu dövləti güclü edən vaxtilə ulu öndər Heydər Əliyevin qurduğu dövlətçilik modelinin, indiki Prezident İlham Əliyev tərəfindən uğurla davam etdirilməsidir. İlham Əliyev təkcə Cənubi Qafqazda deyil, bütün dünyada tanınır. Onun təşəbbüsü ilə həyata keçirilən regional iqtisadi layihələr müsbət töhfəsini verir. Həmçinin, ölkə başçısının fəaliyyəti beynəlxalq təşkilatlar tərəfindən də müsbət qiymətləndirilir. Məlumdur ki, İlham Əliyev 4 il Qoşulmama Hərəkatına sədrlik edib. Bu, Qoşulmama Hərəkatının nüfuzunun artmasına səbəb oldu. Bununla yanaşı, Azərbaycanla Ermənistan arasında sülhün məntiqi nəticəyə çatması da İlham Əliyevin uğurlu siyasəti ilə bağlıdır”.
Millət vəkilinin sözlərinə görə, D.Tramp İlham Əliyevin simasında Şərqin, İslam dünyasının, keçmiş sovet məkanının güclü liderini görür. Azərbaycan prezidenti ilə münasibətlərin qurulması ABŞ-ın milli maraqlarına xidmət edir: “Bu istək Azərbaycanın da milli maraqlarına cavab verir. Təsadüfi deyil ki, üçtərəfli bəyannamədən başqa Prezident Əliyevin ABŞ səfəri zamanı 907-ci düzəliş ləğv edildi. ABŞ Prezidentinin xüsusi elçisi Stiv Uitkoffun iştirakı ilə Vaşinqtonda SOCAR-la “ExxonMobil” şirkəti arasında “Əməkdaşlıq haqqında Memorandum” imzalanıb. Eyni zamanda, ABŞ-la Azərbaycan arasında strateji əməkdaşlıq üçün xartiyanın hazırlanması məqsədilə qruplar yarandı. Faktiki olaraq, ABŞ Azərbaycanın timsalında özünün indiki və gələcəkdə strateji tərəfdaşını görür. Bu isə Azərbaycanın özünün uğurlu fəaliyyəti, ən əsası, Prezident İlham Əliyevin müvəffəqiyyətli daxili, xarici siyasəti nəticəsində mümkün olub. Bu isti münasibət qarşıdakı dövrlərdə də müşahidə olunacaq”.
Aydın Hüseynov: “Trampın Azərbaycana isti münasibət göstərməsinin ən başlıca səbəbi odur ki, Azərbaycan bölgədə nüfuz sahibidir və regionda iqtisadi, siyasi cəhətdən böyük potensiala malikdir”
Millət vəkili Aydın Hüseynov “Bakı-Xəbər”ə şərhində bildirdi ki, Donald Trampın Azərbaycana isti münasibət göstərməsinin ən başlıca səbəbi odur ki, Azərbaycan bölgədə nüfuz sahibidir və regionda iqtisadi, siyasi cəhətdən böyük potensiala malikdir: “Azərbaycan öz torpaqlarını azad etdikdən sonra dünyada nüfuzu daha da artıb. Trampın ABŞ–Azərbaycan əlaqələrinin genişlənməsinə maraq göstərməsi də Azərbaycanın nüfuzunun bir göstəricisidir. Məlumat üçün deyim ki, Tramp ilk dəfə prezident olduğu dövrdə də Azərbaycanın iqtisadi layihələrinə öz dəstəyini vermişdi”.
Günel CƏLİLOVA
