Bəhruz Quliyev: "Belə bir iddia absurddur və bu, Paşinyanın öz imzasına hörmətsizliyidir"
"9 noyabr 2020-ci il tarixli üçtərəfli bəyanata əsasən, Ermənistan ərazisindən keçəcək nəqliyyat yollarının təhlükəsizliyinin təmin edilməsi funksiyası Ermənistan Respublikasına həvalə edilib". Bu iddia ilə Paşinyan çıxış edib.
O, bununla bağlı parlamentin "Yay məktəbi" proqramının iştirakçıları ilə görüşdə deyib: "Bu yaxınlarda Rusiya Federasiyasının yüksək rütbəli məmuru elan etdi ki, noyabrın 9-da üçtərəfli bəyanatda yazılıb ki, Azərbaycanın əsas hissəsi ilə Naxçıvan arasında nəqliyyat əlaqəsinin təhlükəsizliyi Rusiya Federal Təhlükəsizlik Xidmətinin sərhəd qoşunları tərəfindən təmin edilməlidir. Demək istəyirəm ki, 9 noyabr tarixli üçtərəfli bəyanatda belə bir şey yazılmayıb. O, açıq mətndir, açılıb oxuna bilər. Əksinə, orada yazılıb ki, Ermənistan Respublikası əlaqənin təhlükəsizliyini təmin edir".
Təhlükəsizliyin Ermənistan tərəfindən təmin olunması haradan çıxdı? Üçtərəfli razılaşmada deyilir ki, Zəngəzurdan keçən yolda hərəkətin təhlükəsizliyinə Ermənistan zəmanət verir. Orada "hərəkətin təhlükəsizliyini Ermənistan təmin edir" ifadəsi yoxdur. Təhlükəsizliyin təmin edilməsinin Rusiya FTX-si tərəfindən həyata keçirilməsi öz əksini tapıb. Təhlükəsizliyi təmin etmək başqa, zəmanət vermək tamam başqa şeydir. Yəni Ermənistan zəmanət verir ki, yoldakı gediş-gəlişə problem yaratmayacaq. O baxımdan Paşinyan bu iki məqamı səhv salır.
"Əslində məntiqə də uyğun deyil ki, düşmən bildiyin xalqın nümayəndələrinə təhlükəsizlik vəd edəsən"
Sözügedən məsələ ilə bağlı fikirlərini "Bakı-Xəbər"lə bölüşən "SƏS" Media Qrupunun rəhbəri, politoloq Bəhruz Quliyev hesab edir ki, Ermənistan tərəfi adəti üzrə razılaşmaları, imzalanan sənədləri təhrif etməklə məşğuldur: "Baş nazir Nikol Paşinyan da əvvəlki prezidentlər Köçəryan və Sarkisyanın yolu ilə gedir, danışıqlardan yayınmaq üçün hər cür imkandan istifadə edir. Qeyd edildiyi kimi, sülh müqaviləsinin 80 faizə qədəri razılaşdırılıb, qalan hissəsi də qarşılıqlı şəkildə müzakirə oluna və son qərar verilə bilər. Ancaq Paşinyan gözləmə mövqeyində qalmaqla müstəqil, qərarların verilməsində söz sahibi olmadığını verdiyi açıqlamalarla sübut edir. 9 noyabr 2020-ci il tarixli üçtərəfli bəyanata əsasən, Azərbaycanın əsas hissəsi ilə Naxçıvan Muxtar Respublikası arasında nəqliyyat əlaqəsinin təhlükəsizliyi Rusiya Federal Təhlükəsizlik Xidmətinin sərhəd qoşunları tərəfindən təmin edilməlidir. Amma Paşinyan "Yerevan dialoqu"ndakı çıxışında Azərbaycan, Rusiya və Ermənistan rəhbərlərinin imzaladığı üçtərəfli Bəyanatın 9-cu bəndndə yazılanları ermənisayağı təhrif edir. Guya Ermənistan ərazisindən keçəcək nəqliyyat yollarının təhlükəsizliyinin təmin edilməsi funksiyası Ermənistan Respublikasına həvalə edilib. Belə bir iddia absurddur və bu, Paşinyanın öz imzasına hörmətsizliyidir. Ermənistan Azərbaycan torpaqlarını işğal etmiş, minlərlə vətəndaşını qətlə yetirmiş, girov və əsir götürmüş bir dövlətdir. Müharibə bitər-bitməz, azərbaycanlılara qarşı kinin, nifrətin, düşmənçiliyin pik həddə olduğu bir vaxtda Zəngəzur dəhlizində hərəkət edən azərbaycanlıların təhlükəsizliyinin Ermənistana həvalə edilməsi absurddur və həqiqəti əks etdirmir. Əslində məntiqə də uyğun deyil ki, düşmən bildiyin xalqın nümayəndələrinə təhlükəsizlik vəd edəsən. Buna kim inanar? Deməli, Paşinyan həm də öz xalqını aldadır. Çünki sənəddə "hərəkətin təhlükəsizliyini Ermənistan təmin edir" ifadəsi həqiqətən yoxdur. Təhlükəsizliyin təmin edilməsinə Rusiya FTX-nin baxması açıq şəkildə əksini tapıb. O baxımdan təhlükəsizliyi təmin etməklə zəmanət verməyi qarışdırmaq olmaz. Ermənistan zəmanət verə bilər ki, dəhlizdə gediş-gəlişə problem yaratmayacaq".
Vidadi ORDAHALLI
