Yadigar Məmmədli: "Ermənistanın Avropa İttifaqına üzv olması real deyil"
İrəvan və Brüssel viza rejiminin liberallaşdırılması ilə bağlı danışıqlara başlayır. Faktiki olaraq, Ermənistan Avropa İttifaqı ilə gündəlikdə duran məsələləri genişləndirir.
Bunu Ermənistanın baş naziri Nikol Paşinyan Avropa Komissiyasının sədr müavini Marqaritis Shinas ilə görüşündə deyib.
Paşinyan Ermənistanın real olaraq Avropa İttifaqı ilə münasibətlərdə öz gündəmini genişləndirdiyini və mümkün üzvlük məsələsinin artıq siyasi gündəmin bir hissəsinə çevrildiyini deyib: "Bu sadə məsələ deyil, lakin Ermənistanda siyasi gündəmin bir hissəsinə çevrilib, ona görə də bu mövzuya ətraflı və hərtərəfli yanaşmaq lazımdır. Avropa İttifaqındakı tərəfdaşlarımızın iradlarını və məsləhətlərini dinləmək vacib olacaq. Şadam ki, münasibətlərimizdə nəzərəçarpacaq dəyişikliklər var: viza rejiminin liberallaşdırılması ilə bağlı danışıqlar başlayır, Avropa Sülh Fondu ilə Ermənistan Respublikasına dəstək verilməsi barədə qərar qəbul edilib, biz bunu çox yüksək qiymətləndiririk".
Göründüyü kimi, Paşinyan artıq, demək olar ki, Ermənistanın Aİ-yə üzv olması üçün danışıqlara start verib. Bunun mənası budur. Ancaq burada təəccüb doğuran məqam odur ki, Ermənistan bir tərəfdən Avropa İttifaqı ilə yaxınlaşmaq üçün dəridən-qabıqdan çıxır, o biri tərəfdən Paşinyan Kazanda keçiriləcək BRICS sammitində ölkəsinin nümayəndə heyətinə rəhbərlik edəcək. Aİ ilə yaxınlaşmaq, quruma üzv olmağa hazırlaşmaq hara, BRICS tədbirinə qatılmaq hara?
"Bununla, guya balanslaşdırılmış siyasət yürütdüklərini göstərərək qarşı tərəfi aldatmaq istəyirlər"
Sözügedən məsələyə aydınlıq gətirən media eksperti Yadigar Məmmədli "Bakı-Xəbər"ə açıqlamasında qeyd etdi ki, bu, daha çox ictimai rəyə hesablanıb: "Bəli, o bir reallıqdır ki, Paşinyan Ermənistanı Qərbə doğru aparmaq, Rusiya qoşunlarını ölkədən çıxarmaq istəyir. Mövcud hakimiyyətin belə bir istəyi var və bu mövqenin cəmiyyətdə tərəfdarları da az deyil. Ancaq Ermənistanın Avropa İttifaqına üzv olması real deyil. Bunu onlar özləri də bilir. Ən azından ona görə ki, Ermənistanın bu ölkələrlə sərhədi yoxdur. Bundan başqa, açıq dənizə çıxışı da yoxdur. Avropaya inteqrasiya yolunu Gürcüstan tutmuşdu, amma son dövrlər bu ölkədə hansı proseslərin getdiyini biz yaxşı bilirik. Gürcüstanla Qərb arasında olan münasibətlər soyuqlaşıb. Bir vaxtlar Gürcüstanla Aİ arasında viza məsələsi belə həll olunmuşdu. Ancaq nəticə tam fərqli oldu. Digər tərəfdən, Qərbə yaxınlaşmaq yolunu tutan Paşinyan Rusiyanın sanksiyalardan yayınmasında fəal iştirak edir. Bu səbəbdən iki ölkə arasında ticarət dövriyyəsinin həcmi süni şəkildə artmaqdadır. Ermənistan bunun müqabilində milyonlar qazanır. Həm də Paşinyan, heç nə olmamış kimi, BRICS tədbirində iştirak edəcəyini bəyan edir. Bununla, guya balanslaşdırılmış siyasət yürütdüklərini göstərərək qarşı tərəfi aldatmaq istəyirlər. Həmçinin təzyiqlərdən sığortalanmağa çalışırlar. Ancaq fakt odur ki, Ermənistan Rusiyanın iqtisadi-hərbi qurumlarında təmsil oluna-oluna Avroittifaqla yaxınlaşmaq yolunu tutub. Bu isə, ən azından, Rusiyaya xəyanətdir".
Vidadi ORDAHALLI
