Məhərrəm Zülfüqarlı: “İndiki şəraitdə Putinin ABŞ prezidentinin xüsusi nümayəndəsi ilə aralarında keçən söhbəti Paşinyana açıqlamasının arxasında onun başqa niyyətləri də dayana bilər”
Rusiya prezidenti Vladimir Putinlə Ermənistanın Baş naziri Nikol Paşinyan arasında telefon danışığı olub. Telefon danışığında Putin ABŞ prezidentinin xüsusi nümayəndəsi Stiven Uitkoffla söhbətinin nəticələri barədə Paşinyana məlumat verib, ona Trampla Alyaskada gözlənilən görüşü haqda danışıb.
Putin Trampın nümayəndəsi ilə söhbətini Paşinyana niyə açdı?
“O özünü Paşinyana münasibətdə guya səmimi göstərmək istəyib və elə rəy yaratmağa çalışıb ki, guya o da...”
Tarix elmləri doktoru, professor, siyasi icmalçı Məhərrəm Zülfüqarlı “Bakı-Xəbər”ə bildirdi ki, Putinin yürütdüyü siyasət nəticəsində hazırda Rusiya böhran keçirir. Professorun qeyd etdiyinə görə, vəziyyət o həddə çatıb ki, artıq Rusiya Dumasının daxilində də paraçalanmalar, ziddiyyətlər gözlənilir. “Suda boğulan saman çöpündən yapışan kimi, Putin də bilir ki, Paşinyan onun əleyhinədir, Qərbyönümlü siyasət yürüdür, buna baxmayaraq, onunla telefonda, guya səmimi söhbət etdiyini göstərmək istəyir. Trampın şəxsi nümayəndəsi ilə aralarındakı danışıq barədə də Paşinyana məlumat verib. Bu, Putinin qeyri-səmimiliyinin və acizliyinin nəticəsidir. O, özünü Paşinyana münasibətdə guya səmimi göstərmək istəyib və elə rəy yaratmağa çalışıb ki, guya o da ABŞ kimi Azərbaycanla Ermənistan arasında sülh müqaviləsinin imzalanmasının, barışın, sabitliyin tərəfdarıdır. Digər tərəfdən də Paşinyana işarə vurmaq istəyib ki, guya o da bu məsələdə Trampla həmfikirdir. Yəni indiki şəraitdə Putinin ABŞ prezidentinin xüsusi nümayəndəsi ilə aralarında keçən söhbəti Paşinyana açıqlamasının arxasında onun başqa niyyətləri də dayana bilər. Çünki Putin səmimiyyətdən uzaq bir insandır”.
M.Zülfüqarlı qeyd etdi ki, Rusiya Cənubi Qafqazda öz mövqeyini itirməklə yanaşı, bütün dünyada nüfuzdan düşüb. “Putinin ətrafında olan bəzi esktremist qüvvələr Alyaska məsələsini qaldırırlar ki, guya o vaxt Rusiya oranı ABŞ-a satıb, indi geri almaq istəyir. Yəni bu çox cılız və ağılsız siyasətdir. Ukrayna ilə müharibədə üç-dörd günə qalib gələcəyini hesablayan və uzun müddətdir o bataqlıqdan çıxa bilməyən Putinin ətrafının bu gün Alyaskaya iddia etməsi gülüncdür. Mənə belə gəlir ki, yaxın gələcəkdə Rusiya bu böhran nəticəsində daxildən parçalanacaq, hətta Putinin ətrafının da ona qarşı çıxmaq ehtimalı var...Bunu Aleksandr Tolstoyun Dumadakı çıxışları göstərir. Rusiyada bir neçə qüvvə var”-deyə M.Zülfüqarlı qeyd etdi.
M.Zülfüqarlının sözlərinə görə, Rusiyadakı ayrı-ayrı qüvvələrlə artıq Putin bacarmır və onlara müxtəlif ismarıclar göndərir: “Putin daxildəki o qüvvələrə artıq Alyaskaya iddiası ilə əlaqədar son mesajlarını verir və bu da Paşinyanla telefon danışığında oldu. Əlbəttə, Paşinyan Putinin Trampın xüsusi nümayəndəsi ilə söhbətinə əhəmiyyət verməyəcək və öz siyasətini davam etdirəcək. Yaxın gələcəkdə Tramp-Putin görüşündən sonra yeni proseslərin və Rusiyanın növbəti güzəştlərinin şahidi olacağıq”.
İradə SARIYEVA
