Hikmət Babaoğlu: “Yorucu qurumun ləğv edilmə prosesinə artıq başlanılıb”
Azərbaycan və Ermənistan Minsk qrupunun buraxılması ilə bağlı ATƏT-in baş katibinə müraciət ediblər. Bu haqda Azərbaycanın Xarici İşlər Nazirliyinin Mətbuat Xidməti məlumat yayıb.
Müraciətdə qeyd edilir: “Azərbaycan Respublikasının və Ermənistan Respublikasının xarici işlər nazirlərinin ATƏT-in Minsk Prosesi və əlaqəli strukturların (ATƏT-in fəaliyyətdə olan sədrinin Minsk konfransının müzakirəsində olan münaqişə üzrə şəxsi nümayəndəsi və Yüksək Səviyyəli Planlaşdırma Qrupunun) bağlanması ilə bağlı ATƏT-in fəaliyyətdə olan sədrinə birgə müraciətindən sonra, bu gün ATƏT Nazirlər Şurasının bağlanma ilə bağlı qərar layihəsi ATƏT iştirakçı dövlətləri arasında yayılıb və onlar qərarın qəbul edilməsi üçün lazımi prosedurları dəstəkləməyə çağırılıblar".
Məlumata görə, ATƏT artıq Azərbaycan və Ermənistanın birgə müraciətinə uyğun olaraq Minsk qrupunun və digər məlum strukturların buraxılması barədə qərar layihəsini öz üzvləri ilə müzakirə etməyə başlayıb.
“Minsk qrupu problemi həll etmək üçün yox, problemi uzun müddət yaşatmaq üçün səy göstərdi və buna müəyyən mənada nail oldu”
Millət vəkili Hikmət Babaoğlu “Bakı-Xəbər”ə şərhində bildirdi ki, Vaşinqton görüşündə Ermənistan və Azərbaycan arasında sülhə gedən yolda bir çox maneələr aradan qaldırılıb. Aradan qaldırılan mühum əngəllərdən biri də ATƏT Minsk qrupunun ləğv edilməsi ilə bağlı tərəflərin birgə müraciətidir: “Artıq bu istiqamətdə müsbət yöndə addım atılıb, xarici işlər nazirləri müraciət ediblər və ATƏT-də məlum məsələ müsbət qarşılanıb. Minsk qrupunun üzvü olan ölkələrə bu müraciət göndərilib. İlkin siqnallar müsbətdir, hətta bəzi ölkələr məlum məsələ ilə bağlı bəzi addımları atacağını da bildirib. Eyni zamanda, bu təşəbbüs sülhün yolunu açan addımlardan biri kimi yadda qalacaq. Məsələnin mahiyyəti ondan ibarətdir ki, Minsk qrupu problemi həll etmək üçün yox, problemi uzun müddət yaşatmaq üçün səy göstərdi və buna müəyyən mənada nail oldu. 30 ilə yaxın müddət ərzində ATƏT-in Minsk qrupu problemin həll olunması ilə bağlı heç bir iş görmədi. Əslində bu qurum yaradılarkən Azərbaycan həmsədr qismində Türkiyə və ya Almaniyanı görmək istəyirdi. Ancaq bu mümkün olmadı. ATƏT-in Minsk qrupu bütün fəaliyyəti dövründə daima Azərbaycanın tənqidlərinə məruz qaldı. Hətta 44 günlük müharibədən sonra belə onlar Azərbaycana səfər edərək Minsk qrupunun yenidən fəaliyyətinə cəhdlər etdilər. Ancaq Azərbaycan Prezidenti qətiyyətlə bunu rədd etdi. Təbii ki, onların bu cəhdi xoş niyyətli deyildi”.
Millət vəkili onu da əlavə etdi ki, Ermənistan son zamanlar bəyan edirdi ki, ATƏT-in Minsk qrupu ilə sülh müqaviləsi bağlandıqdan sonra bu qurum ləğv edilə bilər: “Birgə müraciət etməyə belə razı deyildilər. Ancaq bu gün sülh sazişi imzalanmadan öncə paraflanmış vəziyyətdə Azərbaycan ona nail oldu ki, Minsk qrupunun ləğvi ilə bağlı müraciət olunub. Yorucu qurumun ləğv edilmə prosesinə artıq başlanılıb”.
Günel CƏLİLOVA
