Əli Orucov: "Ermənistan imzaladığı sənədlərə hörmətlə yanaşsa, tezliklə həmin missiya əraziləri tərk edər"
Hamıya bəllidir ki, Avropa Birliyinin mülki müşahidə missiyasını Ermənistana Fransa hökuməti -şəxsən Emmanuel Makron göndərmişdi. Məqsəd isə bu bölgəyə silahlı missiya ilə soxulmaq və Cənubi Qafqazda mövqe tutmaq idi.
Ona görə də adı mülki müşahidə missiyası olan bu qurum hərbiləşdirilmişdi. Onlar yüngül və öldürücü silahlarla silahlanmışdı. Üstəlik, atəşkəsə nəzarət etmək əvəzinə "binokl diplomatiyası" və yerli əhali arasında Azərbaycana qarşı təbliğat aparır, eyni zamanda, Azərbaycana qarşı sərhəddə kəşfiyyat xarakterli işlə məşğuldur.
Artıq Avropa Birliyinin Azərbaycan və Ermənistan arasında aparmaq istədiyi nizamlanma missiyası iflasa uğradı. Avropa Birliyinin illərdir edə bilmədiyini Donald Tramp cəmi 8 aya bacardı. Belə olan halda Avropa Birliyinin həmin missiyasının sərhəddə saxlanmasına nə ehtiyac var? Missiyanın ən qısa müddətdə Ermənistandan çıxarılması vacibdir və bunun üçün hansı addımlar atılmalıdır?
Vaşinqton razılaşmalarından sonra Ermənistanda Avropa Birliyinin mülki missiyasını saxlamağa nə ehtiyac var?
Məsələni baki-xeber.com-a şərh edən politoloq Əli Orucov bildirdi ki, Ermənistanın Azərbaycanla şərti sərhədində yerləşdirilən Avropa İttifaqının müşahidə missiyası məhdud tərkibdə və 6 ay müddətinə fəaliyyətə başlayıb: "Məqsəd sabitliyə və etimad mühitinə töhfə vermək olsa da, çox keçmədən aydın oldu ki, missiya Azərbaycana qarşı kəşfiyyat işləri ilə məşğuldur. Sonradan "binokl diplomatiyası" adlandırılan bu missiya davamlı olaraq Azərbaycan sərhədlərində pozuculuqla məşğul olduğundan, Bakı buna etiraz bildirdi. Moskva da müşahidə missiyasını NATO-nun maraqlarına xidmət etməkdə günahlandırdı. Azərbaycanın dəfələrlə haqlı tələb və etirazlarına baxmayaraq, İrəvan müşahidə missiyasının qalma müddətini 2027-ci ilin fevral ayınadək üzatdı və tərkibi genişləndirdi. Ancaq Vaşinqtonda prezident Trampın vasitəçiliyi ilə Azərbaycan və Ermənistan rəhbərlərinin imzaladığı tarixi sənədlərdən sonra həmin missiyanın Ermənistandan çıxarılması çox çəkməyəcək. Çünki Azərbaycanla Ermənistan arasında parsflanmış sülh sazişinin mətnində hər iki ölkə öz sərhədlərində üçüncü ölkələrin varlığını istisna edir. Ona görə də missiya, həmin sənədin mətninə görə, orada qalmamalıdır. Onsuz da bu missiya heç Ermənistana da fayda vermirdi, əksinə, Bakı ilə İrəvan arasında gərginliklərə yol açırdı. Hesab edirəm ki, Ermənistan imzaladığı sənədlərə hörmətlə yanaşsa, tezliklə həmin missiya əraziləri tərk edər.
Digər tərəfdən, Aİ özü də Ermənistanla Azərbaycan arasında paraflanmış sülh sazişini təqdir etdi və alqışladı. Demək, missiyanın da orda qalmasına lüzum yoxdur".
Dəniz NƏSİRLİ
