Xalqımızın böyük zəfər qələbəsi ilə başa çatan 44 günlük vətən müharibəsindən və ölkəmizin suverenliyi bütun ərazimizdə tam bərpa edildikdən sonra ölkədə yeni partiyalararası münasibətlər yaranmağa başlayıb. Hazırda vəziyyət xeyli yumşalıb.
Prezident İlham Əliyevin təşəbbüsü ilə ölkədə davamlı olaraq müxtəlif siyasi qüvvələr arasında konstruktiv əməkdaşlıq, sağlam siyasi dialoq və ümummilli məsələlərdə həmrəylik mühiti təşviq olunmaqdadır.
Azərbaycanın suverenliyinin bərpasından sonra siyasi münasibətlər sisteminin yenidən qurulması hazırda necə səmərə verir? Bu proses necə gedir, hansı dəyişiklikləri hiss edirsiniz?
Arzuxan Əlizadə: "Əslində bu birlik düşmənlərimizə ciddi mesajlar verdi və bununla bir çox xarici təhdidlər önləndi"
Baki-xeber.com saytının sualını cavablandıran AMİP lideri, millət vəkili Arzuxan Əlizadə bildirdi ki, beş il əvvəl prezident İlham Əliyev ölkədə yeni siyasi münasibətlər sisteminin və dialoq mühitinin formalaşdırılmasının zəruriliyi ilə bağlı cəmiyyətə mesaj verdi. Bu istiqamətdə uzun müddətdir ki, bəlli bir siyasət yürüdülməkdədir. Prezident Administrasiyası yanında 2019-cu ilin noyabırında siyasi partiyalarla və qanunvericilik hakimiyyəti ilə əlaqələr şöbəsi yaradılıb.
2020-ci ilin fevral-mart aylarından bu qurum hörmətli Ədalət Vəliyevin rəhbərliyi altında ölkədəki bütün siyasi partiyaların rəhbərləri və funksionerləri ilə görüşlər keçirir və məsləhətləşmələr aparır.
Ötən müddət ərzində ölkənin siyasi həyatında kifayət qədər ciddi hadisələr baş verib.
Bu il Prezident İlham Əliyevin sərəncamı ilə konstitusiya və suverenlik ili elan edilib.
44 günlük müharibə və ondan sonrakı dövrdə siyasi partiyalar ümummilli məsələlərdə siyasi həmrəylik nümayiş etdirdilər. Yəni siyasi partiyalar hamılıqla ümummilli məsələlərdə dövlətin yanında olduqlarını bəyan etdilər. Əslində bu birlik düşmənlərimizə ciddi mesajlar verdi və bununla bir çox xarici təhdidlər önləndi.
Bu müddət ərzində siyasi partiyalar haqqında yeni qanun qəbul edilib, bir sıra partiyalar qeydiyyatdan keçə bilmirdi, onların qeydiyyat məsələləri həll edilib, partiyalar qərərgahla təmin edilib və siyasi partiyaların ölkənin siyasi sistemində fəaliyyəti stimullaşdırılıb. Hazirda ölkədə 26 partiya qeydiyyatdadır və fəaliyyət göstərir. Bu partiyalardan bir-ikisindən başqa hamısı ümumimilli məsələlərdə birlik nümayiş etdirir. Siyasi partiyaların ölkənin siyasi gündəmində bu cür iştirakı siyasi partiyalaşma institutunun inkişafı prosesinə öz töhfəsini verir.
Belə fikirlər də səslənir ki, YAP daha güclüdür, digər partiyalar onun yanında bir qədər zəif görünürlər. Doğrudur, YAP digər siyasi partiyalardan insan, maliyyə və inzibati resurslarına görə çox güclüdür. Amma bu digər partiyaların zəif olması anlamına gəlmir. Siyasi partiyalar ölkənin siyasi vitrinini təşkil etməkdədirlər. Onlarin siyasi proseslərdə işturakı ölkədə demokratiyanın mövcudluğundan xəbər verir.
Hamsının olmasa da, əksər partiyaların beynəlxalq əlaqələri mövcuddur. Məsələn, AMİP müqayisə olunmayacaq dərəcədə beynəlxalq siyasi əlaqələrə malikdir. Biz bu əlaqələrdən istifadə edərək, Azərbaycan həqiqətlərinin dünyaya çatdırılması, Azərbaycanın dünyada tanınması istiqamətində kifayət qədər ciddi işlər görməkdəyik.
Gələn il Azərbaycan müstəqilliyinin bərpa edilməsinin 35 illiyini qeyd edəcək. Bu, insan həyatı üçün bəlkə də böyük dövrdür, amma tarix üçün elə də uzun zaman deyil. Bu baxımdan Azərbaycanı müstəqilliyini yeni bərpa etmiş ölkələr sırasına aid etmək olar. Ölkədə demokratik ənənələr inkişaf etdirilməkdədir, siyasi partiyalar inkişaf edərək güclənirlər. Onların mövcudluğu dövlətçilik üçun vacib şərtlərdən biridir. Bu mənada siyasi partiyaların güclü olması hakim partiyanın da marağındadır. Bu gün parlamentdə 11 partiya təmsil olunmaqdadır. Son bələdiyyə seçkilərində 23 partiya iştirak etdi və əksəriyyəti yeni seçilmiş tərkibdə təmsil olunur.
Hesab edirəm ki, ölkənin siyasi palitrası rəngarəng olmalıdır. Bu, inkişafa stimul verən amillərdəndir".
Ceyhun Məmmədov: "Demokratik dövlətlərin idarə edilməsində siyasi partiyaların fəallığının önəmli rolu var"
Eyni suala cavabında YAP-ı təmsil edən deputat Ceyhun Məmmədov bildirdi ki, demokratik dövlətlərin idarə edilməsində siyasi partiyaların fəallığının önəmli rolu var: "Onların təşkilatlanması vacibdir. Çünki onlar demokratiyanın, dövlət quruculuğunun, dövlət idarəçiliyinin mühum elementləridir. Ona görə də dövlətin siyasi partiyalara önəmli diqqəti və qayğısı var. Bu gün bir çox siyasi partiyalar ölkənin siyasi sistemində uğurla və ləyaqətlə təmsil olunurlar. Əslində, dövlət üzərinə düşən vəzifələri yerinə yetirir. Hər il dövlət büdcəsindən siyasi partiyalara böyük həcmli vəsait ayrılır və yardımlar verilir. Bu qayğının qarşılığında şiyasi partiyaların üzərinə böyük məsuliyyət düşür. Yəni onlar çalışmalıdırlar ki, siyasi proseslərdə fəal rol oynasınlar. Onlar ölkədə gedən siyasi proseslərdən cəmiyyəti məlumatlandırmalıdırlar və prosesə öz töhfələrini verməlidirlər.
Hazırda prezidentin sərəncamı ilə siyasi partiyalarla iş şöbəsi yaradılib. Həmin qurum siyasi partiyalarla fəal iş aparır. Davamlı olaraq siyasi partiyalarla görüşlər keçirilir, məsləhətləşmələr aparılır. Dövlət partiyalara qərargah verib. Siyasi partiyaların üzərinə düşən vəzifə isə siyasi proseslərdə fəal iştirak etmək, daxili və xarici siyasi məsələlərə öz siyasi mövqeyini bildirməkdən ibarətdir.
Bu gün dövlətimizə qarşı xaricdən təxribatların həyata keçirilməsinin şahidi oluruq. Onlar ölkədə ictimai-siyasi prosesləri gərginləşdirmək üçün davamlı addımlar atır. Bu da dövlətin həyata keçirdiyi siyasətə öz mənfi təsirini göstərir. Bunlar yanlış informasiyaların verilməsi, zərərli təbliğatın aparılması, məqsədli şəkildə dövlətçilik əleyhinə yönəlmiş addımların atılması və s. bu gün üzləşdiyimiz siyasi problemlərdir. Bu problemlərin həllinə siyasi partiyalar da öz töhfəsini verməlidir.
Pənah Hüseyn: "Mən daha çox mənfi nəticələrə diqqət yetirilməsinin tərəfdarıyam"
AXP sədri Pənah Hüseyn məsələyə münasibət bildirərkən dedi ki, bu prosesi müsbət dərərləndirənlər də, mənfi dəyərləndirənlər də var: "Mən daha çox mənfi nəticələrə diqqət yetirilməsinin tərəfdarıyam. Son beş ildə siyasi partiyaların sayının iki dəfə azalması, partiyaların istər parlament, istərsə də bələdiyyə seçkilərində çox az namizədlərlə iştirak etmələri, parlamentdə, bələdiyyələrdə çox az üzvlərlə tamsil olunması və son seçkilərdə seçici fəallığının rekord səviyyədə aşağı düşməsi göstərir ki, nəticələrin narahatlıq doğuran tərəfləri də var".
Dəniz NƏSİRLİ
