Separatçıların İrəvandakı ofisinin bağlanması hələ uzanır...
Elnur Kəlbizadə: "...Ermənistan hökuməti dərhal qərar qəbul etməlidir, o "nümayəndəliyin" fəaliyyətini tamamilə dayandırmalıdır"
İrəvandakı Qarabağ separatçılarının "nümayəndəliyi" bağlanmalıdır. Bu barədə Ermənistan parlamentinin sədri Alen Simonyan jurnalistlərə açıqlamasında bildirib.
Erməni spiker qondarma rejimin "hakimiyyətini" tanınmamış "respublika"nın ləğvində ittiham edib.
Simonyan əlavə edib ki, onlar mütəmadi olaraq həmin "Artsax" nümayəndəliyində görüşlər təşkil edərək məsuliyyəti ört-basdır etməyə çalışırlar.
"Düşünürəm ki, bu binanın gələcəkdə hansı məqsəd üçün istifadə ediləcəyini yenidən nəzərdən keçirməliyik. O, bu cür məqsədlərə xidmət etməməlidir", - Simonyan vurğulayıb.
Ekspertlərin fikrincə, Ermənistan sülh müqaviləsinin imzalanmasında maraqlıdırsa, təcili surətdə Qarabağ separatçılarının "nümayəndəliyi"ni bağlamalıdır və onların bütün fəaliyyətlərinə qadağa qoymalıdır. Ekspertlərə görə, təəssüf ki, Ermənistan hökuməti bu barədə hələlik ciddi addım atmaq istəmir və bu ofisin bağlanmasını uzadır. Nikol Paşinyan hökumətinin bu istiqamətdə ciddi addım atmalı olduğunu deyən ekspertlər hesab edir ki, bu baş verməlidir. Alen Simonyanın, yaxud Paşinyan hökumətinin başqa bir rəsmisinin quru bəyanatı heç nəyi həll etmir, bu sahədə əməli addımlar atılmalıdır.
"...Bu cür bəyanatlar heç də yetərli deyil, konkret tədbirlər görülməlidir..."
AMEA-nın Qafqazşünaslıq İnstitutunun Ermənişünaslıq şöbəsinin müdiri, dosent Elnur Kəlbizadə "Bakı-Xəbər"ə şərhində bildirdi ki, Paşinyan hökuməti separatçıların "ofisini" bağlamalıdır. "Əgər Ermənistan hökuməti, Ermənistan dövləti Azərbaycana qarşı ərazi iddiaları ilə çıxış etmirsə və gələcəkdə də etməyəcəksə, bu zaman vaxtilə Qarabağda bir qrup terrorçu tör-töküntüsünün Ermənistanın keçmiş rəhbərliyinin də dəstəyi ilə yaratdığı "Arsax" terror təşkilatının, yaxud "Arsax Respublikasının"bu ölkədəki nümayəndəliyi niyə hələ var? Niyə bu "nümayəndəlik" (bəzən keçmiş dövrlərdə hətta onu "diplomatik nümayəndəlik də adlandırırdılar-E.K) hələ də fəaliyyət göstərir? Ermənistanın indiki hökuməti nə üçün hələ də belə bir "nümayəndəliyin" fəaliyyət göstərməsinə icazə verir? Əgər belə iddialar olmayacaqsa, yoxdursa, o zaman bu təşkilatın bu formada fəaliyyəti üçün hansı səbəbdən şərait yaradılır? Bilirik ki, Ermənistan hökumətinin əlində kifayət qədər inzibati resurslar var ki, bu qanunsuz terror təşkilatının fəaliyyətini dayandırsın.
Əgər həqiqətən də həmin qüvvələr Ermənistan hakimiyyətinin deyil, kənar qüvvəllərin təsiri altında bu addımları atırsa, o zaman Ermənistan hökuməti dərhal qərar qəbul etməlidir, o "nümayəndəliyin" fəaliyyətini tamamilə dayandırmalıdır, o cür tədbirləri təşkil edən şəxslərin fəaliyyəti qanunvericilik çərçivəsində tənzimlənməlidir və nümayiş etdirilməlidir ki, bu, Ermənistanın rəsmi mövqeyi deyil, hansısa qrupların özfəaliyyətidir, özbaşınalığıdır. Ermənistan hökuməti belə bir addım atsa, Azərbaycanda müəyyən fikir formalaşdıra bilər ki, bu, Nikol Paşinyan hökumətinin özünün təşkil etdiyi bir məsələ deyil. Yox, bu istiqamətdə addım atılmasa, "Arsax nümayəndəliyinin" fəaliyyətinin tamamilə dayandırılması ilə bağlı Ermənistandakı hakimiyyət hər hansı bir tədbirlər həyata keçirməsə, Azərbaycan tərəfinin belə bir nəticəyə gəlməsinə gətirib çıxara bilər ki, bu, əslində hökumətin özünün şərait yaratdığı bir tədbirdir, bir aksiyadır. İndiki vəziyyətdə seçim Ermənistanda faktiki olaraq hakimiyyətdə olan qüvvələrindir. Onlar mövqelərini ortaya qoymalıdırlar və Azərbaycan tərəfi üçün də aydınlaşmalıdır ki, onların yanaşması nədən ibarətdir"-deyə E.Kəlbizadə bildirdi.
E.Kəlbizadənin sözlərinə görə, yəqin ki, Azərbaycan tərəfi separatçıların İrəvandakı "nümayəndəliyinin" fəaliyyətinin sülh prosesinə mane olduğunu ciddi şəkildə qarşı tərəfin diqqətinə çatdırıb: "Həqiqətən də qarşı tərəf baş verən bu proseslərə görə cavabdehlik daşımırsa, yaxud bu proseslərdən xəbərsiz olubsa o zaman həmin "qurumun" fəaliyyətinin dayandırılmasının zəruri olduğunu deyib, hazırda Ermənistan hökumətinin və parlamentinin bəzi nümayəndələrinin sözügedən "nümayəndəliyin" fəaliyyətinin dayandırılmalı olduğu barədə verdikləri açıqlamalar da, ola bilsin ki, bununla bağlıdır. Nikol Paşinyan hökuməti və bu hökuməti dəstəkləyənlər, eyni zamanda Baş nazirin parlamentdəki tərəfdarları nümayiş etdirməyə çalışırlar ki, bu, hökumətdən qaynaqlanan bir fəaliyyət olmayıb. Amma Ermənistan rəhbərliyinin bunu sübut etməsi üçün bu cür bəyanatlar heç də yetərli deyil, konkret tədbirlər görülməlidir, hökumət bu "nümayəndəliyin" fəaliyyətini dayandırmalıdır, açıq-aydın nümayiş etdirməlidir ki, İrəvanda belə bir "nümayəndəlik" artıq fəaliyyət göstərmir".
İradə SARIYEVA
