Ermənistan mifik “Zəngəzur əməliyyatının” məhz sentyabrda olacağına əmindir - niyə?
Hüseyn İbrahimov: "Bu iddiaların heç bir real əsası yoxdur"
Ermənistanda Zəngəzurla bağlı növbəti narahatlıqlar, spekulyasiyalar, manipulyasiyalar dayanmaq bilmir. İsrarla bəyan edirlər ki, Azərbaycanın hücum etməsi qaçılmazdır. Guya Azərbaycan tərəfi hərb yolu ilə Ermənistanın cənubunu tutacaq və Naxçıvanla quru əlaqəsini təmin edəcək.
Bu dəfə əminliklə deyirlər ki, Azərbaycan məhz sentyabrda bunu edəcək. Bunu da belə əsaslandırırlar ki, Azərbaycan 27 sentyabr 2020-ci ildə İkinci Qarabağ müharibəsini başlayıb. Azərbaycan 12-14 sentyabr 2022-ci ildə Ermənistan istiqamətində strateji yüksəklikləri ələ keçirib. Azərbaycan 19 sentyabr 2023-cü ildə Qarabağda antiterror əməliyyatlarına başlayıb. Hətta bir az da məsələyə sakral don geyindirərək daha da uzağa gedib deyirlər ki, Qafqaz İslam Ordusu Bakını 15 sentyabr 1918-ci ildə azad edib. Bir sözlə, Azərbaycan üçün ən uğurlu ay sentyabr olduğu üçün Zəngəzura hücum məhz bu ay baş verəcək.
"Sadəcə, genişmiqyaslı əməliyyatlar sentyabr ayına təsadüf etdiyi üçün ermənilər belə xoflanıblar"
Sözügedən məsələni "Bakı-Xəbər"ə şərh edən İdarəçilik Akademiyasının müəllimi, sosioloq Hüseyn İbrahimov bütün bunları ermənilərin xəstə təxəyyülü ilə əlaqələndirdi: "Məsələ ondadır ki, erməni cəmiyyəti xəstədir. Onlar hər şeydə nəsə mifik bir şey axtarmaq istəyirlər. Bəli, Azərbaycan Qarabağın işğaldan azad edilməsinə, antiterror əməliyyatlarına məhz sentyabr aylarında başlayıb. Ancaq bunun sözügedən ayla yaxından-uzaqdan heç bir əlaqəsi yoxdur. Məsələ ondadır ki, Ermənistanın təxribatları həmin aya təsadüf etdiyi üçün əməliyyatlar sentyabrda keçirilib. Məgər bütün əməliyyatlar sentyabrda keçirilib? Əlbəttə ki, yox. Fərrux əməliyyatı mart ayında, Sarıbaba istiqamətində "Qisas" əməliyyatı avqustda, Qara göl istiqamətdə əməliyyat may ayında keçirilib. Sadəcə, genişmiqyaslı əməliyyatlar sentyabr ayına təsadüf etdiyi üçün ermənilər belə xoflanıblar. Əslində isə deyilənlərin hansısa sakrallıqla heç bir əlaqəsi yoxdur. Onsuz da 30 il idi Azərbaycan işğal amili ilə barışmamışdı. Gec-tez öz ərazilərimizi azad edəcəkdik və biz buna zatən hazırlaşırdıq. Bunun sentyabra təsadüf etməsində hansısa mistik məna axtarmaq ermənilərin xəstə düşüncəsindən irəli gəlir. Digər tərəfdən, Azərbaycan mötəbər COP29 tədbirinə ev sahibliyi etməyə hazırlaşır. Belə bir tədbir ərəfəsində Azərbaycan niyə məhz sentyabrda Zəngəzura hecum edib hansısa risqə getməlidir? Belə bir tədbir ərəfəsində məgər biz bunun fərqində deyilik? Ona görə də bu iddiaların heç bir real əsası yoxdur".
Vidadi ORDAHALLI
