Ceyhun Məmmədov: “Ermənistan bu öhdəlikdən boyun qaçırarsa Tramp bunu heç zaman bağışlamayacaq”
Azərbaycan Prezidentinin və Ermənistanın Baş nazirinin iştirakı və ABŞ Prezidentinin şahidliyi ilə Vaşinqtonda bir sıra mühüm sənədlər imzalandı, o cümlədən Azərbaycanla Ermənistan arasında sülh müqaviləsinin mətni paraflandı.
Ekspertlərə görə, paraflanma yekun sülhün bir addımlığında olmaq deməkdir, amma sülh müqaviləsinin imzalanması 2026-cı ildə Ermənistanda konstitusiya dəyişiklikləri ilə əlaqədar referendum keçirildikdən sonra mümkündür. Ermənistan üzərinə düşən məsuliyyəti dərk edərək, gecikmədən tələb olunan addımları atmalı və referendum keçirməlidir.
Bu məsələyə Prezident İlham Əliyev müsahibəsində toxunaraq bildirib: “Mən şübhə etmirəm ki, Ermənistan konstitusiyası dəyişdiriləndə, - Ermənistan tərəfi özü bunu bildirir ki, belə dəyişikliklər edilməlidir, - Azərbaycana olan ərazi iddiası oradan çıxarılacaq. Əks təqdirdə, bu, birinci növbədə Amerika Birləşmiş Ştatlarına hörmətsizlik olacaq. Hər kəs bilir və bizim mövqeyimiz, demək olar ki, bütün aparıcı beynəlxalq aktorlar, o cümlədən Amerika Birləşmiş Ştatları tərəfindən anlayışla qarşılanır. Çünki sülh sazişi imzalananda hər bir məsələ öz həllini tapmalıdır və bizə qarşı olan əsassız ərazi iddiası oradan çıxarılmalıdır. Ona görə mənim bu məsələ ilə bağlı şübhəm yoxdur. Yenə də deyirəm, bunun nə vaxt olacağı Ermənistanın öz işidir. Biz burada hər hansı bir təklif irəli sürə bilmərik. Ancaq mən hesab edirəm ki, nə qədər tez olsa, o qədər yaxşıdır. Çünki məncə, vaxt itirmək lazım deyil. Bir halda ki, artıq Azərbaycanla Ermənistan sülh sazişini paraflayıb, onun rəsmi imzalanması da çox çəkməməlidir”.
Təbii ki, bu istiqamətdə Ermənistanın üzərinə böyük məsuliyyət düşür və o öz Konstitusiyasında lazımı dəyişikliyi etməlidir. Prezident Əliyev açıq bəyan edib ki, Ermənistan məsələni yubatmamalı, əks təqdirdə bu ilk növbədə ABŞ-a və şəxsən Prezident Trampa hörmətsizlik olacaq, Ermənistan nə qədər tez addımlar atsa, öz xeyrinə olacaq.
Ermənistan Konstitusiya dəyişikliyi barədə Vaşinqtonda götürdüyü öhdəlikdən imtina edə və ya yayına bilərmi? Hansı hallarda? Nəticəsi nə olar? Tramp onu bağışlayarmı?
“...Ermənistan bundan imtina edə bilməz”
Millət vəkili Ceyhun Məmmədov “Bakı-Xəbər”ə “Hesab edirəm ki, xeyr, Ermənistan bundan imtina edə bilməz. Bundan imtina etməyə çalışsa da, bu Ermənistan üçün həm regional, həm də beynəlxalq müstəvidə bir sıra problemlər yaradacaq. Cənab Prezidentin dediyi kimi, Ermənistan dünyanın bir nömrəli ölkəsinin bir nömrəli ofisində prezident Trampın təminatı ilə üzərinə bir öhdəlik götürüb. Ermənistan bu öhdəlikdən imtina edə bilməz, əgər etməyə cəhd edərsə, birincisi, sülh müqaviləsi olmayacaq. Yəni bu sənəd hələ ki, paraflanıb”-deyə bildirdi.
C.Məmmədovun qeyd etdiyinə görə, Ermənistan Konstitusiyasında gərəyi olan dəyişikliyi etməlidir, öhdəliyini yerinə yetirməlidir ki, sülh müqaviləsi qüvvəyə minsin. “Digər müstəvidə biz onu qeyd etməliyik ki, bu, Ermənistanın imicinə də ciddi xələl gətirəcək. Yəni Ermənistan üzərinə beynəlxalq bir öhdəlik, vəzifə, missiya götürüb, ona görə Ermənistan bu öhdəliyi yerinə yetirməlidir. Ermənistan bu öhdəliyi yerinə yetirmədiyi təqdirdə, əgər belə bir hal baş verərsə, özünün yalançı, saxtakar imicini təsdiqləyə bilər ki, götürdüyü öhdəliyi yerinə yetirə bilmir.
Onu da qeyd edim ki, Ermənistan bu öhdəlikdən boyun qaçırarsa Tramp bunu heç zaman bağışlamayacaq və Ermənistanın imicinə ciddi zərər vuracaq.
Azərbaycana gəldikdə isə, Azərbaycan bu məsələ ilə heç vaxt barışmayacaq. Eyni zamanda Azərbaycan da bu məsələdə heç vaxt güzəştə getməyəcək və hər zaman öz prinsipial və qətiyyətli mövqeyini ortaya qoyacaq. Ermənistanın bu öhdəliyi yerinə yetirməkdən başqa bir yolu yoxdur. Bunu Ermənistan mütləq yerinə yetirməli və şərtləri təmin etməlidir” - deyə C.Məmmədov bildirdi.
İradə SARIYEVA
