Qarabağlılar İrəvandan kütləvi qaçır - Paşinyan bir səbəb dedi, Şahramanyan variantlar sayır...
Akif Nağı: "Oyunbazlıq edirlər, Paşinyan bir söz deyir, Şahramanyan tamam başqa bir iddia ortaya qoyur, bunlar isə bir-birini tutmur"
Qarabağdan könüllü köçüb getmiş ermənilərin ətrafında həm Paşinyan hökuməti, həm də Samvel Şahramanyan və onun kimiləri müxtəlif oyunlar qururlar. Məsələ burasındadır ki, Qarabağdan getmiş ermənilər özləri tamamilə məsələyə neytral yanaşır və tezliklə Ermənistanı da tərk edib başqa ölkələrə köçməyə can atırlar.
2023-cü ilin sentyabrında qondarma "respublika" ləğv olunsa da, 28 sentyabr 2023-cü ildə qondarma respublikanın "prezidenti" Samvel Şahramanyanın imzaladığı "fərmana" əsasən, 1 yanvar 2024-cü ildən etibarən idarə fəaliyyətində olan bütün "dövlət qurumları", təşkilatların ləğv ediləcəyi və qondarma rejimin fəaliyyətinin dayandırılacağı elan edilsə də, təəssüf ki, hələ də Şahramanyan özünü "prezident" hesab edir və müxtəlif açıqlamalar verir.
Qondarma "prezident" S.Şahramanyan sentyabrın 2-də açıqlama verib ki, ermənilər yenidən Qarabağa qayıtmaq istəyirlər, bu yolda "mübarizə" aparırlar, məqsədləri geri qayıtmaqdır və sair.
O deyib ki, ermənilər "vətənə" qayıtmaq ümidi ilə yaşayırlar. Şahramanyan hətta qeyd edib ki, ermənilərin "öz tarixi vətənlərinə qayıtması məsələsi onların diqqət mərkəzindədir". Guya onu həll etmək üçün Ermənistanın keçmiş xarici işlər naziri Vardan Oskanyanın rəhbərliyi ilə komitə də yaradılıb. "Biz vaxtaşırı görüşür və mümkün qayıdışla bağlı məsələləri müzakirə edirik"-deyə bildirən Şahramanyan iddia edib ki, ermənilər "Ermənistan Artsaxında yaşamaq istəyir".
Utanmadan belə bir absurd ifadə işlədir və bununla da Ermənistanın Azərbaycana qarşı ərazi iddiasının olduğunu sübut edir.
Xatırladaq ki, bir-iki gün əvvəl isə Ermənistanın Baş naziri Nikol Paşinyan keçirdiyi mətbuat konfransında Şahramanyanın dediklərinin əksini söyləyib. Paşinyan deyib ki, Qarabağdan olan ermənilər Ermənistanı da tərk edib başqa ölkələrə gedirlər. O, ermənilərə müraciət edib ki, Ermənistanı tərk edib getməsinlər və Ermənistan vətəndaşlığı almaq üçün hökumətə müraciət etsinlər.
Şahramanyan deyir ermənilər Qarabağa qayıtmaq istəyir, Paşinyan isə bildirir ki, Qarabağdan gedən ermənilər Ermənistandan qaçırlar.
Ermənistandan qaçan ermənilər yenidən Qarabağa qayıtmaq istəyər? Bu məsələdə Paşinyanla Şahramanyanın sözü bir-birini tutmur. Nə baş verir?
"Şahramanyan oyun oynayır, özü də başa düşür ki, ermənilərin Azərbaycan ərazisinə qayıtması mümkün deyil"
Azad Vətən Partiyasının sədri Akif Nağı "Bakı-Xəbər"ə bildirdi ki, Ermənistanda bəzi qüvvələr, bəzi qruplar hələ də Qarabağdan könüllü şəkildə köçüb gedən ermənilərdən siyasi məqsədlər üçün istifadə etməyə çalışırlar: "Ermənistan hakimiyyəti, Paşinyan da bu məsələdə xüsusi məqsəd güdür, vaxtaşırı olaraq bu barədə danışır. Eyni zamanda, Bakıda həbsdə olmalı olan bu Şahramanyan deyilən cinayətkar da populist çıxışlarla gündəmə gəlməyə çalışır. Amma hamısı başa düşür ki, dedikləri gerçəkləşən deyil, etdikləri boş-mənasız bir söhbətdir. Çünki artıq məsələ öz həllini tapıb. Ermənistanın keçmiş xarici işlər naziri Vardan Oskanyan da yaşlı vaxtında özünə yeni sənət tapıb və ona aid olmayan, başı çıxmayan işlərlə məşğul olur. Bu adam heç vaxt ağıl yiyəsi olmayıb, indi tamam ağlını itirib. Bunlar nə günə qalıblarsa Oskanyanın ağlı ilə oturub-dururlar, onunla məsləhətləşirlər. Guya o da hansısa təşkilat yaradıb.
Reallıq ondan ibarətdir ki, Azərbaycan öz ərazi bütövlüyünü bərpa edib, Qarabağ heç vaxt ermənilərin vətəni olmayıb, onlar ora Çar Rusiyasının məkrli siyasəti nəticəsində köçürülüblər. Çar Rusiyası dövründə də Azərbaycan yaşamaq üçün onlara şərait yaratdı, sonrakı dövrlərdə onlar üçün müəyyən şərait olmasına çalışıb. Amma onlar onu başa düşmədilər, Azərbaycana, Azərbaycanın mərkəzi hakimiyyətinə qarşı çıxışlar etdilər. 1919-cu ildə Ermənistanın əlində alət olub, guya Azərbaycana qarşı üsyan qaldırdılar, o dövrdə Milli Hökumət onların bu üsyanlarının, Ermənistanın təcavüzünün qarşısını aldı və öz hakimiyyətini həmin ərazilərdə bərpa etdi. Sonrakı mərhələlərdə Azərbaycanın onlara qarşı hər hansı bir niyyəti yox idi. Ermənilər Azərbaycan ərazisində yaşayırdılar, bizim ölkəmizin vətəndaşları idilər. Amma növbəti dəfə Azərbaycana xəyanət etdilər. Onlardan bəzi dövlətlər, bəzi mərkəzlər Azərbaycana qarşı istifadə etdilər, onların əli ilə Azərbaycanın mərkəzi hakimiyyətinə qarşı üsyan qaldırdılar, qiyam törətdilər. Onların bu hərəkətləri nəticəsində 30 il ərzində 1 milyondan artıq azərbaycanlı köçkün vəziyyətinə düşdü, 300 minə yaxın azərbaycanlı isə indiki Ermənistandan, tarixi Azərbaycan torpaqlarından, türk yurdundan, Qərbi Azərbaycandan deportasiya edildi, qovuldu. Budur onların törətdiyi cinayətlər. İndi Ermənistandakı ermənilər, Qarabağdan köçüb getmiş ermənilər və dünyadakı ermənilər onun bədəlini ödəyirlər.
Oyunbazlıq edirlər, Paşinyan bir söz deyir, Şahramanyan tamam başqa bir iddia ortaya qoyur, bunlar isə bir-birini tutmur. Əslində, hər ikisi də Qarabağdan könüllü köçüb getmiş ermənilərdən öz çirkin məqsədləri üçün istifadə etməyə çalışırlar.
Paşinyan bu günlərdə bir söz də dedi ki, ermənilərin Qarabağa qaytarılması mümkünsüzdür, real deyil. O bu mövqedən çıxış etdi, o da öz siyasətini yeridir, oradakı erməniləri hələlik Ermənistanda saxlayıb öz məqsədləri üçün istifadə etməyə çalışır. O çalışır ki, müəyyən sayda ermənilər Ermənistanda qalsın. Çünki ermənilər Ermənistanda qalmaq istəmirlər, çıxıb getmək istəyirlər, daha yaxşı yaşamaq məqsədi güdürlər. Ermənilər üçün vətən anlayışı yoxdur. Qarabağ da, indiki Ermənistan deyilən ərazi də onların vətəni deyil, olmayıb, bunlar tarixi Azərbaycan torpaqlarıdır. Onlarda vətən anlayışı olmadığı üçün ordan da getmək istəyirlər, yaxşı həyat dalınca qaçırlar. Paşinyan çalışır ki, onların bu köçünün qarşısını alsın, onları heç olmasa müəyyən bir sayda Ermənistanda saxlasın. Məqsəd də odur ki, onların adından istifadə edib Azərbaycana qarşı müəyyən təxribatlar törətsin".
A.Nağının sözlərinə görə, Paşinyan istəyir ki, onların adlarından istifadə edilsin, onlarla bağlı müəyyən açıqlamalar verilsin. A.Nağının fikrincə, Paşinyan Qarabağdan köçüb getmiş ermənilərin Azərbaycana qayıtmasını istəmir, istəyir ki, onun əlinin altında olsunlar, eyni zamanda da başa düşür ki, onların geri qayıdışı artıq real deyil. A.Nağı qeyd etdi ki, ermənilər Azərbaycan ərazisindən könüllü şəkildə çıxıblar, öz qərarlarını veriblər və onların geri qayıtması üçün də Azərbaycanın şərtləri var, lakin onlar o şərtləri qəbul etmək istəmirlər. O vurğuladı ki, ermənilər geri qayıtmaq istəyirsə mütləq şəkildə Azərbaycan vətəndaşlığını qəbul etməlidirlər, bizim qanunlara tabe olmalıdırlar, törətdikləri cinayətlərə görə Azərbaycan məhkəmələri qarşısında cavab verməlidirlər. "Ona görə də Paşinyan hesab edir ki, onların geri qayıtması həm də bu amilə görə mümkün deyil. Amma Şahramanyan oyun oynayır, özü də başa düşür ki, ermənilərin Azərbaycan ərazisinə qayıtması mümkün deyil. Guya bunlar 1991-ci ilin sentyabr ayının 2-də nəsə elan ediblərmiş, bunu gözə soxmağa çalışırlar. Amma heç bir reaksiya yoxdur. Onların bu "günlərinə" heç bir reaksiya yoxdur, Ermənistanın özündə artıq heç kəs buna fikir vermir. Heç kəs o bədnam tarixi yada salmaq istəmir, yanlış bir addım olduğu, səhv etdikləri üçün xatırlamaq istəmirlər. Bunu ermənilərin çoxu başa düşür və mümkün qədər 1991-ci ilin 2 sentyabrını yaddan çıxarmağa çalışırlar. Amma Şahramanyan kimi əl oyuncaqları kimlərinsə sifarişi ilə nələrisə təkrar etməyə cəhd edir, amma onun da heç bir mənası, təsiri yoxdur. Proses Azərbaycanın istəklərinə uyğun gedir və o istiqamətdə hər şey davam edəcək. Ermənilərə demək lazımdır ki, ağıllarını başlarına yığsınlar, bu boş xülyalarla özlərini aldatmasınlar" - deyə A.Nağı əlavə etdi.
İradə SARIYEVA
